നാടുകാണി വഴി കേരളത്തിലേക്ക് പ്രവേശനാനുമതി ഇല്ല; 84 കിലോമീറ്റര് അപ്പുറമുള്ള വീട്ടിലേക്ക് പാസ് അനുവദിച്ചത് 844 കിലോമീറ്റര് ചുറ്റിവളഞ്ഞ്!
നാടുകാണി വഴി കേരളത്തിലേക്ക് വരുന്നതിനു സംസ്ഥാന സര്ക്കാര് അനുമതി നല്കാത്തതിനെ തുടര്ന്നു തമിഴ്നാട്ടിലെ നീലഗിരി ജില്ലയില് കുടുങ്ങി നൂറുക്കണക്കിന് ആളുകള് ദുരിതത്തിലായി.
ഗൂഡല്ലൂര് പെരിയഷോലയില് കുടുങ്ങിയ പൂക്കോട്ടൂര് പുല്ലാരയിലെ ലൈല എന്ന വീട്ടമ്മയ്ക്കും 2 മക്കള്ക്കും നാട്ടിലെത്താന് പാസ് അനുവദിച്ചതു കൊല്ലം ആര്യങ്കാവ് വഴി. പെരിയഷോലയില് നിന്നു നാടുകാണി വഴിയാണെങ്കില് 84 കിലോമീറ്റര് സഞ്ചരിച്ചാല് പൂക്കോട്ടൂര് പുല്ലാരയിലുള്ള വീട്ടിലെത്താമെന്നിരിക്കെ, ആര്യങ്കാവ് വഴിയെത്താന് 844 കിലോമീറ്റര് വേണം. 2 മക്കളുമൊത്ത് ഇത്രയും ദൂരം യാത്ര ചെയ്യാന് കഴിയാത്തതിനാല് യാത്ര ഉപേക്ഷിച്ചു.
ബെംഗളൂരുവില് നിന്നു നിലമ്പൂരിലേക്കു പുറപ്പെട്ട 3 യുവാക്കളേയും നാടുകാണി ചെക്പോസ്റ്റില് മടക്കിയതിനെ തുടര്ന്ന് 4 ദിവസമായി ഗൂഡല്ലൂരില് കഴിയുകയാണ്. അവരുടെ കയ്യിലുണ്ടായിരുന്ന പണം തീര്ന്നപ്പോള് ഭക്ഷണം കഴിക്കാന് മാര്ഗമില്ലാതെയായി. ഒടുവില് നാട്ടുകാരാണ് ഇവരെ സഹായിച്ചത്.
നാടുകാണി വഴി യാത്രാ അനുമതി ലഭിച്ചില്ലെങ്കില് ഇവര്ക്കൊന്നും ഉടനെ നാട്ടിലെത്താന് കഴിയില്ല. നാടുകാണി വഴിയല്ലെങ്കില് കേരളത്തിലെത്താന് അടുത്തുള്ള 2 പ്രവേശന കേന്ദ്രങ്ങള് മുത്തങ്ങയും വാളയാറുമാണ്.
നീലഗിരിയിലുള്ളവര്ക്കു മുത്തങ്ങയിലെത്താന് അതിര്ത്തികളിലെ തടസ്സം കാരണം സാധിക്കുന്നില്ല. കുനൂര്, കോയമ്പത്തൂര്, മേട്ടുപ്പാളയം എന്നീ 3 റെഡ്സോണുകളിലൂടെ യാത്ര ചെയ്താലേ വാളയാറിലെത്താനാവൂ. ഇവ റെഡ് സോണ് ആയതിനാല് ഇതുവഴി യാത്ര അനുമതി നല്കുന്നില്ല. നീലഗിരി ജില്ലയില് കുടുങ്ങിയവരില് കൂടുതലും മലപ്പുറം ജില്ലയിലുള്ളവരാണ്.
https://www.facebook.com/Malayalivartha