ആഭ്യന്തരത്തില് തട്ടി കോണ്ഗ്രസിലെ ആഭ്യന്തര കലഹം പൊട്ടിത്തെറിയിലേക്ക്; മന്ത്രിസഭയിലേക്ക് ഇല്ലെന്ന് രമേശ്
കോണ്ഗ്രസില് പ്രശ്നം രൂക്ഷമാകുന്നു. മന്ത്രിസഭാ പുനസംഘടനയെ ചൊല്ലിയുള്ള തര്ക്കം വലിയൊരു പൊട്ടിത്തെറിയുടെ വക്കില് എത്തിയിരിക്കുകയാണ്. തന്റെ മന്ത്രിസ്ഥാനത്തെ സംബന്ധിച്ച നിലപാട് കെ.പി.സി.സി പ്രസിഡന്റ് രമേശ് ചെന്നിത്തല ഹൈക്കമാന്റിനെ അറിയിക്കും. രമേശിന് ആഭ്യന്തരം ലഭിക്കില്ലെന്ന് ഉറപ്പായതോടെ ഐ ഗ്രൂപ്പ് കടുത്ത നിലപാടിലേക്ക് നീങ്ങാന് സാധ്യതയുണ്ട്.
ഇന്നലെ നടന്ന മൂന്നാം വട്ട ചര്ച്ചയും പരാജയപ്പെട്ടിരുന്നു. യുഡിഎഫ് കണ്വീനര് പി.പി. തങ്കച്ചന്റെ സാന്നിധ്യത്തില് ഇന്നലെ രാത്രി കെ.പി.സി.സി ആസ്ഥാനത്ത് അര മണിക്കൂറോളം നീണ്ട ചര്ച്ചയിലാണു മന്ത്രിസഭയിലേക്കില്ലെന്നു രമേശ് വ്യക്തമാക്കിയത്. എന്നാല് മന്ത്രിസഭയിലേക്കില്ലാത്ത സാഹചര്യത്തില് ലോക്സഭാ തെരഞ്ഞെടുപ്പു കഴിയുന്നതുവരെ കെ.പി.സി.സി പ്രസിഡന്റു സ്ഥാനത്തു തുടരാന് താല്പര്യമുണ്ടെന്നു രമേശ് ചെന്നിത്തല സൂചിപ്പിച്ചു. ഇതിനും ഹൈക്കമാന്ഡിന്റെ അനുമതി വേണമെന്നു രമേശിനെ മുഖ്യമന്ത്രി അറിയിച്ചു.
ഡല്ഹിയില് നടന്ന ചര്ച്ചയിലെ തീരുമാനങ്ങള് രമേശിനെ അറിയിക്കുക മാത്രമാണു ചെയ്തതെന്നു ചര്ച്ച കഴിഞ്ഞു പുറത്തിറങ്ങിയ മുഖ്യമന്ത്രി മാധ്യമങ്ങളോടു പറഞ്ഞു. മുഖ്യമന്ത്രി പറഞ്ഞതിനപ്പുറം ഒന്നും പറയാനില്ലെന്നു ഒപ്പമുണ്ടായിരുന്ന യുഡിഎഫ് കണ്വീനര് പി.പി. തങ്കച്ചനും അറിയിച്ചു. മുഖ്യമന്ത്രി പുറത്തിറങ്ങിയ ഉടന് ആരോഗ്യ മന്ത്രി വി.എസ്. ശിവകുമാര് ചെന്നിത്തലയെ കണ്ട് ചര്ച്ച നടത്തി.
https://www.facebook.com/Malayalivartha