ലോക്ക്ഡൗണിനെ തുടര്‍ന്ന് കേരളത്തില്‍ കുടുങ്ങിയ യുകെ പൗരന്‍മാരെ നാട്ടിലെത്തിക്കുന്നതിനായി ബ്രിട്ടീഷ് എയര്‍വെയ്സിന്റെ വിമാനം കേരളത്തില്‍ ലാന്‍ഡ് ചെയ്തു. ഇതാദ്യമായാണ് ഒരു ബ്രിട്ടീഷ് എയര്‍വെയ്സ് വിമാനം കേരളത്തില്‍ ലാന്‍ഡ് ചെയ്യുന്നത്. ബ്രിട്ടീഷ് സര്‍ക്കാരിന്റെ പ്രത്യേക നിര്‍ദേശത്തിലാണ് വിമാനമെത്തിയത്. വൈകീട്ട് 5.25ന് തിരുവനന്തപുരം വിമാനത്താവളത്തില്‍ എത്തിയ വിമാനം ഏഴരയോടെ 110 യാത്രക്കാരുമായി കൊച്ചിയിലെത്തി.

തുടര്‍ന്ന് ഇവിടെ നിന്ന് 158 പേരേയും കൂട്ടി ആകെ 268 യാത്രക്കാരുമായാണ് വിമാനം യുകെയിലേക്കു പറന്നത്. ബഹ്റൈന്‍ വഴിയാണ് മടക്കം. കേരളത്തിലും തമിഴ്നാട്ടിലും ചികിത്സക്കും വിനോദ സഞ്ചാരത്തിനുമായി എത്തിയവരാണു യാത്രക്കാരെല്ലാവരും. ആരോഗ്യ വകുപ്പിന്റെ പ്രോട്ടോകോള്‍ പ്രകാരം നിശ്ചിത ദിവസം ക്വാറന്റൈനില്‍ കഴിഞ്ഞ ശേഷമാണ് ഇവര്‍ മടങ്ങാനായി വിമാനത്താവളത്തിലെത്തിയത്.

ബ്രിട്ടീഷ് വിമാനത്തില്‍ പോയവരില്‍ ഏഴ് പേര്‍ കോവിഡ് രോഗ മുക്തി നേടിയ ശേഷം നിശ്ചിത ദിവസങ്ങള്‍ നിരീക്ഷണത്തിലും കഴിഞ്ഞവരാണ്. നേരത്തെ മൂന്നാറിലെ റിസോര്‍ട്ടില്‍ നിന്ന് മുങ്ങി വിമാനത്താവളത്തില്‍ പിടിയിലായ ബ്രിയാന്‍ നെയിലും ഭാര്യയും സംഘത്തിലുണ്ട്. കേരളത്തില്‍ കുടുങ്ങിയ ബ്രിട്ടീഷ് പൗരന്‍മാരില്‍ തിരിച്ചു പോകാന്‍ ആഗ്രഹിക്കുന്നവരുടെ വിവരങ്ങള്‍ നേരത്തേ സര്‍ക്കാര്‍ ശേഖരിച്ചിരുന്നു.

തിരുവനന്തപുരത്തും കൊച്ചിയിലും വിവിധ സ്ഥലങ്ങളില്‍ കുടുങ്ങിയവരെ ടൂറിസം വകുപ്പിന്റെ നേതൃത്വത്തില്‍ പ്രത്യേക വാഹനങ്ങളില്‍ വിമാനത്താവളങ്ങളിലേക്കു എത്തിക്കുകയായിരുന്നു. കേരളത്തിലേക്കു ബ്രിട്ടീഷ് എയര്‍വെയ്സിന് നിലവില്‍ സര്‍വീസുകളില്ല. യൂറോപ്യന്‍ സെക്ടറിലേക്കു വിമാന സര്‍വീസ് ആരംഭിക്കണമെന്ന ആവശ്യത്തിന് ഏറെ പഴക്കമുണ്ട്. കേരളത്തില്‍ നിന്ന് യൂറോപ്യന്‍ സെഗ്‍മെന്റിലേക്കു നേരിട്ട് സര്‍വീസ് നടത്തുമ്ബോള്‍ ശരാശരി 10 മണിക്കൂറെങ്കിലും പറക്കേണ്ടതുണ്ട്.

ഇതുപോലെയുള്ള ലോങ് ട്രിപ്പുകളില്‍ പൈലറ്റ് മാറ്റം ഉള്‍പ്പടെയുള്ള കാര്യങ്ങളിലെ സാങ്കേതിക തടസം നിലനില്‍ക്കുന്നതിനാലാണ് ഇത്തരം സര്‍വീസ് നടത്തുന്നതിന് വിമാനക്കമ്ബനികള്‍ മുന്നോട്ടു വരാത്തത്. രാജ്യാന്തര സര്‍വീസ് നടത്തുന്ന വിമാനക്കമ്ബനികള്‍ക്ക് കേരളത്തില്‍ ഓപറേറ്റിങ് ഹബ് ഉള്ള സാഹചര്യത്തില്‍ മാത്രമേ ഇത്തരത്തിലുള്ള സാങ്കേതിക തടസങ്ങള്‍ മറികടക്കാനാവൂ.