കൊവിഡ് ചികിത്സയില്‍ കേരളത്തിന് അഭിമാനമായി കാസര്‍കോട് ജില്ല. 100 കോവിഡ് ബാധിതരെ രോഗമുക്തരാക്കിയ ഇന്ത്യയിലെ ആദ്യ ജില്ലയായി കാസര്‍കോട്. 168 രോഗികളാണ് ജില്ലയിലുണ്ടായിരുന്നത്. ഇനി ചികിത്സയിലുള്ളത് 68 പേര്‍ മാത്രം.

കേരളത്തിലെ ആരോഗ്യ മേഖലയുടെ മികവാണ് കാസര്‍കോട് ജില്ലയുടെ കോവിഡ് ചികിത്സാ കണക്കിലൂടെ വ്യക്തമാകുന്നത്. ജില്ലയില്‍ ഇതുവരെ ആകെ റിപ്പോര്‍ട്ട് ചെയ്തത് 168 കേസുകള്‍. ഇതില്‍ രോഗമുക്തി നേടിയത് 100 പേര്‍.

ആരോഗ്യ രംഗത്തെ പരിമിതികള്‍ വെല്ലുവിളികളായെങ്കിലും അവയൊക്കെ മറികടന്ന് രാജ്യത്ത് ഏറ്റവും കൂടുതല്‍ കൊവിഡ് രോഗികളെ ചികിത്സിച്ച് ഭേദമാക്കിയ ജില്ലയായി കാസര്‍കോട്. കടമ്ബകളെല്ലാം കടന്ന് ജില്ല ഇന്ന് പൂര്‍ണമായും അതിജീവനത്തിന്റെ പാതയിലാണെന്ന് ജില്ലാ കലക്ടര്‍ ഡി സജിത്ത് ബാബു വ്യക്തമാക്കി.

ജില്ലാ ആശുപത്രിയും ജനറല്‍ ആശുപത്രിയും 10 സാമൂഹാരോഗ്യ കേന്ദ്രങ്ങളും 38 പി എച്ച്സികളും മാത്രമായി ഒതുങ്ങിയതായിരുന്നു കാസര്‍കോടിന്റെ ആരോഗ്യരംഗത്തെ സന്നാഹങ്ങള്‍. ലോക്ക് ഡൗണ്‍ നിയന്ത്രണങ്ങള്‍ കര്‍ശനമായി നടപ്പാക്കാന്‍ കഴിഞ്ഞത് രോഗവ്യാപനത്തിന്റെ തോത്കുറച്ചു. ഇനി പൂര്‍ണമായും കാര്യങ്ങള്‍ കയ്യിലൊതുങ്ങും.
രോഗവ്യാപനം പൂര്‍ണമായും തടയുക എന്നതാണ് ജില്ലയിലെ പ്രതിരോധം. പരമാവധി ആളുകളെ പരിശോധനയ്ക്ക് വിധേയരാക്കുന്നുണ്ട്. കൂടുതല്‍ കേസുകള്‍ റിപ്പോര്‍ട്ട് ചെയ്ത 7 മേഖലകളിലെ 75000 പേരുടെ വിവരങ്ങള്‍ ആരോഗ്യ വകുപ്പ് ഇതിനകം ശേഖരിച്ചു കഴിഞ്ഞു.
കാസര്‍കോടിന്റെ ഈ പ്രതിരോധമാണ് ഇന്ന് രാജ്യത്തിന് പോലും മാതൃകയാവുന്നത്.

രാജ്യത്ത് തന്നെ 100 രോഗികളെ ഭേദമാക്കുന്ന ആദ്യ ജില്ലയായി കാസര്‍കോട് മാറി. 68 ആണ് ജില്ലയിലെ ഡിസ്ചാര്‍ജ്ജ് നിരക്ക്. കാസര്‍കോട് ജനറല്‍ ആശുപത്രിയിലെ 89 കോവിഡ് രോഗികളില്‍ 64 പേരാണ് ഡിസ്ചാര്‍ജ്ജായത്. കാഞങ്ങാട് ജില്ലാ ആശുപത്രിയിലെ 43 രോഗികളില്‍ 30 പേരെ ഡിസ്ചാര്‍ജ് ചെയ്തു.

കാസര്‍കോട് മെഡിക്കല്‍ കോളേജില്‍ ചികിത്സിച്ച 16 പേരില്‍ 5 പേര്‍ക്കാണ് രോഗം ഭേദമായത്. കാസര്‍കോട് ജില്ലയിലെ 18 രോഗികളെ ചികിത്സിച്ച കണ്ണൂര്‍ പരിയാരം മെഡിക്കല്‍ കോളേജില്‍ നിന്നും 14 പേര്‍ രോഗമുക്തി നേടി. കോഴിക്കോട് മെഡിക്കല്‍ കോളേജില്‍ ചികിത്സയിലുണ്ടായിരുന്ന 2 കാസര്‍കോട് സ്വദേശികളും രോഗമുക്തരായി.

