സ്പ്രിംഗ്ളർ വിഷയത്തിൽ ഒറ്റുകാരന്റെ റോളിലാണ് മുഖ്യമന്ത്രിയെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഷാഫി പറമ്ബില്‍ എം.എല്‍.എ. കയ്യോടെ പിടിക്കപ്പെട്ടപ്പോഴുള്ള കള്ളന്റെ മാനസികാവസ്ഥയാണ് മുഖ്യമന്ത്രിക്ക് ഇപ്പോഴുള്ളത്. മുഖ്യമന്ത്രിയുടെ അറിവോടെ, മുഖ്യമന്ത്രിയും അടുപ്പക്കാരും ചേര്‍ന്ന് നടപ്പാക്കിയതാണ് സ്പ്രിംഗ്ളര്‍ എന്നും അദ്ദേഹം ആരോപിച്ചു..

പ്ലാന്‍ ചെയ്ത് നടപ്പാക്കിയ കച്ചവടമാണിത്. ഐ.ടി വകുപ്പ് മുഖ്യമന്ത്രി ഒഴിയണമെന്നും അന്വേഷണം ആവശ്യപ്പെട്ട് യൂത്ത് കോണ്‍ഗ്രസ് കൊവിഡ് മാനദണ്ഡം പാലിച്ച്‌ സംസ്ഥാനത്തെ അയ്യായിരം കേന്ദ്രങ്ങളില്‍ 24 ന് പ്രതിഷേധം സംഘടിപ്പിക്കുമെന്നും ഷാഫി പറമ്ബില്‍ മാധ്യമങ്ങളോട് പറഞ്ഞു.

അതേസമയം തിങ്കളാഴ്ച മുതല്‍ വീണ്ടും മുഖ്യമന്ത്രി പിണറായി വിജയെന്റ വാര്‍ത്താ സമ്മേളനം ആരംഭിക്കും. ഒന്നിടവിട്ട ദിവസങ്ങളില്‍ ഇനി മുഖ്യമന്ത്രി മാധ്യമ പ്രവര്‍ത്തകരെ കാണും. വാര്‍ത്താ സമ്മേളനം ഒഴിവാക്കിയത് അപവാദപ്രചാരണങ്ങള്‍ക്ക് കാരണമായതിനെ തുടര്‍ന്നാണ് തീരുമാനമെന്ന് റിപ്പോര്‍ട്ട്. നേരത്തെ കോവിഡ് നിയന്ത്രണമായതിനെ തുടര്‍ന്ന് വാര്‍ത്താ സമ്മേളനം നിര്‍ത്തുകയാണെന്ന് മുഖ്യമന്ത്രി അറിയിച്ചിരുന്നു. എന്നാല്‍, കെ.എം ഷാജിയുമായി ബന്ധപ്പെട്ടും സ്പ്രിംഗ്‌ളര്‍ കരാറുമായി ബന്ധപ്പെട്ടും മാധ്യമ പ്രവര്‍ത്തകര്‍ ചോദ്യം ഉന്നയിച്ചതാണ് വാര്‍ത്താ സമ്മേളനം നിര്‍ത്താന്‍ കാരണമെന്നായിരുന്നു പ്രചാരണങ്ങള്‍.