കേരളത്തെ നടുക്കിയ കൊലപാതകമായിരുന്നു അധ്യാപികയായ രൂപശ്രീയുടെ മരണം. മഞ്ചേശ്വരം സ്വദേശിനിയും അധ്യാപികയുമായ രൂപശ്രീയെ കൊലപ്പെടുത്തിയ കേസില്‍ ക്രൈംബ്രാഞ്ച് കുറ്റപത്രം സമര്‍പ്പിച്ചു. കേസില്‍ പ്രതികളെ അറസ്റ്റ് ചെയ്ത് 81 ദിവസത്തിനുശേഷമാണ് 1700 പേജുളള കുറ്റപത്രം അന്വേഷണ സംഘം കാസര്‍കോട് ജുഡീഷ്യല്‍ മജിസ്ട്രേറ്റ് കോടതിയില്‍ സമര്‍പ്പിച്ചത്. ആദ്യം അധ്യാപികയുടെ മരണം കടലില്‍ മുങ്ങിയാണെന്ന വാദം പൊളിക്കാനുള്ള എല്ലാ തെളിവുകളും ശേഖരിക്കാന്‍ അന്വേഷണസംഘത്തിന് കഴിഞ്ഞത് പ്രോസിക്യൂഷന് നേട്ടമാകുന്നു.

കേസില്‍ പ്രതി വെങ്കിട്ടരമണയും നിരഞ്ജനെയും കൊണ്ട് കൊലപാതകവും തെളിവ് നശിപ്പിക്കലും പൂര്‍ണ്ണമായും പുനര്‍ചിത്രീകരിച്ചാണ് അന്വേഷണ സംഘം തെളിവ് ശേഖരിച്ചു കുറ്റപത്രം തയ്യാറാക്കിയത്. രൂപശ്രീ ടീച്ചറുമായുള്ള അടുപ്പം മുതലെടുത്താണ് പ്രതി ടീച്ചറെ വീട്ടിലേക്കു വിളിച്ചു വരുത്തിയത്. സഹായി നിരഞ്ജനും ഒപ്പമുണ്ടായിരുന്നു. വീട്ടിലെത്തി ടീച്ചറെ പീഡിപ്പിച്ച ശേഷമാണ് കൊലപ്പെടുത്തിയതെന്നും പൊലീസ് കണ്ടെത്തിയിട്ടുണ്ട്.

വിവസ്ത്രയായ ടീച്ചറെ വലിയ വീപ്പയില്‍ മുക്കി കൊന്നതാണ് ഏറ്റവും വലിയ തെളിവ് . രണ്ടു ദിവസത്തിന് ശേഷം മഞ്ചേശ്വരം കടപ്പുറത്ത നിന്ന് കണ്ടെത്തിയ രൂപശ്രീയുടെ വയറ്റില്‍ നിന്ന് പോസ്‌റുമോര്‍ട്ടത്തില്‍ ലഭിച്ച വെള്ളം കിണര്‍ വെള്ളമായിരുന്നു. അതോടെ കടലില്‍ മുങ്ങിയാണ് മരണമെന്ന വാദം ആദ്യമേ പൊളിഞ്ഞു. വെങ്കിട്ട രമനയുടെ വീട്ടിലെ വീപ്പയില്‍ നിന്ന് കണ്ടെടുത്ത വെള്ളവും പോസ്‌റുമോര്‍ട്ടത്തില്‍ ലഭിച്ച വെള്ളവും ഒന്നായതാണ് കൊലപാതകത്തിലെ പ്രധാന തെളിവ്.

കര്‍ണാടകയുടെ വിവിധ സ്ഥലങ്ങളില്‍ മൃതദേഹം കളയാന്‍ പ്രതികള്‍ നടത്തിയ കാര്‍ യാത്രയും അതിന്റെ സിസിടിവി ദൃശ്യങ്ങളും പൊലീസിന് കിട്ടി. ഇതോടെയാണ് പ്രതികള്‍ പൂര്‍ണ്ണമായും കുടുങ്ങിയത്.