കാസര്‍കോട് ജില്ലയില്‍ കോവിഡ് വ്യാപിച്ചപ്പോള്‍ ഏവരും സമൂഹവ്യാപനത്തില്‍ നിന്നും കാസര്‍കോടിനെ രക്ഷിക്കാന്‍ സാധിക്കുമെന്ന് പ്രതീക്ഷിച്ചിരുന്നില്ല. അവിടെയാണ് കേരള സര്‍ക്കാരും ആരോഗ്യ മേഖലയും ജീവന്‍ മരണ പോരാട്ടം നടത്തി രാജ്യത്തിന് തന്നെ അഭിമാനമാക്കി കാസര്‍കോടിനെ മാറ്റിയത്.

കൊറോണ വൈറസ് ബാധ ഏറ്റവും കൂടുതല്‍ റിപ്പോര്‍ട്ട് ചെയ്ത കാസര്‍കോട് ജില്ലയില്‍ ഇന്ന് മുതല്‍ സമൂഹ വ്യാപന പരിശോധന ആരംഭിക്കും. കൊറോണ വൈറസ് ബാധ ഏറ്റവും കൂടുതല്‍ പടര്‍ന്ന പഞ്ചായത്തുകളിലാണ് സമൂഹ വ്യാപന പരിശോധന നടത്തുന്നത്. ആദ്യഘട്ടത്തില്‍ ഉദുമ പഞ്ചായത്തിലാണ് പരിശോധന നടത്തുക. പരിശോധനയ്ക്കായുള്ള സാമ്പിള്‍ ശേഖരണ കേന്ദ്രങ്ങള്‍ ഉള്‍പ്പെടെയുള്ള സജ്ജീകരണങ്ങള്‍ പ്രദേശങ്ങളില്‍ പൂര്‍ത്തിയായിട്ടുണ്ട്.

കൊറോണ രോഗലക്ഷണങ്ങള്‍ പ്രകടമാകുന്നവരുടെയും നിരീക്ഷണത്തില്‍ കഴിയുന്നവരുടെയും സാമ്പിളുകളാണ് പരിശോധിക്കുന്നത്. ഉദുമ പഞ്ചായത്തില്‍ മാത്രം 440 പേരാണ് വീടുകളില്‍ നിരീക്ഷണത്തില്‍ കഴിയുന്നത്. ഇവര്‍ക്കാവശ്യമായ പരിശോധന കിറ്റുകളും മറ്റു സാമഗ്രികളും എത്തിച്ചേര്‍ന്നിട്ടുണ്ട്.

ഉദുമ പഞ്ചായത്തിലെ പരിശോധനയ്ക്ക് ശേഷം കൊറോണ വൈറസ് ബാധ കൂടുതലായി റിപ്പോര്‍ട്ട് ചെയ്തപള്ളിക്കര, ചെമ്മനാട്, ചെങ്കള, മധൂര്‍, മൊഗ്രാല്‍ പുത്തൂര്‍, പഞ്ചായത്തുകളിലും കാസര്‍കോട് കാഞ്ഞങ്ങാട് നഗരസഭകളിലും ഉടന്‍ പരിശോധന ആരംഭിക്കും. മേല്‍ പറഞ്ഞ പ്രദേശങ്ങളില്‍ രോലക്ഷണങ്ങളെ കണ്ടെത്തുന്നതിനായുള്ള സര്‍വ്വേ നേരത്തെ പൂര്‍ത്തിയായിരുന്നു. ഇതിന്റെ തുടര്‍ച്ചയായാണ് പരിശോധന നടത്തുന്നത്. ജില്ലയില്‍ കാസര്‍കോട് ജനറല്‍ ആശുപത്രിയിലും ജില്ലാ ആശുപത്രിയിലും ബദിയെടുക്ക കൊവിഡ് ആശുപത്രിയിലും പെരിയ സി.എച്.സിയിലുമാണ് സാമ്പിളുകള്‍ ശേഖരിക്കുന്നത്. എന്നാല്‍ ഇനി മുതല്‍ പഞ്ചായത്ത് ആസ്ഥാനങ്ങളില്‍ പ്രത്യേക സംവിധാനം ഒരുക്കിയാണ് സാമ്പിളുകള്‍ ശേഖരിക്കുക.