വാഹന വര്ക്ഷോപ്പുകള്, മൊബൈല് ഫോണ് വില്പനയും റീചാര്ജിങ്ങിനുമുള്ള കടകള് തുറക്കാം. പക്ഷേ ഈ ദിവസങ്ങളില് മാത്രം...
കോവിഡ് പ്രതിരോധത്തിനായി രാജ്യമെങ്ങും നടപ്പാക്കിയ ലോക്ക് ഡൗണ് പിന്വലിക്കുന്നത് സംബന്ധിച്ച് ഇനിയും വ്യക്തത വന്നിട്ടില്ല. കേന്ദ്രസര്ക്കാരിന്റെ നിലപാട് അറിഞ്ഞിട്ട് വിഷയത്തില് അന്തിമ തീരുമാനമെടുക്കും എന്നാണ് സംസ്ഥാന സര്ക്കാരിന്റെ നിലപാട്. അതിനിടെ, സംസ്ഥാനത്ത് ലോക്ഡൗണില് നേരിയ ഇളവുകള് മുഖ്യമന്ത്രി പിണറായി വിജയന് പ്രഖ്യാപിച്ചു. വാഹന വര്ക്ഷോപ്പുകള് തുറക്കാന് അനുമതി നല്കി. മൊബൈല് ഫോണ് വില്പനയും റീചാര്ജിങ്ങിനുമുള്ള കടകള് തുറക്കാം അനുവദിച്ചിട്ടുണ്ട്. സ്പെയര് പാര്ട്സ് കടകളും ആഴ്ചയില് രണ്ടു ദിവസം തുറക്കാമെന്നു മുഖ്യമന്ത്രി വാര്ത്താ സമ്മേളനത്തില് അറിയിച്ചു. ഇതില് മൊബൈല് ഷോപ്പുകള് ഞായറാഴ്ചകളില് തുറന്ന് പ്രവര്ത്തിക്കാം. വര്ക്ക്ഷോപ്പുകള്ക്ക് ആഴ്ചയില് രണ്ട് ദിവസം തുറക്കാം. ഞായര്, വ്യാഴം ദിവസങ്ങളിലാണ് വര്ക്ക് ഷോപ്പുകള്ക്ക് തുറക്കാന് അനുവാദമുള്ളത്. ആ ദിവസങ്ങളില് സ്പെയര് പാര്ട്സ് കടകള് കൂടി തുറക്കാന് അനുവദിക്കുമെന്ന് അദ്ദേഹം വാര്ത്താസമ്മേളനത്തില് പറഞ്ഞു.
ഇതിനൊപ്പം കംപ്യൂട്ടര്, ഫാന്, എയര്കണ്ടീഷനറുകള് ഇവ വില്പ്പന നടത്തുന്ന കടകള് ഒരു ദിവസം തുറക്കുന്ന കാര്യവും പരിഗണിക്കുന്നുണ്ട്. അതോടൊപ്പം രജിസ്ട്രേഡ് ഇലക്ട്രീഷര്മാര്ക്ക് തകരാറുകള് നന്നാക്കാനായി വീടുകകളില് പോകാന് അനുമതി നല്കും. ഫ്ളാറ്റുകളില് നിലവിലുള്ള കേന്ദ്രീകൃത സംവിധാനത്തിന് തകരാര് സംഭവിച്ചാല് നന്നാക്കാന് പോകുന്നവര്ക്കും അനുമതി നല്കുമെന്നും മുഖ്യമന്ത്രി അറിയിച്ചു.
അതുപോലെ, കര്ഷകര്ക്ക് ഉത്പന്നങ്ങള് വില്ക്കാന് ബുദ്ധിമുട്ടുണ്ട് നേരിടുന്നത് പരിഹരിക്കാന് ഇടപെടുമെന്നും മുഖ്യമന്ത്രി വ്യക്തമാക്കി. വിഷു, ഈസ്റ്റര് വിപണി സജീവമാകേണ്ട കാലമാണിത്. വിപണി കിട്ടാതിരിക്കുന്നത് കര്ഷകരെ ബാധിക്കും. അതുകൊണ്ട് കൃഷിവകുപ്പ് കര്ഷക വിപണി വഴി പച്ചക്കറി ശേഖരിക്കും. കര്ഷകര് ഇത് ഉപയോഗിക്കണം. പഴം, പച്ചക്കറി വ്യാപാരികള് വില്ക്കുന്ന ഉത്പന്നങ്ങളില് പ്രാദേശികമായി ലഭ്യമാകുന്നത് കേരളത്തില്നിന്ന് തന്നെ ശേഖരിക്കണം. രോഗികളെ കടത്തിവിടുമെന്ന് കേന്ദ്രവും കര്ണാടകയും സമ്മതിച്ചു. ഉത്തരവും ഇറങ്ങിയിട്ടുണ്ടെന്നും മുഖ്യമന്ത്രി വ്യക്തമാക്കി.
