സിപിഎം നേതാവ്‌ ലോനപ്പന്‍ നമ്പാടന്‍ (78) അന്തരിച്ചു. വ്യക്ക തകരാറിലായതിനെ തുടര്‍ന്ന്‌ കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. നായനാര്‍ മന്ത്രിസഭയില്‍ അംഗമായിരുന്നു. ഭവനനിര്‍മ്മാണം, ഗതാഗതം വകുപ്പുകളാണ്‌ അദ്ദേഹം കൈകാര്യം ചെയ്‌തിരുന്നത്‌. മൂന്ന്‌ തവണ വീതം കൊടകര, ഇരിങ്ങാലക്കുട മണ്ഡലങ്ങളില്‍ നിന്നും നിയമസഭാംഗമായി. 2004-ല്‍ മുകുന്ദപുരം ലോക്‌സഭ മണ്ഡലത്തെ പ്രതിനിധീകരിച്ച്‌ പാര്‍ലമെന്റിലും എത്തി.

1982-ല്‍ കേരള കോണ്‍ഗ്രസില്‍ നിന്നാണ്‌ നമ്പാടന്‍ സി.പി.എമ്മില്‍ എത്തിയത്‌. നമ്പാടന്റെ കൂറുമാറ്റത്തെ തുടര്‍ന്നാണ്‌ 1982-ലെ കരുണാകരന്‍ മന്ത്രിസഭ താഴെ വീണത്‌. 81 ഡിസംബറില്‍ കെ കരുണാകരന്‍ മുഖ്യമന്ത്രിയായി ഐക്യ ജനാധിപത്യ മുന്നണി സര്‍ക്കാര്‍ അധികാരത്തില്‍ വന്നു. നിയമസഭയില്‍ ഭരണപ്രതിപക്ഷങ്ങള്‍ക്കു തുല്യ അംഗബലം. സ്പീക്കറുടെ കാസ്റ്റിങ് വോട്ടിലൂടെ സര്‍ക്കാര്‍ ഭരണം തുടര്‍ന്നു. 82 മാര്‍ച്ച് 15 നു നമ്പാടന്‍ നിയമസഭയില്‍ പ്രതിപക്ഷത്തിന് അനുകൂലമായി വോട്ടു ചെയ്തു. കരുണാകരന്‍ സര്‍ക്കാര്‍ നിലം പൊത്തി.

1963ല്‍ തൃശ്ശൂരിലെ കൊടകര പഞ്ചായത്തില്‍ നിന്ന്‌ കോണ്‍ഗ്രസ്‌ സ്ഥാനാര്‍ത്ഥിയായി മത്സരിച്ച്‌ ജയിച്ചാണ്‌ ലോനപ്പന്‍ നമ്പാടന്റെ രാഷ്ട്രീയ പ്രവേശം. പിന്നീട്‌ 1964ല്‍ കേരള കോണ്‍ഗ്രസ്‌ രൂപീകൃതമായപ്പോള്‍ ആ പാര്‍ട്ടിയില്‍ ചേര്‍ന്നു. 82 വരെ കേരള കോണ്‍ഗ്രസ്‌ അംഗമായി തന്നെ തുടര്‍ന്നു. പിന്നീട്‌ മരണം വരെ സി.പി.എം അംഗമായിരുന്നു. രാഷ്ട്രീയ നേതാവ്‌ എന്നതിലുപരി അധ്യാപകന്‍, കര്‍ഷകന്‍,നാടകനടന്‍ എന്ന നിലയിലും നമ്പാടന്‍ തിളങ്ങി. ആനിയാണ്‌ ഭാര്യ. മൂന്ന്‌ മക്കളുണ്ട്‌.