കായികലോകം മുഴുവനും കേരളത്തിലേക്ക് ശ്രദ്ധ തിരിച്ച അനവധി സംഭവ വികാസങ്ങൾ ഉണ്ടായിട്ടുണ്ട്. എന്നാൽ കോർണർ കിക്കിൽനിന്ന് നേരിട്ട് ലക്ഷ്യം കാണുന്ന ഒളിംപിക് ഗോൾ നടത്തി ഏവരെയും അമ്പരപ്പിച്ച് ആ പ്രതിഭയെ ആരും മറന്നിട്ടില്ല. പ്രതിഭാസ്പർശത്തിനു ലഭിച്ച സ്നേഹസമ്മാനങ്ങൾ കോവിഡ് പ്രതിരോധത്തിനു സംഭാവന ചെയ്ത് വീണ്ടും താരമായിരിക്കുകയാണ് കുഞ്ഞുഡാനി. കൊറോണ വ്യാപനത്തെ തുടർന്ന് പ്രതിസന്ധി നേരിടുന്ന കേരളത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് 31,500 രൂപയുടെ ചെക്കാണ് പത്തുവയസ്സുകാരൻ പി.കെ.ഡാനിഷ് കലക്ടർ സാംബശിവ റാവുവിന് കൈമാറിയത്.

മീനങ്ങാടി ഗ്രാമപഞ്ചായത്തില്‍വച്ച് ഫെബ്രുവരിയില്‍ നടന്ന അണ്ടര്‍ 10 ഫുട്‌ബോള്‍ കളി നമ്മൾ ആരും മറന്നിട്ടുണ്ടാകില്ല. കളിക്കിടയിലാണ് ഡാനി സീറോ ആങ്കിൾഗോള്‍ അടിച്ച് ടീമിനെ വിജയിപ്പിച്ച് താരമായി മാറിയത്. കോർണർ കിക്കിൽനിന്ന് നേരിട്ട് ഗോൾ പോസ്റ്റിനുള്ളിലെത്തുന്ന ഒളിംപിക് ഗോൾ വിഡിയോ വൈറലായതിനെ തുടർന്ന് ഒട്ടേറെ സമ്മാനങ്ങൾ ഡാനിഷിനെ തേടിയെത്തിയിരുന്നു.

ഇതെത്തുടർന്ന് ഏതാനും ഫുട്ബോൾ ടർഫുകളുടെ ഉദ്ഘാടനത്തിൽ മുഖ്യാതിഥിയായി പങ്കെടുക്കുകയും ചെയ്തു. ഇതിൽനിന്നെല്ലാംലഭിച്ച ഉപഹാരങ്ങളാണ് കോവിഡ് ദുരിതബാധിതർക്കായി സംഭാവന ചെയ്തത് തന്നെ. 2018ലെ പ്രളയ സമയത്ത്,തന്റെ കുടുക്കയിൽ സൂക്ഷിച്ചിരുന്ന പണവും ഡാനിഷ് ദുരിതാശ്വാസ നിധിയിലേക്ക് നൽക്കുകയായിരുന്നു.

തന്റെ അഞ്ചാം വയസിലാണ് ഡാനിഷ് ഫുട്‌ബോളില്‍ അരങ്ങേറ്റം കുറിക്കുന്നത്. പരിശീലകരായ നിയാസ് റഹ്മാന്റെയും പ്രസാദ് വി. ഹരിദാസിന്റെയും ശിക്ഷണത്തില്‍ മെഡിക്കല്‍ കോളജിലെ ഒളിംപ്യന്‍ റഹ്മാന്‍ ഗ്രൗണ്ടില്‍ കെഎഫ്ടിസി കോച്ചിങ് സെന്ററിലാണ് ഡാനിഷിന്റെ പരിശീലനം നടത്തിവരുന്നത്. അങ്ങനെ അണ്ടര്‍10 ടീമിലെ അംഗമാണെങ്കിലും അണ്ടര്‍ 12 ടീമിലും ഡാനിഷ് കളിക്കുന്നുണ്ട്.

ഇനി റിലീസാവാനിരിക്കുന്ന ‘ആനപ്പറമ്പിലെ വേള്‍ഡ് കപ്പ്’ എന്ന സിനിമയില്‍ പ്രശസ്ത ഫുട്ബാള്‍ താരം ഐ.എം വിജയനൊപ്പം ഉമ്മര്‍ എന്ന പ്രധാന കഥാപാത്രത്തെ അവതരിപ്പിച്ച് അഭിനയത്തിലും തന്റെ മികവ് തെളിയിച്ചിരിക്കയാണ് ഡാനിഷ്. മെസിയെ സ്വപ്നം കണ്ട് കഴിയുന്ന ഏഴു വയസ്സുകാരന്റെ കഥ പറയുന്ന ഈ സിനിമയ്ക്കായി ഡാനിഷ് ഒളിംപിക് ഗോൾ പലതവണ പ്രാക്ടീസ് ചെയ്തിരുന്നു.