കൊറോണ വ്യാപനത്തിന്റെ പശ്ചാത്തലത്തിൽ കേരളവും കർണാടകവും തമ്മിലുള്ള അതിർത്തി പൂർണമായും അടച്ചിരുന്നു. ഇതിന്റെ പേരിൽ വാദപ്രതിവാദങ്ങൾ നടക്കുമ്പോഴും ചികിത്സ കിട്ടാതെ മരിച്ചത് പത്തില്പരം മലയാളികളാണ്. എന്നാലിതാ പ്രേശ്നങ്ങൾ നിലനിൽക്കെ മാക്കൂട്ടത്ത് കേരളത്തിന്റെ റവന്യു പുറമ്പോക്ക് ഭൂമിയിൽ മുറിച്ചിട്ട മരം കർണാടക വനം വകുപ്പ് കൊണ്ടുപോയതായി റിപ്പോർട്ട്. 4 മാസം മുൻപ് താമസ സ്ഥലത്തെ മര‌ം മുറിച്ചതിന് മലയാളി ദമ്പതികളായ മാട്ടുമ്മൽ ബാബു, ഭാര്യ സൗമിനി എന്നിവരെ മാക്കൂട്ടം വനപാലകർ അറസ്റ്റ് ചെയ്തിരുന്നു. ഈ സംഭവത്തിൽപെട്ട മരത്തടികളാണ് ക്രെയിൻ ഉപയോഗിച്ച് മാക്കൂട്ടം ബ്രഹ്മഗിരി വൈൽഡ് ലൈഫ് റേഞ്ചർ കേശവയുടെ നേതൃത്വത്തിലുള്ള സംഘം കടത്തിക്കൊണ്ടുപോയതെന്ന് റിപ്പോർട്ട് വ്യക്തമാക്കുന്നത്..

അതോടൊപ്പം തന്നെ ഇരിട്ടി തഹസിൽദാർ കെ.കെ.ദിവാകരൻ മരം കൊണ്ടുപോകുന്നത് തടയണമെന്ന് നിർദേശിച്ചതിനെ തുടർന്ന് ഇരിട്ടി എസ്ഐ ദിനേശൻ കൊതേരിയുടെ നേതൃത്വത്തിലുള്ള പൊലീസ് സംഘം സ്ഥലത്തേക്ക് എത്തിയിരുന്നു എങ്കിലും കർണാടക കൂട്ടുപുഴയിൽ മണ്ണിട്ട് റോഡ് അടച്ചതിനാൽ എത്താൻ വൈകിയതിനെ തുടർന്ന് ഇവിടെ വാഹനങ്ങൾ നിർത്തി കേരള പൊലീസ് നടന്ന് എത്തിയപ്പോഴേക്കും മരങ്ങൾ നീക്കുകയും ചെയ്തിരുന്നു.

ഇന്നലെ രാവിലെ 9ഓടെയാണ് മലയാളി കുടുംബങ്ങൾ താമസിക്കുന്ന പ്രദേശത്തെത്തി കർണാടക വനം വകുപ്പിന്റെ പ്രകോപനകരമായ നീക്കം നടന്നത്. ഇരിട്ടി സിഐ എ.കുട്ടികൃഷ്ണൻ, പായം പഞ്ചായത്ത് സ്ഥിരം സമിതി അധ്യക്ഷൻ പവിത്രൻ കരിപ്പായി, അംഗം പി.എൻ.സുരേഷ്, വിളമന വില്ലേജ് ഓഫിസർ സിബി മാത്യു എന്നിവരും സ്ഥലത്ത് എത്തുകയും ചെയ്തിരുന്നു.

അതേസമയം ഇവരും പായം പഞ്ചായത്ത് പ്രസിഡന്റ് എൻ.അശോകന്റെ നേതൃത്വത്തിലുള്ള ജനപ്രതിനിധികളും വനം ചെക്ക് പോസ്റ്റിൽ അന്വേഷിച്ചപ്പോൾ വീരാജ്പേട്ട കോടതിയിലുള്ള കേസിൽ ഡിഎഫ്ഒയുടെ ഉത്തരവ് പ്രകാരമാണ് മരങ്ങൾ കസ്റ്റഡിയിൽ എടുത്തതെന്നും മാക്കൂട്ടത്തെ ബ്രഹ്മഗിരി വന്യജീവി സങ്കേതം ആസ്ഥാനത്ത് സൂക്ഷിക്കുമെന്നുമായിരുന്നു വിശദീകരണം നൽകിയിരുന്നത്.