ചന്ദ്രബോസ് കൊലക്കേസില്‍ പ്രതി മുഹമ്മദ് നിസാമിനെതിരായ കുറ്റപത്രം നാളെ കോടതിയില്‍ സമര്‍പ്പിക്കും. കേസന്വേണം പെട്ടന്ന് തീര്‍ക്കുകയും നിസാമിനെ കാപ്പചുമത്തി അകത്തിടുകയും ചെയ്ത നിശാന്തിനിക്ക് ഇതിനോടകം തന്നെ പൊതുജനങ്ങളുടെ പിന്തുണ കിട്ടിയിട്ടുണ്ട്. കുറ്റപത്രം 90 ദിവസത്തിനകം സമര്‍പ്പിക്കണമെന്നാണ് ചട്ടം. നാളെ 60 ദിവസം മാത്രമാണ് പിന്നിടുക. കഴിഞ്ഞദിവസം ഇന്ന് കുറ്റപത്രം സമര്‍പ്പിക്കുമെന്നാണ് പറഞ്ഞിരുന്നത്. പോലീസിന്റെ എല്ലാ നടപടികളും പൂര്‍ത്തിയായതായി സ്‌പെഷ്യല്‍ പബ്ലിക് പ്രോസിക്യൂട്ടര്‍ സി.പി. ഉദയഭാനു പറഞ്ഞു. ഫോറന്‍സിക് ലാബിന്റെ പരിശോധനാ ഫലം കൂടി ലഭിക്കാനുണ്ട്.
നൂറോളം സാക്ഷികളാണ് കേസിലുള്ളത്. ഇതില്‍ 12 പേര്‍ സംഭവം നേരിട്ട് കണ്ടവരാണ്. പൊലീസിന്റ അന്വേഷണം തൃപ്തികരമാണ്. അന്വേഷണത്തില്‍ പുരോഗതിയുണ്ടായിട്ടുണ്ടെന്നും ഉദയഭാനു പറഞ്ഞു. സാക്ഷികള്‍ കൂറ് മാറുമെന്ന് കരുതുന്നില്ല. കൂറ് മാറിയാല്‍ കോടതിയുമായി ആലോചിച്ച് തീരുമാനം എടുക്കും. കാപ്പ ചുമത്തിയതും കുറ്റപത്രവുമായി ബന്ധമില്ലെന്നും അദ്ദേഹം മാധ്യമങ്ങളോട് പറഞ്ഞു.
തൃശൂരിലെത്തിയ പ്രോസിക്യൂട്ടര്‍ കേസ് അന്വേഷണത്തിന്റ പുരോഗതി ഉദ്യോഗസ്ഥരുമായി ചര്‍ച്ച ചെയ്തു. സിറ്റി പൊലീസ് കമ്മിഷണര്‍ ആര്‍. നിശാന്തിനിയുമായും ചര്‍ച്ച നടത്തി.കുന്നംകുളം ജുഡിഷല്‍ മജിസ്‌ട്രേട്ട് കോടതിയിലാണ് കുറ്റപത്രം സമര്‍പ്പിക്കുക. തുടര്‍ന്ന് കേസ് ജില്ലാ സെഷന്‍സ് കോടതിയിലേക്ക് കമ്മിറ്റ് ചെയ്യും. ഏപ്രിലില്‍ വിചാരണ തുടങ്ങും. അവധിക്കാലമായതിനാല്‍ അതിവേഗ വിചാരണ നടത്തണമെന്ന് ഹൈക്കോടതിയില്‍ ആവശ്യപ്പെടുമെന്ന് ഉദയഭാനു നേരത്തേ വ്യക്തമാക്കിയിരുന്നു.
കുറ്റപത്രത്തിന് അഞ്ഞൂറോളം പേജ് ഉണ്ടാകുമെന്നാണ് കരുതുന്നത്. കുറ്റപത്രം പഴുതുകളില്ലാത്തതാക്കാന്‍ പ്രോസിക്യൂട്ടര്‍ ഒരാഴ്ച ഉദ്യോഗസ്ഥരുമായി ചര്‍ച്ച നടത്തിയിരുന്നു. ഒട്ടേറെ ഭേദഗതികള്‍ വരുത്തി. നിസാമിന്റെ ഭാര്യ അമല്‍ അടക്കം 12 സാക്ഷികളുടെ മൊഴി സി.ആര്‍.പി.സി 164 പ്രകാരം മജിസ്‌ട്രേട്ട് രേഖപ്പെടുത്തിയിട്ടുണ്ട്. അതിനാല്‍ മൊഴി മാറ്റാനാവില്ല. ശോഭ സിറ്റിയിലെ നാല് സെക്യൂരിറ്റി ജീവനക്കാര്‍, സംഭവദിവസം അവിടെ വന്ന ലോറിയിലെ ജീവനക്കാര്‍, മറ്റ് ഫ്‌ലാറ്റുകളിലെ ഏതാനും താമസക്കാര്‍ എന്നിവരാണ് മറ്റു സാക്ഷികള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha