സോണിയക്ക് ഇത് ആശ്വാസത്തിന്റെയും സന്തോഷത്തിന്റെയും ഇരട്ടി മധുരമുള്ള ദിവസങ്ങളാണ്. കോവിഡ് -19 വിതച്ച ആശങ്കകള്‍ക്കൊടുവില്‍ ജന്മനാട്ടിലെ സുരക്ഷിതത്വത്തിലേക്കു തിരിച്ചെത്തിയതിന്റെ ആശ്വാസത്തോടൊപ്പം, ജീവിതത്തിലേക്ക് പുതിയ അതിഥി കൂടി എത്തിയിരിക്കുന്നു..അതും മാതൃ ദിനത്തില്‍ തന്നെ.സന്തോഷിക്കാന്‍ ഇതില്പരം എന്ത് വേണം.

ഇന്ത്യന്‍ നേവിയുടെ ഐഎന്‍എസ് ജലാശ്വയില്‍ മാലദ്വീപില്‍ നിന്നു കൊച്ചിയിലെത്തിച്ച യുവതിയാണ് കരയിലെത്തി മണിക്കൂറുകള്‍ക്കുള്ളില്‍ കുഞ്ഞിനു ജന്‍മം നല്‍കിയത് . തിരുവല്ല ഇരവിപേരൂര്‍ സ്വദേശിനി സോണിയ ജേക്കബിന് സിസേറിയനിലൂടെ ആണ്‍കുഞ്ഞു പിറന്നു. നാടിന്റെ സുരക്ഷിത വലയത്തിലെത്തിയതിനു പിന്നാലെ കുഞ്ഞനെക്കൂടി ലഭിച്ചതിന്റെ ഇരട്ടി സന്തോഷത്തിലാണ് സോണിയ ജേക്കബും കുടുംബവും. മാലിയില്‍ നഴ്‌സാണ് സോണിയ. കോവിഡ് ആശങ്ക പരത്തിയപ്പോള്‍ ജന്മനാടിന്റെ സുരക്ഷിതത്വത്തിലേക്കു എത്താനായി ആഗ്രഹിച്ചവരില്‍ സോണിയയും ഉണ്ടായിരുന്നു.എന്നാല്‍ ഐഎന്‍എസ് ജലാശ്വ സമുദ്രത്തിലൂടെ കുതിച്ചത് സോണിയ ഉള്‍പ്പെടെ നിരവതി പേരുടെ ആശങ്കകള്‍ക്ക് വിരാമമിട്ടുകൊണ്ടാണ്

കോവിഡ് 19 വ്യാപനത്തെ തുടര്‍ന്ന് ഇന്ത്യന്‍ നേവി നടത്തിയ രക്ഷാപ്രവര്‍ത്തനമായ ഓപ്പറേഷന്‍ സമുദ്ര സേതുവാണ് സോണിയക്ക് നാട്ടിലേയ്‌ക്കെത്താന്‍ വഴിതുറന്നത്. യാത്രയ്ക്കിടെ കാര്യമായ പ്രശ്‌നമുണ്ടായില്ലെങ്കിലും തുറമുഖത്ത് ഇമിഗ്രേഷന്‍ നടപടികള്‍ പൂര്‍ത്തിയായ ശേഷം കുഞ്ഞിന് അനക്കം കുറവുണ്ടോ എന്ന് അമ്മയ്ക്ക് സംശയം തോന്നിയിരുന്നു . ഇതേ തുടര്‍ന്ന് സോണിയയെ തൊട്ടടുത്തുള്ള മട്ടാഞ്ചേരിയിലെ സ്ത്രീകളുടെയും കുട്ടികളുടെയും ആശുപത്രിയില്‍ പ്രവേശിപ്പിക്കുകയായിരുന്നു . പരിശോധനകള്‍ക്കു ശേഷം ശസ്ത്രക്രിയ ആവശ്യമെന്നു തോന്നിയതിനാല്‍ കളമശ്ശേരിയില്‍ കിന്‍ഡര്‍ ആശുപത്രിയില്‍ ഇവരെ എത്തിക്കുകയായിരുന്നു.

വൈകീട്ട് 5.40 ന് കുഞ്ഞിനെ ശസ്ത്രക്രിയയിലൂടെ പുറത്തെടുത്തു. 36 ആഴ്ചയായിരുന്നു പ്രായം. അതിനാല്‍ എന്‍ഐസിയുവില്‍ അഡ്മിറ്റ് ചെയ്തു. അമ്മയും കുഞ്ഞും സുഖമായിരിക്കുന്നു. മുമ്പ് 6 തവണ അബോര്‍ഷന്‍ ആയിട്ടുള്ള സോണിയക്ക് ഇത് സന്തോഷത്തിന്റെ ദിവസമായി.

മാതൃ നാട്ടില്‍ തിരിച്ചെത്താന്‍ കഴിഞ്ഞതിന്റെയും മാതൃദിനത്തില്‍ അമ്മയാകാന്‍ കഴിഞ്ഞതിന്റെയും. സോണിയയുടെ ഭര്‍ത്താവ് ഷിജോ കേരളത്തില്‍ നഴ്‌സാണ്. സോണിയ - ഷിജോ ദമ്പതികളെ എറണാകുളം ജില്ലാ കലക്ടര്‍ എസ്.സുഹാസ് ഫെയ്‌സ്ബുക്കിലൂടെ അഭിനന്ദനം അറിയിച്ചു. ഐഎന്‍എസ് ജലാശ്വ കപ്പലില്‍ 698 പേരാണ് കൊച്ചിയിലെത്തിച്ചത്. ഇതില്‍ 19 പേര്‍ ഗര്‍ഭിണികളായിരുന്നു.