ഇന്നലെ രാത്രിയിലെ ചാനല്‍ ചര്‍ച്ചകള്‍ കാണാനായി ചാനലുകള്‍ മാറ്റിയ മലയാളികളാണ് ആദ്യം ഏഷ്യാനെറ്റ് ന്യൂസ് കട്ടായെന്നറിഞ്ഞത്. തുടര്‍ന്ന് കേബിള്‍ ഓപ്പറേറ്റര്‍മാരെ വിളിയോട് വിളിയായിരുന്നു. പലരും ഏഷ്യാനെറ്റ് ന്യൂസിന്റെ ഓഫീസിലേക്ക് വിളിച്ചെങ്കിലും പ്രതികരണമുണ്ടായില്ല. മറ്റ് ചാനലുകളെല്ലാമുണ്ട്. മീഡിയാ വണ്‍ കട്ടായിട്ടുണ്ട്. മാറി ജനം ടിവി വച്ചപ്പോഴാണ് ദേ വരുന്നു കാര്യ കാരണങ്ങള്‍ സഹിതമുള്ള റിപ്പോര്‍ട്ട്. ഡല്‍ഹി കലാപം മാനദണ്ഡങ്ങള്‍ തെറ്റിച്ച് ഏകപക്ഷീയമായി റിപ്പോര്‍ട്ട് ചെയ്ത ഏഷ്യാനെറ്റ്, മീഡിയ വണ്‍ ചാനലുകള്‍ 48 മണിക്കൂര്‍ വിലക്കിയെന്ന്. മറ്റ് ചാനലുകളൊന്നും അനുകൂലിച്ചും പ്രതികൂലിച്ചും ഒന്നും നല്‍കാതിരുന്നതോടെ ജനപ്രിയ ചാനലായ ഏഷ്യാനെറ്റിന് എന്ത് പറ്റിയെന്നറിയാന്‍ ജനം ടി.വി. കണ്ടുകൊണ്ടേയിരുന്നു. അനില്‍ നമ്പ്യാര്‍ കത്തിക്കയറിയപ്പോള്‍ ജനത്തിന്റെ റേറ്റിംഗും പെട്ടന്ന് കൂടി.

അതിനിടെ പലരും ചോദിച്ച ചോദ്യമാണ് രാജീവ് ചന്ദ്രന്‍ ബിജെപി എംപിയല്ലേ. പുള്ളീക്കാരന്‍ തലപ്പത്ത് ഉള്ളപ്പോഴാണോ ഈ വിധി. പക്ഷെ ബിജെപിക്കാര്‍ തിരിച്ച് ചോദിക്കുന്നത് എന്നിട്ടാണോ ബിജെപിയെ ഇട്ട് ചാനല്‍ അലക്കുന്നതെന്ന്. രണ്ട് കിട്ടട്ടേയെന്നാണ് ഏഷ്യാനെറ്റ് വാര്‍ത്ത മൂലം സ്വസ്തത നഷ്ടപ്പെട്ട രാഷ്ട്രീയക്കാരും ചിന്തിച്ചത്. എന്നാലും അത് ഉള്ളില്‍ മറച്ച് അതിനിടെ അവര്‍ പ്രതിഷേധവുമായി രംഗത്തെത്തി. അതേസമയം ചാനലുകള്‍ക്ക് കോടിക്കണക്കിന് രൂപയുടെ വരുമാനമാണ് മണിക്കൂറുകള്‍ കട്ടായതോടെ നഷ്ടമായത്. നമ്പര്‍ ഒന്നാം സ്ഥാനത്തുള്ള ഏഷ്യാനെറ്റിന്റെ കട്ടാക്കല്‍ മറ്റ് ചാനലുകളുടെ റേറ്റിംഗും കൂട്ടും. പിന്നെ തിരിച്ച് പിടിക്കാനും പ്രയാസമാകും. ഇതോടെയാണ് ചര്‍ച്ചകള്‍ മുറുകിയത്.

അങ്ങനെ നേരം വെളുത്തപ്പോള്‍ ഏഷ്യാനെറ്റ് ന്യൂസ് ചാനലിനുള്ള വിലക്ക് മാറ്റി. എന്നാല്‍ മീഡിയാ വണ്ണിനെതിരെ വിലക്ക് തുടരുകയാണ്. ഇന്ന് രാവിലെ മുതല്‍ ഏഷ്യാനെറ്റ് ന്യൂസ് ചാനല്‍ ലഭ്യമായി തുടങ്ങി. എന്നാല്‍ മീഡിയ വണ്‍ ഇപ്പോഴും കിട്ടുന്നില്ല. ഏത് സാഹചര്യത്തിലാണ് ഏഷ്യാനെറ്റ് ന്യൂസിന്റെ വിലക്ക് പിന്‍വലിച്ചതെന്ന് വ്യക്തമല്ല.

