സംസ്ഥാനത്ത് ആശ്വാസമായി ഏറ്റവും കൂടുതൽ പേർക്ക് കൊവിഡ് സ്ഥിരീകരിച്ച കാസർകോട് ജില്ലയിൽനിന്ന് ഇന്ന് 16 പേർ രോഗം ഭേദമായി ആശുപത്രി വിടുമെന്ന് റിപ്പോർട്ട്. കാസർകോട് ജില്ലയിലെ കാഞ്ഞങ്ങാട് ജില്ലാ ആശുപത്രിയിൽ നിന്നുള്ള 10 പേരും, കാസർകോട് ജനറൽ ആശുപത്രിയിലെ 2 പേരും പരിയാരത്ത് ചികിത്സയിലുള്ള 4 പേരുമാണ് ഇന്ന് ഡിസ്ചാർജ് ആകുന്നത്. അതോടൊപ്പം തന്നെ പരിയാരത്ത് നിന്ന് ആശുപത്രി വിടുന്നവരിൽ ഒരു കുടുംബത്തിലെ മൂന്ന് പേരും ഉൾപ്പെടുന്നു. എല്ലാവർക്കും രോഗം പൂർണമായും ഭേദമായിട്ടുണ്ട് എന്നാണ് അധികൃതർ വ്യക്തമാക്കുന്നത്. ഇവരുടെ ടെസ്റ്റ് റിസൽറ്റുകളും നെഗറ്റീവാണ്.

ആയതിനാൽ തന്നെ കാസർകോട് ജില്ലയിൽ കൊറോണ പടരുന്നത് നിയന്ത്രണത്തിൽ കൊണ്ടുവരാൻ ഭാഗീകമായെങ്കിലും സാധിച്ചിട്ടുണ്ട്. ഇന്നലെ ജില്ലയിൽ ആർക്കും രോഗം സ്ഥിരീകരിച്ചിട്ടില്ല എന്നതും ആശ്വാസകരമായ വാർത്ത തന്നെയാണ്. അത് കേരളത്തിന്റെ മാത്രമല്ല ഇന്ത്യയുടെ പോലും ഭാഗിക ആശ്വാസമായി മാറുകയാണ്.

അതോടൊപ്പം തന്നെ സംസ്ഥാനത്ത് ഇന്നലെ രണ്ട് പേർക്ക് മാത്രമാണ് രോഗം സ്ഥിരീകരിച്ചിരുന്നത്. എന്നാൽ സ്ഥിരീകരിക്കുന്ന കേസുകളേക്കാളേറെ പേർ രോഗം ഭേദമായി ആശുപത്രിവിടുന്നത് കൊവിഡ് പ്രതിരോധ രംഗത്ത് വലിയ പ്രതീക്ഷയുടെ നാളമാണ് നൽകുന്നത്. റിപ്പോർട്ടുകളുടെ അടിസ്ഥാനത്തിൽ രോഗവ്യാപനം ഈ നിലയിൽ വരും ദിവസങ്ങളിലും കുറയുകയും അവസാനിക്കുകയും ചെയ്യുമെന്ന പ്രതീക്ഷയാണ് ആരോഗ്യ പ്രവർത്തകരും പങ്കുവയ്ക്കുന്നത്.

അതോടൊപ്പം തന്നെ ഇടുക്കി ജില്ലയിലെ അവസാന കൊവിഡ് രോഗിയെയും ഇന്ന് ഡിസ്ചാർജ് ചെയ്തു എന്ന ആശ്വാസ വാർത്തയും ലഭ്യമാണ്. തൊടുപുഴ കുമ്പൻകല്ല് സ്വദേശി യെയാണ് ഡിസ്ചാർജ് ചെയ്തത് എന്നാണ് ലഭ്യമാകുന്ന വിവരം. ഇതോടെ ഇടുക്കിയിൽ രോഗം സ്ഥിരീകരിച്ച 10 പേരും ഭേദമായി ആശുപത്രി വിടുകയുണ്ടായി.