തിങ്കളാഴ്​ച മുതല്‍ മുഖ്യമന്ത്രി പിണറായി വിജയ​​െന്‍റ വാര്‍ത്താ സമ്മേളനം വീണ്ടും തുടങ്ങുന്നു. ഒന്നിടവിട്ട ദിവസങ്ങളില്‍ ഇനി മുഖ്യമന്ത്രി മാധ്യമ പ്രവര്‍ത്തകരെ കാണും. വാര്‍ത്താ സമ്മേളനം ഒഴിവാക്കിയത്​ അപവാദപ്രചാരണങ്ങള്‍ക്ക്​ കാരണമായതിനെ തുടര്‍ന്നാണ്​ തീരുമാനമെന്ന്​ റിപ്പോര്‍ട്ട്​.

നേരത്തെ കോവിഡ്​ നിയന്ത്രണമായതിനെ തുടര്‍ന്ന്​ വാര്‍ത്താ സമ്മേളനം നിര്‍ത്തുകയാണെന്ന്​ മുഖ്യമന്ത്രി അറിയിച്ചിരുന്നു. എന്നാല്‍, കെ.എം ഷാജിയുമായി ബന്ധപ്പെട്ടും സ്​പ്രിംഗ്​ളര്‍ കരാറുമായി ബന്ധപ്പെട്ടും മാധ്യമ പ്രവര്‍ത്തകര്‍ ചോദ്യം ഉന്നയിച്ചതാണ്​ വാര്‍ത്താ സമ്മേളനം നിര്‍ത്താന്‍ കാരണമെന്നായിരുന്നു പ്രചാരണങ്ങള്‍. ദുര്‍വ്യാഖ്യാനം വന്ന പശ്ചാത്തലത്തിലാണ് പത്രസമ്മേളനം നടത്തുന്നതിനെ കുറിച്ച്‌ വിശദീകരണവുമായി മുഖ്യമന്ത്രിയുടെ ഓഫീസ് രംഗത്തെത്തിരിക്കുന്നത്. സംസ്ഥാനത്ത് കോവിഡ് കേസുകളുടെ എണ്ണം കുറഞ്ഞതിനാണ് ദിവസേനയുള്ള റിവ്യൂ മീറ്റിംഗ് നിര്‍ത്തിയതെന്നും മുഖ്യമന്ത്രിയുടെ ഓഫീസ് അറിയിച്ചു.

മുഖ്യമന്ത്രിയുടെ പതിവ് വാര്‍ത്താ സമ്മേളനം ടെലിവിഷന്‍ ചാനലുകളുടെ റേറ്റിംഗില്‍ ഒന്നാം സ്ഥാനത്ത് എത്തിയിരുന്നു. ഈ ഒരുമണിക്കൂര്‍ നീളുന്ന പരിപാടിയില്‍ മുഖ്യമന്ത്രി കോവിഡ് 19 മഹാമാരിയുടെ കൃത്യമായ കണക്കുകള്‍ വ്യക്തമാക്കുന്നു. സര്‍ക്കാറിന്റെ പ്രതിരോധപ്രവര്‍ത്തനങ്ങളും രോഗികളെ കുറിച്ചും രോഗവ്യാപ്തി തുടങ്ങി എല്ലാം വിവരിച്ചിരുന്നു. എല്ലാ വാര്‍ത്താ ചാനലുകളും അവരുടെ പ്രൈം ടൈം വാര്‍ത്താ ബുള്ളറ്റിനും പരസ്യങ്ങളും ഉപേക്ഷിച്ചാണ് മുഖ്യമന്ത്രിയുടെ വാര്‍ത്താ സമ്മേളനം സംപ്രേഷണം ചെയ്യുന്നത്. ആളുകള്‍ ടിവി ചാനലുകള്‍ വഴിയും ഇന്റര്‍നെറ്റ് വഴിയുമെല്ലാം പരിപാടി ട്യൂണ്‍ ചെയ്യുന്നു. ഇത് ടിവി ചാനലുകളിലെ റേറ്റിംഗുകളില്‍ പ്രതിഫലിച്ചിരുന്നു.

മാര്‍ച്ച്‌ 16 മുതല്‍ കേരള മുഖ്യമന്ത്രി സംസ്ഥാനത്തെ പുതിയ കോവിഡ് കേസുകളെക്കുറിച്ചും സര്‍ക്കാര്‍ സ്വീകരിച്ച നടപടികളെക്കുറിച്ചും വിശദമായ അപ്ഡേറ്റുകള്‍ പൊതുജനങ്ങളെ അറിയിച്ചിരുന്നു. ടെലിവിഷന് പുറമേ,യൂട്യൂബിലും ഫേസ്ബുക്കിലും മുഖ്യമന്ത്രിയുടെ ലൈവ് ട്രീമിംഗ് കാണാന്‍ പതിനായിരങ്ങളാണ് എത്തിയിരുന്നത്. ചാനലുകളുടെ ലൈവ് സ്ട്രീമിംഗ് വഴിയും ലക്ഷങ്ങളാണ് വാര്‍ത്താസമ്മേളനം കണ്ടിരുന്നത്.

ടെലിവിഷനില്‍ മാത്രമല്ല, മുഖ്യമന്ത്രിയുടെ ദൈനംദിന അറിയിപ്പുകള്‍ ഫേസ്ബുക്കിലും ട്വിറ്ററിലും ആരോഗ്യമന്ത്രി കെകെ ഷൈലജയുടെ ഫേസ്ബുക്കിലും ട്രെന്‍ഡിങാണ്. ഓരോ ലൈവ് വീഡിയോയ്ക്കും ഫേസ്ബുക്കില്‍ ശരാശരി 4 ലക്ഷം കാഴ്ചകള്‍ ലഭിക്കുന്നു. ചില ദിവസങ്ങളില്‍ ഇത് 5 ലക്ഷം കാഴ്ചകളായി വര്‍ദ്ധിക്കുന്നു. ചാനലുകള്‍ക്ക് അവരുടെ യൂടൂബിലും കാഴ്ചക്കാരെയുണ്ടാക്കുന്നു.