കോവിഡിന്റെ പശ്ചാത്തലത്തില്‍ രാജ്യത്ത് പ്രഖ്യാപിച്ചിട്ടുള്ള ലോക്ഡൗണ്‍ സംബന്ധിച്ച കാര്യത്തില്‍ തീരുമാനമാകാതെ മന്ത്രിസഭായോഗം പിരിഞ്ഞു.

കേരളത്തില്‍ സ്ഥിതി നിയന്ത്രിതമായതോടെ ചെറിയ ഇളവുകള്‍ കൊണ്ടുവരാന്‍ നിര്‍ദേശം ഉയര്‍ന്നിരുന്നെങ്കിലും കേന്ദ്ര സര്‍ക്കാരിന്റെ തീരുമാനം അനുസരിച്ച്‌ മതി കാര്യങ്ങള്‍ എന്നാണ് ഒടുവിലത്തെ തീരുമാനം. മറ്റന്നാള്‍ വീണ്ടും മന്ത്രിസഭായോഗം ചേരും. ഇന്നോ നാളെയോ കേന്ദ്രസര്‍ക്കാരിന്റെ തീരുമാനം വരാനിരിക്കെ അത് അനുസരിച്ച്‌ ചര്‍ച്ച ചെയ്ത് തീരുമാനം എടുക്കാനാണ് ഉദ്ദേശം. കോവിഡിന്റെ സ്ഥിതി ഇപ്പോള്‍ നിയന്ത്രണ വിധേയമാണ്.

രോഗികള്‍ ഏറെയുണ്ടായ കാസര്‍ഗോഡും കാര്യങ്ങള്‍ മെച്ചപ്പെട്ടു. ഇതോടെയാണ് ഇളവുകള്‍ വേണമെന്ന ആവശ്യവും ഉയര്‍ന്നിരിക്കുന്നത്. സംസ്ഥാനത്ത് ഹോട്ട് സ്‌പോട്ട് അല്ലാത്ത മേഖലകളില്‍ ഇളവുകള്‍ വേണമെന്നാണ് സര്‍ക്കാരിന്റെ നിലപാട്. കടകള്‍ നിയന്ത്രിതമായി തുറക്കുകയും നമ്ബറുകളില്‍ ഒറ്റ, ഇരട്ട അക്കങ്ങളുടെ മാനദണ്ഡം പുലര്‍ത്തി വാഹനങ്ങള്‍ നിരത്തില്‍ ഇറങ്ങാന്‍ അനുവദിക്കുക തുടങ്ങിയ കാര്യങ്ങളെല്ലാം ആലോചിച്ചിരുന്നു.

സംസ്ഥാനത്ത് സ്ഥിതിഗതികള്‍ നിയന്ത്രണ വിധേയമാണെന്നും ആശ്വാസകരമാണെന്നുമാണ് മന്ത്രിസഭാ യോഗത്തില്‍ പൊതുവെയുണ്ടായ വിലയിരുത്തല്‍. എന്നിരുന്നാലും അയല്‍ സംസ്ഥാനങ്ങളില്‍ പോസിറ്റീവ് കേസുകള്‍ വര്‍ദ്ധിക്കുന്ന സാഹചര്യത്തില്‍ കേരളം ജാഗ്രതയോടെ മുന്നോട്ട് പോകണമെന്നും തീരുമാനമായി. ചൈനയില്‍ അടക്കം വൈറസ് പ്രത്യക്ഷപ്പെട്ട സാഹചര്യത്തില്‍ യാത്ര നിയന്ത്രണങ്ങള്‍ ഉള്‍പ്പെടെയുള്ളവ തുടരേണ്ടതുണ്ടെന്നാണ് വിലയിരുത്തല്‍.

പ്രത്യേകിച്ച്‌ ജില്ലകള്‍ കടന്നുള്ള യാത്ര ഒരു തരത്തിലും അനുവദിക്കില്ലെന്നും യോഗത്തില്‍ തീരുമാനമായി. സംസ്ഥാനത്തെ കൊറോണ വൈറസുമായി ബന്ധപ്പെട്ട അവലോകനം ഇന്ന് ചേര്‍ന്ന മന്ത്രിസഭാ യോഗത്തില്‍ നടന്നു. ഒരോ ജില്ലയുടെയും ചുമതലയുള്ള മന്ത്രിമാര്‍ ജില്ലയിലെ സ്ഥിതിഗതികള്‍ വിവരിച്ചു. അതേസമയം സംസ്ഥാനത്ത് രോഗബാധ കുറഞ്ഞതോടെ നിരത്തിലെത്തുന്നവരുടെ എണ്ണവും കൂടുന്നുണ്ട്. സംസ്ഥാനത്തെ വിവിധ നഗരങ്ങളില്‍ വാഹനങ്ങള്‍ നിരത്തില്‍ എത്തുന്നുണ്ട്. പോലീസ് പിടിച്ചെടുത്ത വാഹനങ്ങള്‍ ഇന്ന് മുതല്‍ വിട്ടു കൊടുക്കാന്‍ തുടങ്ങിയിട്ടുണ്ട്. സത്യവാങ്മൂലം വാങ്ങി പിഴ ഈടാക്കാതെയാണ് വാഹനങ്ങള്‍ തിരിച്ചു കൊടുക്കുന്നത്. പോലീസ് കേസെടുക്കുന്നില്ല എന്നായതോടെയാണ് നാട്ടുകാര്‍ വാഹനവുമായി നിരത്തില്‍ ഇറങ്ങാന്‍ തുടങ്ങിയിരിക്കുന്നത്.