അമ്മയുടെ കണ്ണിൽ മുളകുപൊടിയെറിഞ്ഞ് ഒരു വയസ്സുകാരനെ തട്ടിക്കൊണ്ടുപോകാൻ ശ്രമം; രക്ഷപെട്ടത് തലനാരിഴയ്ക്ക് ; കൊല്ലത്തിനു പിന്നാലെ തിരുവനന്തപുരത്തും കിഡ്നാപ്പിംഗ് ശ്രമം; സംസാര ശേഷിയില്ലാത്ത അമ്മയെ കത്തി കാട്ടി പേടിപ്പിച്ച് പ്രതികള്‍ രക്ഷപ്പെട്ടു ; കരമന പൊലീസ് അന്വേഷണം ആരംഭിച്ചു.
കുഞ്ഞുങ്ങളെ കാണാതാകുന്ന വാർത്തകൾ നിരന്തരം കേട്ടുകൊണ്ടിരിക്കുകയാണ് നമ്മൾ.കുട്ടികളെ തട്ടിക്കൊണ്ടു പോകുന്ന സംഘങ്ങൾ അമ്മമാരുടെഉറക്കം കെടുത്താൻ തുടങ്ങിയിട്ട് കാലം ഏറെയായി .കഴിഞ്ഞ ദിവസമാണ് കൊല്ലം കരുനാഗപ്പള്ളിയിൽ ജാസ്മിൻ എന്ന നാലാം ക്ലാസ്സുകാരി തട്ടിക്കൊണ്ടുപോകാൻ ശ്രമിച്ച നാടോടി സ്ത്രീയുടെ കയ്യിൽ നിന്നും തന്റെ മനോധൈര്യം കൊണ്ട് രക്ഷപെട്ടത്. ആ സംഭവത്തിന്റെ ഞെട്ടൽ വിട്ടുമാറും മുൻപേയാണ് ഇപ്പോൾ തിരുവനന്തപുരത്തു മറ്റൊരു കുഞ്ഞിനെ തട്ടിക്കൊണ്ടുപോകാൻ ശ്രമിച്ചതായി വാർത്തകൾ വരുന്നത്.
തിരുവനന്തപുരം തമലത്താണ് ഉറങ്ങി കിടക്കുകയായിരുന്ന ഒരു വയസ്സുകാരനെ പട്ടാപകല്‍ തട്ടിക്കൊണ്ട് പോകാന്‍ ശ്രമം നടന്നത്. സംസാര ശേഷിയില്ലാത്ത അമ്മയെ കത്തി കാട്ടി പേടിപ്പിച്ചാണ് പ്രതികള്‍ രക്ഷപ്പെട്ടത് .
വൈകിട്ട് നാല് മണിക്കാണ് സംഭവം. അമ്മയും കുഞ്ഞും മാത്രമാണ് വീട്ടിലുണ്ടായിരുന്നത്. കുളിമുറിയില്‍ നിന്ന് ഇറങ്ങി വന്ന അമ്മ കണ്ടത് രണ്ട് പേര് ചേര്‍ന്ന് കുട്ടിയെ തട്ടിക്കൊണ്ട് പോകാന്‍ ശ്രമിക്കുന്നതാണ്. ഉടന്‍ തന്നെ കുട്ടിയെ അമ്മ പിടിച്ച്‌ വലിച്ചു. ഈ സമയം കുട്ടിയെ പിടിച്ചിരുന്ന പ്രതി അമ്മയെ കത്തി കാട്ടി ഭീഷണിപ്പെടുത്തി.
പിടി വിടാതായതോടെ മതിലിന്‍റെ മറുവശത്ത് ഉണ്ടായിരുന്ന മറ്റൊരു പ്രതി മുളകുപ്പൊടി എറിഞ്ഞു രക്ഷപ്പെട്ടുവെന്ന് അമ്മ പൊലീസിന് മൊഴി നല്‍കി. സംഭവത്തില്‍ കേസെടുത്ത് കരമന പൊലീസ് അന്വേഷണം ആരംഭിച്ചു.
കഴിഞ്ഞ ദിവസം, കൊല്ലത്ത് കരുനാഗപ്പള്ളിയില്‍ നാലാം ക്ലാസുകാരിയെ തട്ടിക്കൊണ്ട് പോകാന്‍ ശ്രമം നടന്നിരുന്നു. രാവിലെ സ്കൂളുകളിലേക്കു നടന്നുപോകുകയായിരുന്ന നാലാം ക്ലാസ് വിദ്യാര്‍ത്ഥിനിയെയാണ് തട്ടിക്കൊണ്ടുപോകാന്‍ ശ്രമം നടന്നത്. വ്യാഴാഴ്ച രാവിലെ ഒന്‍പതരയോടെയാണ് സംഭവം. സ്കൂളിലേക്കു ഒറ്റയ്ക്കു നടന്നുപോകുകയായിരുന്ന കുട്ടിയെ അതുവഴി നാടോടി സ്ത്രീ കയ്യില്‍പിടിച്ചു കൊണ്ട് പോകാന്‍ ശ്രമിക്കുകയായിരുന്നു. മക്കളെ എത്ര പൊതിഞ്ഞിപിടിച്ചു വളർത്തിയാലും ഇത്തരം സംഭവങ്ങൾ ആവർത്തിക്കുകയാണ്.
കേരളത്തില്‍ നിന്ന് ഓരോ ദിവസവും കാണാതാവുന്നത് ശരാശരി മൂന്നു കുട്ടികളെയാണെന്ന് പൊലീസിന്റെ കണക്കുകള്‍ വ്യക്തമാക്കുന്നു. 2019 ല്‍ മാത്രം സംസ്ഥാനത്ത് നിന്ന് കാണാതായത് 267 കുട്ടികളെയാണ്. കുട്ടികളുടെ സുരക്ഷയ്ക്ക്‌ മാതാപിതാക്കളും പൊലീസും രക്ഷിതാക്കളും സമൂഹവും ജാഗ്രതയുടെ പുതിയ മതിൽ പണിയേണ്ടത്‌ അനിവാര്യംതന്നെയാണ്‌. കാണാതാകപ്പെട്ടവരില്‍ പലരേയും വിവിധയിടങ്ങളില്‍ വെച്ച് കണ്ടെത്താനായെങ്കിലും ഒരു പാട് കുട്ടികളെ ഇനിയും കണ്ടെത്താനായിട്ടില്ല എന്നത് പരമാര്‍ത്ഥം.ഇനിയും കണ്ടെത്തിയിട്ടില്ലാത്ത കുട്ടികള്‍ എവിടെ പോകുന്നുവെന്നത് ഇപ്പോഴും ഒരു ചോദ്യമായി അവശേഷിക്കുന്നു.
https://www.facebook.com/Malayalivartha
