ലുലു ഭൂമി കയ്യേറിയിട്ടില്ലെന്ന് റീ സര്വെ റിപ്പോര്ട്ട്
ലുലു മാള് ഇടപ്പള്ളി തോട് കൈയേറിയിട്ടില്ലെന്നു റീ സര്വേ റിപ്പോര്ട്ട്. ലുലു മാളിലേക്ക് പാലം നിര്മിക്കുന്നതിനായി എം.കെ.ഗ്രൂപ്പ് ഇടപ്പള്ളി തോട് കൈയേറിയെന്ന കൊച്ചി മെട്രോ റെയില് ലിമിറ്റഡിന്റെ പരാതിയെ തുടര്ന്നാണ് ജില്ലാ കളക്ടര് റീ സര്വേക്ക് ഉത്തരവിട്ടത്. ഇതിലാണ് എം.കെ.ഗ്രൂപ്പ് ലുലു മാളിന് വേണ്ടി ഭൂമി കൈയേറിയിട്ടില്ലെന്നു ബോധ്യമായത്.
ലുലു ഭൂമി കയ്യേറിയെന്ന ആരോപണവുമായി സി.പി.എം എറണാകുളം ജില്ലാ കമ്മിറ്റിയാണ് ആദ്യം രംഗത്തെത്തിയത്. സിപിഎം തന്നെ കയ്യേറ്റക്കാരനെന്ന് ആരോപിച്ചെന്ന് പറഞ്ഞ് ബോള്ഗാഡിയില് പദ്ധതിയില് നിന്ന് യൂസഫലി പിന്മാറിയിരുന്നു. ലുലു ഗ്രൂപ്പുമായി ബന്ധപ്പെട്ട് വിവാദങ്ങള് ഉയര്ന്ന പശ്ചാത്തലത്തില് എറണാകുളം ജില്ല കമ്മറ്റിയുടെ ആരോപണത്തിനെതിരെ ആദ്യം വി എസ് രംഗത്തെത്തിയിരുന്നു. ഇടത് സര്ക്കാരിന്റെ അനുമതി നല്കിയതില് വീഴ്ച സംഭവിച്ചിട്ടില്ലെന്നായിരുന്നു വി എസ് പറഞ്ഞത്. ഇതുകൂടാതെ യൂസഫലിക്ക് പ്രത്യക്ഷ പിന്തുണയും വിഎസ് പ്രഖ്യാപിച്ചു. പിന്നീട് ഏതാനം ദിവസങ്ങള്ക്കുശേഷം വാര്ത്ത സമ്മേളനം നടത്തിയ പിണറായി വിജയനും യൂസഫലിക്ക് പിന്തുണ നല്കി.
യൂസഫലി കൈക്കോട്ടെടുത്ത് ഭൂമി കയ്യേറിയെന്ന് തങ്ങള് ആരോപിച്ചിട്ടില്ലെന്നായിരുന്നു പിണറായിയുടെ പ്രതികരണം. കൂടാതെ ഇടപ്പള്ളി തോടുമായി ബന്ധപ്പെട്ട് കയ്യേറ്റം നടന്നിട്ടുണ്ടെങ്കില് അത് കളമേശ്ശേരി നഗരസഭയുടേയും കൊച്ചി കോര്പ്പറേഷന്റെയും വീഴ്ചയാണെന്നും പിണറായി പറഞ്ഞിരുന്നു. ബോള്ഗാഡി പദ്ധതിയില്നിന്ന് യൂസഫലി പിന്മാറരുതെന്നും ലുലുവിനെതിരെ സിപിഎം സമരത്തിനില്ലെന്നും പിണറായി പറഞ്ഞിരുന്നു.
https://www.facebook.com/Malayalivartha