അതിനിടെ, കേരളത്തില് ഇന്ന് 9 പേര്ക്ക് കോവിഡ് സ്ഥിരീകരിച്ചു. കാസര്കോട് 4, കണ്ണൂര് 3, കൊല്ലം 1, മലപ്പുറം 1 എന്നിങ്ങനെയാണ് കോവിഡ് സ്ഥിരീകരിച്ചത്. ഇവരില് വിദേശത്തു നിന്നു വന്ന 4 പേരും നിസാമുദ്ദീന് സമ്മേളനത്തില് പങ്കെടുത്ത 2 പേരും ഉള്പ്പെടുന്നു. സമ്പര്ക്കം മൂലം രോഗം ബാധിച്ചവര് 3 ആണ്. 12 പേരുടെ പരിശോധനാ ഫലം നെഗറ്റീവാണ്. കണ്ണൂര് 5, എറണാകുളം 4, തിരുവനന്തപുരം, ആലപ്പുഴ, കാസര്കോട് ഓരോന്നു വീതം. ഇതുവരെ 336 പേര്ക്കാണ് രോഗം ബാധിച്ചത്. അതില് 263 പേര് ചികിത്സയിലാണെന്നും മുഖ്യമന്ത്രി പറഞ്ഞു.
അതേസമയം, ലോക്ഡൗണ് പിന്വലിക്കുന്നതിനുള്ള വിശദമായ മാര്ഗരേഖ സംസ്ഥാന സര്ക്കാരിന്റെ മുമ്പാക കര്മസമിതി സമര്പ്പിച്ചു. ഏപ്രില് 15 മുതല് മൂന്നു ഘട്ടമായി ലോക്ഡൗണ് പിന്വലിക്കണമെന്നാണു സമിതിയുടെ ശുപാര്ശ. ഓരോ ദിവസത്തെയും കേസുകളും വ്യാപന രീതികളുമാണ് അടിസ്ഥാന മാനദണ്ഡം. രോഗവ്യാപനം കൂടിയാല് ഉടന് നിയന്ത്രണം കര്ശനമാക്കുമെന്നത് ജനത്തെ അറിയിക്കണമെന്നും സമിതി ശുപാര്ശ ചെയ്യുന്നു. വിദഗ്ധ സമിതി നിര്ദേശം മന്ത്രിസഭാ യോഗം ബുധനാഴ്ച ചര്ച്ച ചെയ്യും.
അതിനിടെ, കോവിഡ് 19-മായി ബന്ധപ്പെട്ട അടിയന്തര സേവനങ്ങള് ജനങ്ങള്ക്കു ലഭ്യമാക്കുകയും ക്ഷേമപ്രവര്ത്തനങ്ങളില് സുതാര്യത ഉറപ്പുവരുത്തുകയും ചെയ്യുന്നതിനായി സമഗ്ര വിവരങ്ങള് ഉള്പ്പെടുന്ന പോര്ട്ടല് സജ്ജമായിട്ടുണ്ട്. കോവിഡ് 19 രോഗബാധിതര്ക്കും നിരീക്ഷണത്തില് കഴിയുന്നവര്ക്കുമുള്ള ചികിത്സയും പിന്തുണയുമായി ബന്ധപ്പെട്ടാണ് പോര്ട്ടല് രൂപപ്പെടുത്തിയിരിക്കുന്നത്. കേന്ദ്ര ഇലക്ട്രോണിക്സ്, വിവരസാങ്കേതികവിദ്യാ മന്ത്രാലയത്തിനു കീഴിലുള്ള നാഷണല് ഇന്ഫോമാറ്റിക്സ് സെന്ററിന്റെ കേരള ഘടകമാണ് പോര്ട്ടല് രൂപപ്പെടുത്തിയിരിക്കുന്നത്. സംസ്ഥാനത്തെ പതിനാല് ജില്ലകളിലും ലഭ്യമായിത്തുടങ്ങി.
https://www.facebook.com/Malayalivartha