പാലക്കാടിനടുത്ത് അലനല്ലൂരില്‍ ആശുപത്രിപ്പടിയിലെ കെട്ടിടത്തില്‍ താമസിക്കുന്ന അതിഥി തൊഴിലാളികളായ 3 പേര്‍ ബസ് കാത്തിരിപ്പ് കേന്ദ്രത്തില്‍ സ്റ്റൗ ഉപയോഗിച്ച് ഭക്ഷണം പാകം ചെയ്യാന്‍ ശ്രമം നടത്തി. കെട്ടിട ഉടമയോടുള്ള പ്രതിഷേധം പ്രകടിപ്പിക്കുകയായിരുന്നു ഉദ്ദേശം. ഇത് നാട്ടുകാരുടെ ശ്രദ്ധയില്‍ പെട്ടതോടെ അവര്‍ പൊലീസില്‍ വിവരം അറിയിച്ചു. നാട്ടുകല്‍ എസ്‌ഐ അനില്‍ മാത്യുവിന്റെ നേതൃത്വത്തില്‍ പൊലീസ് സംഘവും സ്‌പെഷല്‍ ബ്രാഞ്ച് ഉദ്യോഗസ്ഥന്‍ അസീസ്,വില്ലജ് ഓഫിസര്‍ പി.അബ്ദുല്‍ സലീം,സിവില്‍ ഡിഫന്‍സ് അംഗം അഷറഫ് മാളികുന്ന് എന്നിവരും സ്ഥലത്തെത്തി ഇവരെ താമസ സ്ഥലത്തേക്ക് തന്നെ തിരിച്ചയച്ചു.

ഒന്നും രണ്ടും പേര്‍ വീതം താമസിക്കുന്ന മുറികളില്‍ 4 പേര്‍ താമസിച്ച് സഹകരിക്കണമെന്ന് ഉടമ ആവശ്യപ്പെട്ടതാണ് ഇവരുടെ പ്രതിഷേധത്തിന് ഇടയാക്കിയത്. ലോക് ഡൗണ്‍ പ്രഖ്യാപിച്ചതോടെ ഇവരില്‍ നിന്ന് കഴിഞ്ഞ മാസവും ഈ മാസവും വാടക ഈടാക്കിയിട്ടില്ലെന്നും വൈദ്യുതി ബില്ലും വെള്ളത്തിന്റെ ചെലവും കുറവ് വരുത്തുക എന്ന ലക്ഷ്യത്തോടെയാണ് ഇങ്ങനെ ആവശ്യപ്പെട്ടതെന്നും കെട്ടിട ഉടമ പറഞ്ഞു.

വളരെ സൗകര്യമുള്ള പത്തോളം മുറികളുള്ള ഇവിടെ 34 തൊഴിലാളികളാണ് താമസിക്കുന്നത്. ഇവരുമായി സംസാരിച്ച് നാല് ആളുകള്‍ വീതം ഒരു റൂമില്‍ താമസിക്കാനും പുറത്തിറങ്ങിയ മൂന്ന് പേര്‍ ഒരു മുറിയിലും താമസിക്കാന്‍ പോലീസ് നിര്‍ദേശം നല്‍കി. യുപി സ്വദേശികളായ ഇവര്‍ മൂന്ന് പേര്‍ കഴിഞ്ഞ ദിവസം നടന്ന് നാട്ടിലേക്ക് പോകാന്‍ ശ്രമം നടത്തുന്നതിനിടെ കോട്ടോപ്പാടം കൂമഞ്ചീരികുന്ന് ഭാഗത്ത് പൊലീസ് തടഞ്ഞ് തിരിച്ചയച്ചിരുന്നു.