കഥയറിയാതെ ആട്ടം കാണുകയാണ് മുല്ലപ്പള്ളി... പ്രവാസി മലയാളികളുമായി നടത്തിയ കൂടിക്കാഴ്ചയെ വിമര്ശിച്ച മുല്ലപ്പള്ളിക്ക് മറുപടി നല്കി മുഖ്യമന്ത്രി
കെ.പി.സി.സി അധ്യക്ഷന് മുല്ലപ്പള്ളി രാമചന്ദ്രനെതിരെ രൂക്ഷ വിമര്ശനമുയര്ത്തി മുഖ്യമന്ത്രി പിണറായി വിജയന്. കോണ്ഗ്രസ് എന്ന പാര്ട്ടിയുടെ സ്വരമാണ് അദ്ദേഹത്തിലൂടെ പുറത്തുവരുന്നത്. കഥയറിയാതെ ആട്ടം കാണുകയാണ് മുല്ലപ്പള്ളി ചെയ്യുന്നത്.
കാലം എത്ര മാറിയാലും ചിലയാളുകള് മാറില്ലെന്നതിന് തെളിവാണ് മുല്ലപ്പള്ളിയുടെ പ്രസ്താവനയെന്ന് മുഖ്യമന്ത്രി പറഞ്ഞു. പ്രവാസി മലയാളികളുമായി മുഖ്യമന്ത്രി നടത്തിയ കൂടിക്കാഴ്ചയെ മുല്ലപ്പള്ളി വിമര്ശിച്ചത് ചൂണ്ടിക്കാട്ടിയപ്പോഴായിരുന്നു മുഖ്യമന്ത്രിയുടെ പ്രതികരണം.
രാജ്യത്തിന് പുറത്തെ മലയാളി സമൂഹത്തിലെ സാധാരണക്കാരും പ്രമുഖരും സംഘടന നേതാക്കളും ബിസിനസുകാരുമെല്ലാം വിഡിയോ കോണ്ഫറന്സില് പങ്കെടുത്തിരുന്നു. ആദ്യ ഘട്ടത്തില് അതത് പ്രദേശത്ത് ഇടപെടണമെന്ന് ആവശ്യപ്പെട്ട് ലോകകേരള സഭ അംഗങ്ങള്ക്ക് കത്തയച്ചിരുന്നു. പ്രവാസികളുടെ പ്രശ്നങ്ങള് കേള്ക്കാന് നോര്ക്കയില് പ്രത്യേക സൗകര്യം ഏര്പ്പെടുത്തി. ഇതിന് രണ്ടിനും ശേഷമാണ് കൂടിക്കാഴ്ച നടത്തിയത്.
20 രാജ്യങ്ങളിലെ 40ഓളം പേരാണ് പങ്കെടുത്തത്. ഇക്കൂട്ടത്തില് എം.എ യൂസഫലി, രവി പിള്ള, ആസാദ് മൂപ്പന് തുടങ്ങിയ ശതകോടീശ്വരന്മാരും ഉണ്ടായിരുന്നു. വിവിധ മേഖലയില്നിന്നുള്ളവരും പങ്കെടുത്തു. ഇവരില് ആരാണ് നമുക്ക് പറ്റാത്തവരായുള്ളത് എന്ന കാര്യം മുല്ലപ്പള്ളി തന്നെ വ്യക്തമാക്കണമെന്ന് മുഖ്യമന്ത്രി പറഞ്ഞു.
പ്രവാസലോകത്ത് കേരളീയര്ക്കായി ഇടപെടുന്നവരാണ് പങ്കെടുത്തവരെല്ലാം. അതിനെ പോലും അസഹിഷ്ണുതയോടെ കണ്ട് കുശുമ്ബ് പറയുന്നതിന് എന്ത് മറുപടിയാണ് പറയുക. ഇടുങ്ങിയ ചിന്തകള് ഇത്തരം ദുരന്തമുഖത്തെങ്കിലും ഒഴിവാക്കണം. പ്രവാസികളോടുള്ള നിലപാടില് സര്ക്കാര് ഒരു വിട്ടുവീഴ്ചയും വരുത്തില്ലെന്നും മുഖ്യമന്ത്രി പറഞ്ഞു.
https://www.facebook.com/Malayalivartha