കേരള കോണ്‍ഗ്രസ് വിടില്ലെന്ന് പി.സി. ജോര്‍ജ്. മാണി വേണമെങ്കില്‍ പൊയ്‌ക്കോട്ടെ. തന്നെ പുറത്താക്കാന്‍ മാണിക്ക് അവകാശമില്ല. രാജ്യസഭാ തിരഞ്ഞെടുപ്പില്‍ കോണ്‍ഗ്രസിന് വോട്ടു ചെയ്യും. ഓപ്പണ്‍ വോട്ട് ചെയ്യാന്‍ അനുവദിക്കണമെന്നു സ്പീക്കറോട് ആവശ്യപ്പെടുമെന്നും ജോര്‍ജ് പറഞ്ഞു.
അതേസമയം, പി.സി. ജോര്‍ജിനെ ചീഫ് വിപ്പ് സ്ഥാനത്ത് നിന്ന് നീക്കിക്കൊണ്ടുള്ള തീരുമാനം നാളെ ഉണ്ടാകും.ദുബായില്‍ നിന്ന് മടങ്ങിയ മുഖ്യമന്ത്രി ഘടകകക്ഷിനേതാക്കളുമായും കോണ്‍ഗ്രസിലെ പ്രമുഖരുമായും ആലോചിച്ചു. ഈസ്റ്റര്‍ കഴിഞ്ഞ് നടപടി പ്രഖ്യാപിക്കാമെന്ന് തീരുമാനിക്കുകയുമായിരുന്നു. ഇതോടെ ബാര്‍കോഴ കേസിലും അന്വേഷണത്തിലും അതൃപ്തിയോടെ ഇടഞ്ഞു നില്‍ക്കുന്ന കെ.എം. മാണിയെ അനുനയിപ്പിക്കാമെന്നാണ് യുഡിഎഫ് നേതൃത്വത്തിന്റെ കണക്കുകൂട്ടല്‍.
കെ.എം. മാണിയും പി.ജെ. ജോസഫും ഒരുമിച്ച് പി.സി. ജോര്‍ജിനെ ചീഫ് വിപ്പ് സ്ഥാനത്ത് നിന്നു മാറ്റണമെന്നു മുഖ്യമന്ത്രിയോട് നേരത്തെ ആവശ്യപ്പെട്ടിരുന്നു. മുഖ്യമന്ത്രി ദുബായിലേക്ക് പോകും മുന്‍പ് മാണിയെ അനുനയിപ്പിക്കാനുള്ള ശ്രമങ്ങളുണ്ടായെങ്കിലും മാണി കടുത്ത നിലപാടില്‍ തന്നെ ഉറച്ചു നിന്നു. ജോര്‍ജിനെ മാറ്റിയേ മതിയാകൂ എന്ന തീരുമാനത്തില്‍ മാറ്റമില്ലെന്ന് മാണി മുഖ്യമന്ത്രിയോടും പി.കെ. കുഞ്ഞാലിക്കുട്ടിയോടും കടുപ്പിച്ച് തന്നെ പറഞ്ഞു.
20ന് നടക്കുന്ന രാജ്യസഭാ തിരഞ്ഞെടുപ്പില്‍ രണ്ട് സ്ഥാനാര്‍ത്ഥികളെ ജയിപ്പിക്കാമെന്ന ഉറപ്പും ഇതോടെ ആയി. ഇനി കീറാമുട്ടിയാകുക ജോര്‍ജിനെ മുന്നണിയില്‍ നിലനിറുത്തുക എന്നതാണ്. ജോര്‍ജും മാണിയും തമ്മിലുള്ള തുറന്ന പോര് കൈകാര്യം ചെയ്യുക എന്നതും മുഖ്യമന്ത്രിക്കും മുന്നണിക്കും ശ്രമകരമാകും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha