ലോക് ഡൗണിനിടെ തടസ്സം നേരിട്ട, മാംഗോ സിറ്റിയില്‍ നിന്നും ഉത്തരേന്ത്യയിലേക്കും ഗള്‍ഫിലേക്കുമുള്ള മാങ്ങയുടെ കയറ്റുമതി തുടങ്ങി. അവശ്യസാധനങ്ങള്‍ എന്ന, കൃഷിവകുപ്പു നല്‍കുന്ന സര്‍ട്ടിഫിക്കറ്റ് ഉപയോഗിച്ചാണ് ചരക്കുലോറികളില്‍് ഉത്തരേന്ത്യന്‍ വിപണികളിലേക്കു മാങ്ങ കയറ്റി അയയ്ക്കുന്നത്. ഡല്‍ഹി, മുംബൈ, ബെംഗളൂരു, ചെന്നൈ, അഹമ്മദാബാദ്, ഇന്‍ഡോര്‍ നഗരങ്ങളിലെ വിപണികളില്‍ കഴിഞ്ഞ ദിവസങ്ങളില്‍ മാങ്ങ എത്തിച്ചു.

വിപണികള്‍ അവിടെ തുറക്കുന്ന ഇടവേളകള്‍ കണക്കാക്കിയാണ് കയറ്റുമതി. മറ്റു സംസ്ഥാനങ്ങളിലെ പരിശോധനകളില്‍ വാഹനം തടയുന്നുണ്ടെങ്കിലും കൃഷിവകുപ്പിന്റെ സര്‍ട്ടിഫിക്കറ്റ് കാണിക്കുമ്പോള്‍ പോകാന്‍ അനുവദിക്കുന്നുണ്ട്. അഹമ്മദാബാദ് വിപണി തുറന്ന സമയത്ത് ഇടവിട്ട ദിവസങ്ങളിലായി 75 - 100 ടണ്‍ വീതം മുതലമട മാങ്ങ വിപണിയിലെത്തിച്ചിരുന്നു.

മുംബൈ, ചെന്നൈ, ബെംഗളൂരു എന്നിവിടങ്ങളിലേക്കും 10 ടണ്‍ വീതം അയച്ചിരുന്നു. എന്നാല്‍, കോവിഡ് ബാധിതരുടെ എണ്ണത്തിലുണ്ടായ വര്‍ധനയെ തുടര്‍ന്നു മുംബൈ, അഹമ്മദാബാദ്, ഇന്‍ഡോര്‍ വിപണികള്‍ അടച്ചിരിക്കുകയാണ്. ഡല്‍ഹി വിപണി തുറക്കുമെന്ന പ്രതീക്ഷയില്‍ 20 ടണ്ണിലധികം അയച്ചിട്ടുണ്ട്. ബോക്‌സുകളിലാക്കി ലോറിയില്‍ അയച്ച ലോഡ് ഡല്‍ഹിയിലെത്താന്‍ നാലു ദിവസമെടുക്കും.

ആഴ്ചയില്‍ രണ്ടു ദിവസമെങ്കിലും വിപണി തുറക്കും എന്നു പ്രതീക്ഷയുള്ളതിനാല്‍ അതു പ്രകാരമാകും വീണ്ടും അയയ്ക്കുക. ബെംഗളൂരു വിമാനത്താവളം വഴി ഗള്‍ഫ് രാജ്യങ്ങളിലേക്കും കയറ്റുമതി ആരംഭിച്ചിട്ടുണ്ട്. അല്‍ഫോണ്‍സ, ബങ്കനപ്പള്ളി, സിന്ദൂരം എന്നിവയാണു പ്രധാനമായും രാജ്യാന്തര വിപണിയിലേക്കു കയറ്റി അയയ്ക്കുന്നത്. ഹോര്‍ട്ടികോര്‍പ്പിന്റെ സംഭരണത്തിനു പുറമേയാണിത്.