കോവിഡ് പ്രതിസന്ധിയെത്തുടര്‍ന്നു മുഖ്യമന്ത്രി പ്രഖ്യാപിച്ച സാലറി ചാലഞ്ച് നിര്‍ബന്ധമായും നടപ്പാക്കാന്‍ മന്ത്രിസഭാ തീരുമാനിച്ചിരുന്നു ഒരു മാസത്തെ ശമ്പളം ഗഡുക്കളായി നല്‍കാന്‍ മാര്‍ച്ചിലെ ശമ്പളം മുതല്‍ എല്ലാ സര്‍ക്കാര്‍ ജീവനക്കാരും അധ്യാപകരും സ്വമേധയാ മുന്നോട്ടുവരണമെന്നും മുഖ്യമന്ത്രി പിണറായി വിജയന്‍ അറിയിച്ചു.

ഇനി സാലറി ചാലഞ്ചില്‍ എത്രത്തോളം പേര്‍ സഹകരിക്കുന്നെന്നു വിലയിരുത്തിയ ശേഷം കുറവാണെങ്കില്‍ തെലങ്കാന മാതൃകയില്‍ ശമ്പളം പിടിക്കുന്നതിനുള്ള ക4ശന നടപടി സ്വീകരിക്കാന്‍ മന്ത്രിസഭ തീരുമാനിച്ചു
ഇത് വരെ സാലറി ചാലഞ്ചില്‍ തീരുമാനമായിട്ടില്ല അങ്ങനെയാണെങ്കില്‍ സര്‍ക്കാര്‍ ജീവനക്കാരുടെ അടുത്ത മാസത്തെ ശമ്പള വിതരണം പ്രതിസന്ധിയിലാകും. ഏപ്രിലിലെ ശമ്പളത്തിന്റെ വിതരണം നിയന്ത്രിക്കാന്‍ ധനവകുപ്പ് ആലോചന തുടങ്ങി. മറ്റു സംസ്ഥാനങ്ങള്‍ എന്തു ചെയ്യുന്നു എന്നു കൂടി അറിഞ്ഞ ശേഷമാകും അന്തിമ തീരുമാനം.

ലീവ് സറണ്ടര്‍ തല്‍ക്കാലം അനുവദിക്കേണ്ട എന്ന തീരുമാനം സംസ്ഥാന സര്‍ക്കാര്‍ കടുത്ത നടപടികളിലേക്ക് നീങ്ങുന്നതിന്റെ സൂചനയാണ്. അടുത്ത മാസം ശമ്പളം കൊടുക്കാന്‍ പണമില്ല എന്നാണ് ധനവകുപ്പ് പറയുന്നത്. അടുത്ത മാസമാദ്യം 15 ദിവസത്തെ ശമ്പളം മാത്രം നല്‍കുന്നതിനെ പറ്റിയാണ് ഇപ്പോള്‍ ആലോചന നടക്കുന്നത്. ഇതു പോലെ മേയിലെ ശമ്പള വിതരണവും നിയന്ത്രിച്ചാല്‍ സാലറി ചാലഞ്ച് വഴി ഉദ്ദേശിച്ച ഫലം ലഭിക്കുകയും ചെയ്യും. നേരത്തെ പ്രഖ്യാപിച്ച, പല ഗഡുക്കളായി ഒരു മാസത്തെ ശമ്പളം പിടിക്കുന്ന സാലറി ചാലഞ്ച് നടന്നില്ലെങ്കിലായിരിക്കും ഈ മാര്‍ഗം സ്വീകരിക്കുന്നത്. കേന്ദ്ര സര്‍ക്കാര്‍ സാമ്പത്തിക സഹായം നല്‍കുമെന്ന പ്രതീക്ഷ ഇപ്പോഴും സംസ്ഥാന സര്‍ക്കാരിനുണ്ട്. മറ്റു സംസ്ഥാനങ്ങള്‍ ശമ്പള വിതരണം എങ്ങനെ നടത്തും എന്നതും അന്വേഷിക്കും. ഇക്കാര്യങ്ങള്‍ അറിഞ്ഞ ശേഷമാകും ധനവകുപ്പ് ശമ്പള വിതരണം സംബന്ധിച്ച് അന്തിമ തീരുമാനം എടുക്കുന്നത്.
നാളെ മുതല്‍ തദ്ദേശ സ്ഥാപനങ്ങളുടെ ബില്ലുകള്‍ നിയന്ത്രണമില്ലാതെ മാറി നല്‍കാനാണ് തീരുമാനം. 2250 കോടിയുടെ ബില്ലുകള്‍ ഇതുവരെയുള്ള കണക്കനുസരിച്ച് മാറി നല്‍കണം. ഇതു കഴിയുന്നതോടെ വീണ്ടും കടമെടുത്തില്ലെങ്കില്‍ മേയ് ആദ്യം ഖജനാവ് കാലിയാകും. അടുത്തയാഴ്ച വീണ്ടും കടപ്പത്രമിറക്കി ധനസമാഹരണം നടത്താനാണ് ശ്രമം. ഉയര്‍ന്ന പലിശ നല്‍കേണ്ടി വരും എന്നതിനാല്‍ പല ഘട്ടങ്ങളായാകും കടമെടുക്കുന്നത്. കോവിഡ് ലോക് ഡൗണ്‍ തുടരുന്നതിനാല്‍ ഈ മാസവും സര്‍ക്കാരിന് വരുമാനമുണ്ടാവില്ല എന്നുറപ്പായി. അതിനാലാണ് ശമ്പള വിതരണം നിയന്ത്രിക്കാനുള്ള ആലോചനയിലേക്ക് സര്‍ക്കാര്‍ കടന്നത്.

