കോവിഡ് 19 വൈറസ് ബാധമൂലമുണ്ടായ പ്രതിസന്ധി മറികടക്കാന്‍ ആര്‍.ബി.ഐ പ്രഖ്യാപിച്ച സാമ്പത്തിക പാക്കേജ് അപര്യാപ്തമെന്ന് ധനമന്ത്രി തോമസ് ഐസക്. അസാധാരണമായ സാഹചര്യമാണ് രാജ്യത്ത് നില നില്‍ക്കുന്നത്. ഇത്തരമൊരു സാഹചര്യത്തില്‍ അസാധാരണമായ ഉത്തരവ് വേണം. ഇത് ആര്‍.ബി.ഐയുടെ ഭാഗത്ത് നിന്ന് ഉണ്ടായില്ലെന്നും ഐസക് കുറ്റപ്പെടുത്തി. 60 ശതമാനം പണം സംസ്ഥാനങ്ങള്‍ക്ക് നല്‍കുമെന്ന പ്രഖ്യാപനം ഫലപ്രദമല്ല. കേരളത്തിന്റെ വായ്പ പരിധി മൂന്ന് ശതമാനത്തില്‍ നിന്ന് ആറ് ശതമാനമാക്കി ഉയര്‍ത്തുകയാണ് വേണ്ടത്. സാഹചര്യത്തിന്റെ ഗൗരവം ഉള്‍ക്കൊള്ളാന്‍ ഇപ്പോഴും ആര്‍.ബി.ഐക്ക് സാധിച്ചിട്ടില്ലെന്നും ഐസക് കുറ്റപ്പെടുത്തി.

ചെറുകിട സ്ഥാപനങ്ങള്‍ക്ക് കൂടുതല്‍ വായ്പ അനുവദിച്ചത് നല്ല കാര്യമാണ്. കെ.എഫ്.സിക്കും(കേരള ഫിനാന്‍ഷ്യല്‍ കോര്‍പ്പറേഷന്‍) കൂടുതല്‍ വായ്പ നല്‍കണം. കാര്‍ഷിക കടങ്ങള്‍ എഴുതി തള്ളുമോയെന്ന് ആര്‍.ബി.ഐ വ്യക്തമാക്കണമെന്നും അദ്ദേഹം പറഞ്ഞു. ചെറുകിട ഇടത്തരം ബാങ്കിങ് മേഖലകള്‍ക്കായി 50,000 കോടി രൂപ ആര്‍.ബി.ഐ അനുവദിച്ചിരുന്നു. റിവേഴ്‌സ് റിപ്പോ നിരക്ക് നാലു ശതമാനത്തില്‍നിന്ന് 3.75 ശതമാനമായി കുറച്ചു.