കടുവയുടെ മുന്നിൽ നിന്ന് തലനാരിഴയ്ക്ക് രക്ഷപെട്ട മേടപ്പാറ ഈട്ടിമൂട്ടിൽ ജീവൻരാജിന് ഇനിയും നടുക്കം മാറിയിട്ടില്ല. അടുക്കളയുടെ വാതിൽപ്പടിയിൽ നിന്ന് ഒരു ചുവട് കൂടി മുന്നോട്ട് വച്ചിരുന്നെങ്കിൽ സ്ഥിതി മറ്റൊന്നാകുമായിരുന്നു.  വീടിനു പുറത്ത് ശബ്ദം കേട്ട് കഴിഞ്ഞ ദിവസം രാത്രി 11.30ന് ആണ് ജീവൻരാജ് പുറത്തിറങ്ങിയത്. അടുക്കളയുടെ വാതിൽ തുറന്ന്  ഒരു ചുവടുമുന്നോട്ട്  വയ്ക്കാൻ തുടങ്ങുമ്പോൾ കണ്ട കാഴ്ച ഞെട്ടിപ്പിക്കുന്നതാണ്... വീടിന്റെ ഭിത്തിയോട് ചേർന്ന് കഴുകാൻ വച്ചിരുന്ന തോർത്ത് കടിച്ചുകൊണ്ട് കടുവ കിടക്കുന്നു. ധൈര്യം സംഭരിച്ച് സാവധാനം ശബ്ദമുണ്ടാക്കാതെ പിന്നിലേക്ക് മാറി കതക് അടച്ചു.

പിന്നീട് പിതാവ് റെജിമോനെ വിളിച്ചുണർത്തി വിവരം പറയുകയായിരുന്നു.. ഇരുവരും അടുക്കളയുടെ പാതകത്തിന് മുകളിൽ കയറി ജനലിൽ കൂടി പുറത്തേക്ക് നോക്കുമ്പോൾ കടുവ അവിടെത്തന്നെയുണ്ട്. ഇവരുടെ കാൽ തട്ടി അടുക്കളയിൽ പാത്രം വീണപ്പോൾ കടുവയുടെ ശ്രദ്ധ വീടിനകത്തേക്കായി. വീട്ടുകാർ കടുവയുടെ സാന്നിധ്യം സമീപവാസികളെയും വനംവകുപ്പ്, പൊലീസ് അധികൃതരെയും അറിയിച്ച് ആളുകൾ എത്തിയപ്പോഴേക്കും കടുവ നടന്നുമറഞ്ഞിരുന്നു . സമീപമുള്ള പുളിമൂട്ടിൽ സുരേഷിന്റെ വീടിന്റെ പരിസരങ്ങളിൽ കടുവയുടെ കാൽപ്പാടുകൾ കണ്ടിരുന്നു. മേടപ്പാറ തോട്ടത്തിലെ കന്റീൻ പരിസരങ്ങളിലും കടുവയുടെ കാൽപ്പാട് തെളിഞ്ഞിട്ടുണ്ട്  


കഴിഞ്ഞ ദിവസം കടുവയുടെ ആക്രമണത്തിൽ ഒരു യുവാവ് കൊല്ലപ്പെട്ടിരുന്നു.ഇതേ തുടർന്ന്   പ്ലാന്റേഷൻ കോർപറേഷന്റെ മേടപ്പാറ റബർ എസ്റ്റേറ്റ് മേഖലയിൽ നിരോധനാജ്ഞ പ്രഖ്യാപിച്ചിരിക്കുകയാണ്.. കടുവയുടെ സാന്നിധ്യം വീണ്ടും അറിഞ്ഞതിനെത്തുടർന്ന് തണ്ണിത്തോട് പഞ്ചായത്തിലെ 1, 2 വാർഡുകളിലാണ് ജില്ലാ കലക്ടർ നിരോധനാജ്ഞ പ്രഖ്യാപിച്ചത്.  പ്ലാന്റേഷൻ കോർപറേഷന്റെ  റബർ മരങ്ങൾ പാട്ടത്തിനെടുത്ത് ടാപ്പിങ് നടത്തിവരുകയായിരുന്ന ഇടുക്കി കഞ്ഞിക്കുഴി പ്രഭാ സിറ്റി വടക്കേൽ വിനീഷ് മാത്യു (36) ആണ് കടുവയുടെ ആക്രമണത്തിൽ കൊല്ലപ്പെട്ടത്. ടാപ്പിങ് നടത്തുന്നതിനിടെ വ്യാഴാഴ്ച 12 മണിയോടെയായിരുന്നു സംഭവം.
പുലിയാണ് വിനീഷിനെ ആക്രമിച്ചതെന്നായിരുന്നു ആദ്യം കരുതിയത്. എന്നാൽ വ്യാഴാഴ്ച വൈകിട്ട് വനപാലക സംഘവും നാട്ടുകാരും സമീപ ഭാഗത്ത് കടുവയെ കാണുകയായിരുന്നു. അന്നു രാത്രി ജനവാസ മേഖലയിലെ വീടിന്റെ അടുക്കള ഭാഗത്ത് വീട്ടുകാർ കടുവയെ വീണ്ടും കണ്ടു. പിന്നീട് തോട്ടത്തിലെ കന്റീൻ പരിസരത്തും കടുവയെത്തി. ഇതേ തുടർന്ന്  വനംവകുപ്പ് റബർ തോട്ടത്തിൽ കൂടും നിരീക്ഷണ ക്യാമറകളും സ്ഥാപിച്ചു. ഡ്രോൺ ഉപയോഗിച്ചും പരിശോധന നടത്തി. വനംവകുപ്പും പൊലീസും പ്രദേശത്ത് ക്യാംപ് ചെയ്യുന്നുണ്ട്. പത്തനംതിട്ട ജനറൽ ആശുപത്രിയിൽ പോസ്റ്റ്മോർട്ടം നടത്തിയ ശേഷം മൂന്നോടെ വിനീഷിന്റെ മൃതദേഹം പ്രഭാ സിറ്റിയിലെ വീട്ടിൽ എത്തിച്ചു.

തുടർന്ന് സെന്റ് മേരീസ് പള്ളിയിൽ സംസ്കാരം നടത്തി.  സംഭവത്തിന്റെ ഗൗരവം കണക്കിലെടുത്ത് തുടർ നടപടികൾക്കായി ആന്റോ ആന്റണി എംപിയുടെ അധ്യക്ഷതയിൽ കെ.യു.ജനീഷ് കുമാർ എംഎൽഎ, വനംവകുപ്പ് ഉന്നത ഉദ്യോഗസ്ഥർ, പൊലീസ് ഉദ്യോഗസ്ഥർ, റവന്യു അധികൃതർ, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ എന്നിവർ യോഗം ചേർന്നു. കടുവയുടെ സാന്നിധ്യമുണ്ടായാൽ അറിയിക്കുന്നതിനായി തണ്ണിത്തോട് പഞ്ചായത്ത് ഓഫിസ് കേന്ദ്രീകരിച്ച് 24 മണിക്കൂറുംപ്രവർത്തിക്കുന്ന കൺട്രോൾ റൂം തുറന്നു.