കേന്ദ്രജീവനക്കാര്‍ക്ക് സര്‍ക്കാര്‍ കഴിഞ്ഞ മാസം പ്രഖ്യാപിച്ച പുതുക്കിയ ക്ഷാമബത്ത തത്കാലം വിതരണം ചെയ്യില്ലെന്ന് റിപ്പോര്‍ട്ട്. കഴിഞ്ഞ മാസം പ്രഖ്യാപിച്ച 4 ശതമാനം അധിക ക്ഷാമബത്ത വിതരണം ചെയ്യുന്നതാണ് കൊവിഡ് 19 പശ്ചാത്തലത്തില്‍ സര്‍ക്കാര്‍ വൈകിപ്പിക്കുന്നത്. ഇതിനായി തത്കാലം ഉത്തരവിറക്കേണ്ടെന്നാണ് തീരുമാനം.

മാര്‍ച്ച് 13നാണ് കേന്ദ്രസര്‍ക്കാര്‍ ജീവനക്കാരുടെ ക്ഷാമബത്ത 17 ശതമാനത്തില്‍ നിന്ന് 21 ശതമാനമായി വര്‍ധിപ്പിക്കാന്‍ കേന്ദ്രമന്ത്രിസഭ തീരുമാനിച്ചത്. എന്നാല്‍ ഇതു സംബന്ധിച്ച് സര്‍ക്കാര്‍ ഉത്തരവ് പുറത്തിറങ്ങിയിരുന്നില്ല. കൊവിഡ് 19 പ്രതിരോധ പ്രവര്‍ത്തനങ്ങള്‍ക്കായി കൂടുതല്‍ പണം നീക്കി വെക്കേണ്ട സാഹചര്യത്തില്‍ തത്കാലം ഈ തീരുമാനം മരവിപ്പിക്കാനാണ് നീക്കം. ശമ്പളത്തോടൊപ്പം കിട്ടുന്ന സ്ഥില അലവന്‍സുകള്‍ക്ക് മുടക്കമുണ്ടാകില്ലെങ്കിലും പ്രത്യേക അലവന്‍സുകളും കുറച്ചു കാലത്തേയ്ക്ക് ഉണ്ടാകില്ല. ഇതിനു പുറമെ ധനവിനിയോഗം സംബന്ധിച്ച് കുൂടുതല്‍ നിയന്ത്രണങ്ങള്‍ വന്നേക്കുമെന്ന് വിവിധ വകുപ്പുകള്‍ക്ക് സര്‍ക്കാര്‍ മുന്നറിയിപ്പ് നല്‍കിയിട്ടുമുണ്ട്.

സാമ്പത്തിക വര്‍ഷത്തിന്റെ ആദ്യ പാദത്തില്‍ ഒരു പദ്ധതിയ്ക്കും മുന്‍കൂറായി പണം നല്‍കരുതെന്നും 20 കോടി രൂപയില്‍ കൂടുതലുള്ള ചെലവുകള്‍ക്ക് പ്രത്യേക അനുമതി വാങ്ങണമെന്നുമാണ് നിര്‍ദ്ദേശം. വാര്‍ഷിക ബജറ്റിന്റെ 5 ശതമാനം മാത്രമാണ് ആദ്യപാദത്തില്‍ ചെലവഴിക്കാന്‍ മന്ത്രാലയങ്ങള്‍ക്ക് അനുമതിയുള്ളത്.

രാജ്യത്തെ വ്യവസായമേഖലയ്ക്ക് ഉത്തേജനം നല്‍കാനും സാധാരണക്കാര്‍ക്ക് ആശ്വാസമാകാനുമുള്ള പുതിയ സാമ്പത്തിക പാക്കേജ് ധനമന്ത്രി നിര്‍മലാ സീതാരാമന്‍ ഉടന്‍ അവതരിപ്പിച്ചേക്കുമെന്നാണ് വിവരം. ഇതിനായി വിവിധ മന്ത്രാലയങ്ങളോടും സ്ഥാപനങ്ങളോടും നിര്‍ദേശങ്ങള്‍ പങ്കുവെക്കാന്‍ ധനമന്ത്രാലയം ആവശ്യപ്പെട്ടിട്ടുണ്ട്.