ഡല്‍ഹിയിലെ വര്‍ഗീയ കലാപം റിപ്പോര്‍ട്ട് ചെയ്യുന്നതുമായി ബന്ധപ്പെട്ട മാര്‍ഗനിര്‍ദ്ദേശങ്ങള്‍ ലംഘിച്ചുവെന്ന് കാണിച്ച് 48 മണിക്കൂറാണ് കേന്ദ്ര വാര്‍ത്ത പ്രക്ഷേപണ മന്ത്രാലയം ഇരു ചാനലുകള്‍ക്കും വിലക്ക് ഏര്‍പ്പെടുത്തിയത്. പുലര്‍ച്ചെ 3 മണിയോടെയാണ് ഏഷ്യാനെറ്റ് സംപ്രക്ഷേപണം പുനരാരംഭിച്ചത്. ഇന്നലെ രാത്രി 7.30 മുതലായിരുന്നു ഇരു ചാനലുകളിലും വിലക്ക് ഏര്‍പ്പെടുത്തിയത്. കേന്ദ്ര സര്‍ക്കാര്‍ നടപടിയെ നിയമപരമായി നേരിടാനാണ് മീഡിയ വണ്ണിന്റെ തീരുമാനം. കടുത്ത പ്രതിഷേധം മീഡിയാ വണ്‍ ഉയര്‍ത്തി. എന്നാല്‍ കേന്ദ്ര സര്‍ക്കാര്‍ തീരുമാനത്തെ ഏഷ്യാനെറ്റ് ന്യൂസ് വിമര്‍ശിച്ചില്ല. ബിജെപി എംപിയായ രാജീവ് ചന്ദ്രശേഖറിന്റേതാണ് ഏഷ്യാനെറ്റ് ന്യൂസ്. അദ്ദേഹത്തിനാണ് കൂടുതല്‍ ഓഹരികള്‍. രാജീവ് ചന്ദ്രശേഖറിന്റെ ഇടപെടലാണ് ഏഷ്യാനെറ്റ് ന്യൂസിന് വിലക്ക് മാറാന്‍ സഹായകമായതെന്നാണ് എല്ലാവരും പറയുന്നത്.

അതേസമയം കേന്ദ്ര തീരുമാനത്തെ മീഡിയാ വണ്‍ കടന്നാക്രമിച്ചിരുന്നു. സ്വതന്ത്ര മാധ്യമ പ്രവര്‍ത്തനം രാജ്യത്ത് പാടില്ലെന്ന് ഉത്തരവിടുന്നതിന് തുല്യമാണ് സര്‍ക്കാര്‍ നടപടിയെന്ന് മീഡിയ വണ്‍ എഡിറ്റര്‍ ഇന്‍ ചീഫ് സിഎല്‍ തോമസ് പുറത്തിറക്കിയ വാര്‍ത്താ കുറിപ്പില്‍ പറയുന്നു. അടിയന്തിരാവസ്ഥ കാലത്തുപോലും ഉണ്ടാകാത്ത വിധത്തിലുള്ള ജനാധിപത്യ വിരുദ്ധമായ നടപടിയെ നിയമപരമായി നേരിടാനാണ് തീരുമാനം എന്നാണ് വാര്‍ത്താകുറിപ്പില്‍ വ്യക്തമാക്കുന്നത്. കലാപം റിപ്പോര്‍ട്ട് ചെയ്തപ്പോള്‍ സന്തുലിതമായി കാര്യങ്ങള്‍ അവതരിപ്പിച്ചില്ല, ഡല്‍ഹി പൊലീസിനെ പ്രതിസ്ഥാനത്ത് നിര്‍ത്തി തുടങ്ങിയ കാര്യങ്ങള്‍ പറഞ്ഞാണ് വിലക്ക്. ഈ ചാനലുകള്‍ അപ് ലിങ്ക് ചെയ്യുന്ന സ്വകാര്യ ഏജന്‍സികളോടാണ് കേന്ദ്ര സര്‍ക്കാര്‍ വിലക്ക് ഏര്‍പ്പെടുത്താനായി ആവശ്യപ്പെട്ടത്. കേന്ദ്രത്തിന്റെ കടുത്ത നടപടി മറ്റ് ചാനലുകള്‍ക്കും പേടിയായി മാറിയിട്ടുണ്ട്.വാര്‍ത്തയില്‍ ശ്രദ്ധ വേണമെന്ന് മാനേജുമെന്റുകള്‍ ജീവനക്കാര്‍ക്ക് നിര്‍ദേശം കൊടുത്തിട്ടുണ്ട്.