കെഎം ഷാജി വിവാദ പരാമർശത്തിൽ പ്രതികരണവുമായി എംഎല്‍എ എം സ്വരാജ് രംഗത്ത്. ഒരു ജനത മുഴുവന്‍ അതിജീവനത്തിനായി ചെറുത്തുനില്‍ക്കുമ്ബോള്‍ വൈറസ് ബാധിച്ച മനസുമായി ചിലര്‍ പച്ചക്കള്ളം പ്രചരിക്കുകയാണെന്ന് എംഎല്‍എ എം സ്വരാജ് തുറന്നടിച്ചു. മുഖ്യമന്ത്രിയുടെ ഫണ്ടില്‍ നിന്ന് ദുരിതാശ്വാസനിധിയിലേക്ക് പണം ചെലവഴിച്ചുവെന്ന പരാമര്‍ശത്തില്‍ കെഎം ഷാജി ഉറച്ചുനില്‍ക്കുന്നുണ്ടോ?. എത്ര ചെലവഴിച്ചു എന്നാണ് അയാള്‍ പറയേണ്ടത്. ഇതുമായി ബന്ധപ്പെട്ട് അയാള്‍ പച്ചക്കള്ളം പറയുകയാണെന്ന് എം സ്വരാജ് പറഞ്ഞു.

വിഷം വമിക്കുന്ന സാമൂഹ്യദ്രോഹികളുടെ വാക്കുകള്‍ കേരളം പുച്ഛിച്ചുതള്ളും. ഷാജിയുടെ പരാമര്‍ശത്തിന് മറുപടി പറയേണ്ട സമയം ഇതല്ല. ഇതുമായി ബന്ധപ്പെട്ട് ദുരിതകാലത്തിന് ശേഷം സംസാരിക്കാം. ഇത്തരം ആളുകളെ സംസ്ഥാന ദുരന്തമായി പ്രഖ്യാപിക്കണമെന്ന് എം സ്വരാജ് പറഞ്ഞു.

അതേസമയം ദുരിതാശ്വാസനിധിയില്‍ നിന്ന് പണം ചെലവഴിച്ചതിന്റെ കണക്ക് ചോദിക്കുന്നതില്‍ എന്താണ് തെറ്റെന്നാണ് ഷാജിയുടെ വാദം. ദുരിതാശ്വാസ നിധിയിലേക്ക് കൊടുത്ത പണത്തിന്റെ കണക്ക് ചോദിക്കാന്‍ എല്ലാവര്‍ക്കും അവകാശമുണ്ട്. ഇത് ഒരു കമ്മ്യൂണിസ്റ്റ് രാജ്യമല്ല. ജനാധിപത്യ രാജ്യമാണെന്നും കെ എം ഷാജി വാര്‍ത്താസമ്മേളനത്തില്‍ പറഞ്ഞു. ദുരിതാശ്വാസ നിധിയില്‍ നിന്ന് സിപിഎമ്മിന്റെ ഒരു എംഎല്‍എയ്ക്കും ഒരു ഇടതുനേതാവിനും പണം നല്‍കി. ബാങ്കിലെ കടം തീര്‍ക്കാനാണ് പണം നല്‍കിയത്. ലക്ഷങ്ങളാണ് നല്‍കിയത്. ഗ്രാമീണ റോഡുകള്‍ നന്നാക്കാന്‍ ദുരിതാശ്വാസ നിധിയില്‍ നിന്ന് ആയിരം കോടി രൂപ ചെലവഴിച്ചു. പ്രളയവുമായി ബന്ധമില്ലാത്ത പ്രദേശങ്ങളിലാണ് ഇത് ചെലവഴിച്ചത്. ഷുഹൈബിന്റെയും ഷുക്കൂറിന്റെയും ഉള്‍പ്പെടെയുളള കേസുകള്‍ വാദിക്കാന്‍ ദുരിതാശ്വാസ നിധിയില്‍ നിന്നാണ് പണം ചെലവഴിച്ചത്. 2 കോടി രൂപയാണ് വക്കീല്‍ ഫീസായി നല്‍കിയത്. ഇനി ദുരിതാശ്വാസ നിധിയില്‍ നിന്നല്ല പണം ചെലവഴിച്ചതെങ്കില്‍ ഇതിന്റെ കണക്ക് വെളിപ്പെടുത്താന്‍ എന്താണ് തയ്യാറാവാത്തതെന്നും ഷാജി ചോദിച്ചു.

പ്രളയമല്ല, കോവിഡ് അല്ല, അതിന്റെ അപ്പുറത്തുളള പ്രളയം വന്നാലും ഷുക്കൂറിന്റെയും ശരത്‌ലാലിന്റെയും ഉമ്മമാരുടെ കണ്ണുനീരിന്റേയത്രയും വരില്ല ഒരു പ്രളയവുമെന്നും ഷാജി പറഞ്ഞു. കോവിഡ് കാലത്ത് രാഷ്ട്രീയ പ്രവര്‍ത്തനം നടത്തുന്നതിന് മൊറട്ടോറിയം പ്രഖ്യാപിച്ചിട്ടുണ്ടോ?. മൂക്കിന്റെ തുമ്ബ് വരെ പ്രളയജലം എത്തിയാലും രാഷ്ട്രീയം പറയുമെന്നും ഷാജി പറഞ്ഞു. മുഖ്യമന്ത്രിയുടെ പി ആര്‍ വര്‍ക്കിന് കോടികളാണ് ചെലവഴിച്ചതെന്നും ഷാജി ആഞ്ഞടിച്ചു.