മൂന്നു വയസ്സുകാരിയുടെ ദേഹത്ത് തിളച്ച കറി വീണ് ഗുരുതരമായി പൊള്ളലേറ്റ സംഭവത്തില്‍ കുട്ടിയുടെ മുത്തഛനെയും, പിതൃസഹോദരിയെയും കണ്ണനല്ലൂര്‍ പൊലീസ് അറസ്റ്റ് ചെയ്തു. കുരീപ്പള്ളി പുത്തന്‍ചന്ത ശ്രേയസില്‍ ശരത് ലാലിന്റെയും ഷബാനയുടെയും മകള്‍ അക്ഷര (3) ആണ് ഗുരുതരമായി പൊള്ളലേറ്റത്. കുട്ടി പാലത്തറ എന്‍.എസ്.സഹകരണ ആശുപത്രിയിലെ തീവ്രപരിചരണ വിഭാഗത്തില്‍ ചികില്‍സയില്‍ കഴിയുകയാണ്. കുട്ടിയുടെ മുത്തഛനും ആര്‍.പി.എഫ് റിട്ട. എസ്.ഐ.യുമായ ശിവന്‍കുട്ടി, മകള്‍ സിത്താരാ എന്നിവരാണ് അറസ്റ്റിലായിട്ടുള്ളത്.ബുധനാഴ്ച ഉച്ചയോടെയായിരുന്നു സംഭവം.

വീട്ടിലെ കിടപ്പുമുറിയ്ക്കുള്ളില്‍ ആഹാരം പാകം ചെയ്യുന്നതിനിടെ മുറിക്കുള്ളിലെത്തിയ മുത്തഛനും മകളും ചേര്‍ന്ന് കുട്ടിയുടെ മാതാവിന്റെ കൈയ്യിലിരുന്ന കറി തട്ടി തെറിപ്പിക്കുകയായിരുന്നു. കറി കുട്ടിയുടെ ദേഹത്തു വീണതാണ് പൊള്ളലേല്‍ക്കുവാന്‍ കാരണമാക്കിയത്.പൊള്ളലേറ്റ കുട്ടിയെ ആദ്യം കണ്ണനല്ലൂരിലുളള സ്വകാര്യ ആശുപത്രിയില്‍ എത്തിച്ചെങ്കിലും ഗുരുതരമായി പൊള്ളലേറ്റിരുന്നതിനാല്‍ പൊലീസ് സഹായത്തോടെ പാലത്തറയിലുള്ള സഹകരണ ആശുപത്രിയില്‍ പ്രവേശിപ്പിക്കുകയായിരുന്നു.
ഹൈദരാബാദില്‍ ജീവനക്കാരനായ കുട്ടിയുടെ പിതാവ് മുംബൈ സ്വദേശിയായ അന്യ മതസ്ഥയായ യുവതിയെ വിവാഹം കഴിച്ച് മുംബൈയില്‍ താമസിച്ചു വരികയായിരുന്നു. കഴിഞ്ഞ ഏതാനും മാസം മുമ്ബാണ് ഇവര്‍ മുംബൈയിലെ താമസം മതിയാക്കി നെടുമ്ബനയിലെ ശരത് ലാലിന്റെ വീട്ടില്‍ താമസമാക്കിയത്.വീട്ടിലെ ഒരു മുറിയിലാണ് ഷബാനയും മക്കളും കഴിഞ്ഞിരുന്നത്.വീട്ടിലെ ഡൈനിംഗ് ടേബിള്‍ പോലും ഉപയോഗിക്കാന്‍ തങ്ങളെ അനുവദിക്കാറില്ലെന്നും തന്റെ കുട്ടികളെ മുത്തച്ചന്‍ ഉപദ്രവിക്കാറുണ്ടായിരുന്നെന്നും പൊള്ളലേറ്റ കുട്ടിയുടെ മാതാവ് പറയുന്നു.ബുധനാഴ്ച രാവിലെ കുട്ടികള്‍ തമ്മിലുണ്ടായ വഴക്കാണ് പ്രശ്‌നങ്ങള്‍ക്ക് കാരണമാക്കിയതെന്നാണ് പൊലീസ് പറയുന്നത്.സംഭവത്തെക്കുറിച്ച് കണ്ണനല്ലൂര്‍ പൊലീസ് വിശദമായ അന്വേഷണം നടത്തി വരികയാണ്.