കോവിഡ് -19 ലോക്ക് ഡൗണിൽ ആക്കിയിരിക്കുകയാണ് എല്ലാവരെയും.അതുകൊണ്ടുതന്നെ അത്യാവശ്യ കാര്യങ്ങൾക്കെല്ലാം ഒട്ടു മിക്ക ആളുകളും ആശ്രയിക്കുന്നത് പോലീസുകാരെയാണ്. നമ്മുടെ കേരളം പോലീസാകട്ടെ ഊണും ഉറക്കവും വെടിഞ്ഞ് നാടിനെ കാക്കാൻ മുന്പന്തിയിലും. അതുകൊണ്ടുതന്നെ ഈ കോവിഡ് കാലത്ത് കേരള പോലീസിന്റെ നന്മകളുട വാർത്തകളാണ് എവിടെയും ..എന്നാൽ ഈ കഥ അല്പം വ്യത്യസ്തമാണ്.ജീവൻ നിലനിർത്താൻ അത്യാവശ്യമരുന്ന് വേണമെന്ന് പോലീസിൽ വിളിച്ചുപറഞ്ഞപ്പോൾ ഹംസകുമാരിയെന്ന വിരമിച്ച അധ്യാപികയെ തേടിയെത്തിയത് വിദ്യാലയത്തിലെ ഓർമകൾ കൂടിയാണ്. മരുന്നുമായെത്തിയ ആലപ്പുഴ നോർത്ത് എസ് ഐ ടോൾസൻ മുഖത്തണിഞ്ഞ മാസ്ക് മാറ്റി ടീച്ചറെ എന്ന് വിളിച്ചപ്പോൾ അമ്പരന്നത് ടീച്ചറാണ്..മുന്നിൽ നില്കുന്നത് താൻ പുത്ര വാത്സല്യം പകർന്നു നൽകി സ്നേഹിച്ച പ്രിയ ശിഷ്യനെന്നു തിരിച്ചറിയാൻ ആ അധ്യാപികയ്ക്ക് അധിക സമയമൊന്നും വേണ്ടി വന്നില്ല. 

ഒന്നുമറിയാതെ അന്തംവിട്ടുനിന്ന ഭർത്താവ് ഗോപിനാഥൻ നായരോട് അവർ പറഞ്ഞു, ഇവൻ എന്റെ പ്രിയ ശിഷ്യനാ... അമ്പരപ്പുകൾക്കിടയിൽ ടോൾസൺ പറഞ്ഞു- ‘‘ഈ ടീച്ചറില്ലായിരുന്നെങ്കിൽ എന്നെ ഈ നിലയിൽ കാണാൻ പറ്റില്ലായിരുന്നു സാറേ...’’

രണ്ടുനേരം കഴിക്കുന്ന വിലയേറിയ മരുന്നാണ് ടീച്ചറുടെ ജീവൻ നിലനിർത്തുന്നത്. ലോക്ഡൗണിൽ മരുന്നു കിട്ടാതായി. സഹായത്തിനായി ആലപ്പുഴ നോർത്ത് സ്റ്റേഷനിലേക്ക് വിളിച്ചു. മരുന്നിന്റെ പേരും മേൽവിലാസവും നൽകി. പോലീസ് ഇടപെട്ട് തിരുവനന്തപുരത്തുനിന്ന് മരുന്നെത്തിച്ചു. ആവശ്യക്കാരിക്ക് എത്തിച്ചുകൊടുക്കാൻ തോണ്ടൻകുളങ്ങര ‘സരോവര’ത്തിനുമുന്നിൽ നോർത്ത് എസ്.ഐ. എത്തിയപ്പോഴാണ് തന്റെ പ്രിയ അധ്യാപികയ്ക്കുള്ള ഗുരുദക്ഷിണയുമായാണ് തൻ എത്തിയത് എന്ന് ആ നിയമ പാലകന് മനസിലായത്.
കാട്ടൂർ ഹോളിഫാമിലി സ്കൂളിലെ കായികാധ്യാപികയായിരുന്നു ഹംസകുമാരിടീച്ചർ.. വിരമിച്ചിട്ട് അഞ്ചുവർഷമായി. 21 വർഷംമുമ്പാണ് എസ്.ഐ. ടോൾസൺ ജോസഫ് അവിടെ പഠിച്ചത്. ഓട്ടത്തിലും ചാട്ടത്തിലും മിടുക്കനായിരുന്ന ടോൾസൺ ടീച്ചറുടെ പ്രിയ ശിഷ്യനായി. സ്കൂൾ കായിക വേദികളിലെല്ലാം ടോൾസണെ കൊണ്ടുപോയിരുന്നത് ഹംസകുമാരിയാണ്.

മക്കളില്ലാത്ത എനിക്ക് ശിഷ്യരാണ് മക്കൾ. ഈ കോവിഡ് കാലത്തെ ഒറ്റപ്പെടലിലും അവരെത്തിയില്ലേ... ട്രഷറിയിൽ ഉൾപ്പെടെ എവിടെ പോകുമ്പോഴും അവരുടെ കരുതലാണ് എനിക്ക് ആഹ്ലാദം പകരുന്നത്’’ -ഹംസകുമാരി പറയുന്നു.ടീച്ചറുടെ വാക്കുകൾ കേൾക്കാം..