ഇന്ത്യയും വെസ്റ്റ് ഇൻഡീസും തമ്മിലുള്ള നാലാം ട്വന്റി-20 ക്രിക്കറ്റ് മത്സരം ഇന്ന് ഹൈദരാബാദിൽ നടക്കും. അഞ്ച് മത്സരപരമ്പരയിൽ 2-1ന് ഇന്ത്യ മുന്നിലാണ്. ഇന്ന് ജയിച്ചാൽ ഇന്ത്യയ്ക്ക് പരമ്പര സ്വന്തമാക്കാൻ കഴിയും.

ലക്നൗവിൽ നടന്ന ആദ്യ മത്സരത്തിൽ ഇന്ത്യ എട്ടുവിക്കറ്റിന് വിജയിച്ചിരുന്നു. എന്നാൽ റാഞ്ചിയിൽ ന‌ടന്ന രണ്ടാം മത്സരത്തിൽ ഇന്ത്യ നൽകിയ 250 റൺസ് ലക്ഷ്യം ചേസ് ചെയ്ത് വിൻഡീസ് വിജയിക്കുകയായിരുന്നു. ലക്നൗവിൽ മൂന്നാം മത്സരത്തിൽ 14 റൺസിനായിരുന്നു ഇന്ത്യൻ ജയം. കഴിഞ്ഞ രണ്ട് മത്സരങ്ങളിലും 200ലേറെ റൺസ് ഇരുടീമുകളും സ്കോർ ചെയ്തിരുന്നു.

പരമ്പരയിലെ ആദ്യ മൂന്ന് മത്സരങ്ങളിൽ സഞ്ജുവിന് അവസരം നൽകിയ ഇന്ത്യ അവസാന രണ്ട് മത്സരങ്ങളിൽ വൈഭവ് സൂര്യവംശിക്ക് അവസരം നൽകുമെന്ന് സൂചനയുണ്ട്. ആദ്യ മത്സരത്തിൽ 11 റൺസിന് പുറത്തായിരുന്ന സഞ്ജു രണ്ടാം മത്സരത്തിൽ 41 പന്തുകളിൽ 82 റൺസ് നേടിയിരുന്നു. എന്നാൽ മൂന്നാം മത്സരത്തിൽ മൂന്ന് റൺസേ നേടാൻ കഴിഞ്ഞുള്ളൂ.