മലപ്പുറം ജില്ലയില്‍ ശക്തമായ പ്രതിരോധ പ്രവര്‍ത്തനങ്ങള്‍ തുടരുമ്പോഴും രണ്ടുപേര്‍ക്കും കൂടി പുതുതായി കോവിഡ് 19 സ്ഥിരീകരിച്ചു.

നിസാമുദ്ദീനില്‍ നിന്ന് തബ്ലീഗ് സമ്മേളനം കഴിഞ്ഞ് ജില്ലയില്‍ എത്തിയരണ്ടു പേര്‍ക്കാണ് പുതുതായി രോഗം സ്ഥിരീകരിച്ചത്.

ഇവരോടൊപ്പം ഇരുവരുടേയും കുടുംബത്തെയും മഞ്ചേരി മെഡിക്കല്‍ കോളജ് ആശുപത്രിയില്‍ ഐസോലേഷനില്‍ പ്രവേശിപ്പിച്ചു.

ചെമ്മാട് ബൈപ്പാസ് റോഡ് സ്വദേശി 33-കാരനും വേങ്ങര കൂരിയാട് സ്വദേശി 63-കാരനും ആണ് ഇന്നലെ ജില്ലയില്‍ പുതുതായി രോഗം സ്ഥിരീകരിച്ചത്. രണ്ടുപേരും മാര്‍ച്ച് 11. 12 തീയതികളില്‍ ഡല്‍ഹി നിസാമുദ്ദീന്‍ മത സമ്മേളനത്തില്‍ പങ്കെടുത്ത് ജില്ലയില്‍ എത്തിയവരാണ്. ഫെബ്രുവരി നാലിനാണ് പതിനാലംഗ സംഘം വീടുകളില്‍ നിന്ന് പുറപ്പെട്ടത്. ഫെബ്രുവരി ഏഴിന് നിസാമുദ്ദീനിലെത്തി.

മാര്‍ച്ച് 11-നും 12-നുമുള്ള സമ്മേളനത്തില്‍ പങ്കെടുത്ത ശേഷം മാര്‍ച്ച് 13-ന് കേരള സമ്പര്‍ക് ക്രാന്തി തീവണ്ടിയില്‍ സ്ലീപ്പര്‍ ക്ലാസ് കമ്പാര്‍ട്ട്മെന്റില്‍ യാത്ര ചെയ്താണ് മാര്‍ച്ച് 15-ന് കോഴിക്കോടെത്തിയത്.

കോഴിക്കോട് നിന്ന് സംഘത്തിലെ രണ്ടു പേര്‍ വീടുകളിലേക്കു മടങ്ങി. പത്തു പേര്‍ കണ്ണൂര്‍ ആലപ്പുഴ എക്സിക്യൂട്ടീവ് എക്സ്പ്രസ് തീവണ്ടിയില്‍ രാവിലെ 7.40-ന് പരപ്പനങ്ങാടിയിലെത്തി. അവിടെ നിന്ന് ക്രൂയിസര്‍ വാഹനത്തില്‍ മലപ്പുറത്തേക്കു വന്നു. തുടര്‍ന്ന് മസ്ജിദുല്‍ ഹുദാ പള്ളിയില്‍ തങ്ങി. മാര്‍ച്ച് 16-ന് രാവിലെ 10-ന് വ്യത്യസ്ത സ്വകാര്യബസ്സുകളില്‍ രണ്ടുപേരും വീട്ടിലേക്ക് മടങ്ങി.

നിസാമുദ്ദീനില്‍ സമ്മേളനത്തിന് ശേഷം എത്തിയവരാണ് എന്നറിഞ്ഞതോടെ ആരോഗ്യപ്രവര്‍ത്തകര്‍ ഇവരെ തേടി വീട്ടിലെത്തി. പിന്നീട് ആരോഗ്യപ്രവര്‍ത്തകര്‍ നിര്‍ബന്ധിച്ച് സ്രവ പരിശോധന നടത്തി. വിടുകളില്‍ നിരീക്ഷണത്തില്‍ കഴിയുബോഴാണ് ഇവര്‍ക്ക് രോഗം സ്ഥിരീകരിച്ചതായി ഫലം വന്നത്. തുടര്‍ന്ന് മഞ്ചേരി മെഡിക്കല്‍ കോളേജ് ആശുപത്രിയിലേക്ക് മാറ്റി. പിന്നീട് ഇരുവരുടേയും ഭാര്യ, മക്കള്‍, മരുമക്കള്‍ തുടങ്ങിയ കുടുംബാംഗങ്ങളെയെല്ലാം മഞ്ചേരി മെഡിക്കല്‍ കോളേജ് ഐസൊലേഷന്‍ വാര്‍ഡില്‍ പ്രവേശിപ്പിക്കയായിരുന്നു.

ഇവര്‍ ജില്ലയിലെത്തിയ ശേഷം നാട്ടില്‍ പല ആളുകളുമായി സമ്പര്‍ക്കം പുലര്‍ത്തിയിട്ടുണ്ട് . വേങ്ങര സ്വദേശി പള്ളിയിലും സന്ദര്‍ശനം നടത്തിയിട്ടുണ്ട്.

ഇവരുമായി സമ്പര്‍ക്കം പുലര്‍ത്തിയ ആളുകള്‍ എത്രയും പെട്ടെന്ന് ജില്ലാ കണ്‍ട്രോള്‍ റൂമുമായി ബന്ധപ്പെടണമെന്ന് ജില്ലാ കലക്ടര്‍ ജാഫര്‍ മാലിക് അറിയിച്ചു.