കെ.പി.സി.സി. നേതൃയോഗത്തില്‍ വൈസ് പ്രസിഡന്റുമാരായ എം.എം.ഹസ്സനും വി.ഡി.സതീശനും തമ്മില്‍ ഉഗ്രമായ വാക്‌പോര്. എക്‌സിക്യൂട്ടീവിന് മുമ്പ് ചേര്‍ന്ന ഭാരവാഹികളുടെ യോഗത്തിലാണ് ഉപാധ്യക്ഷന്മാരായ ഇരുവരും തമ്മില്‍ പോരാടിയത്. ഘടകകക്ഷി മന്ത്രിമാരുടെ അഴിമതി സംരക്ഷിക്കേണ്ട കാര്യം കോണ്‍ഗ്രസ്സിനില്ലെന്നും അങ്ങനെ ചെയ്യുന്നതിന് വലിയ വിലനല്‍കേണ്ടിവരുമെന്നുമാണ് മുന്‍ നേതൃയോഗത്തിലെന്നപോലെ സതീശന്‍ ഉന്നയിച്ച വിമര്‍ശം.
ഘടകകക്ഷികള്‍ക്ക് അതുകൊണ്ട് വലിയ പ്രശ്‌നമൊന്നും ഉണ്ടാകില്ല. എന്നാല്‍, സംസ്ഥാനം മുഴുവന്‍ ഇതിന് മറുപടി നല്‍കേണ്ടിവരുന്നത് കോണ്‍ഗ്രസ്സായിരിക്കും. മന്ത്രിയെയും മുന്നണിയെയും സംരക്ഷിക്കാന്‍ മുഖ്യമന്ത്രി ഓടിനടക്കുമ്പോള്‍ പാര്‍ട്ടിയെ ആര് സംരക്ഷിക്കും. നേതൃത്വത്തെ ആശ്രയിച്ച് മുന്നോട്ടുപോകുന്ന പാര്‍ട്ടിയാണ് കോണ്‍ഗ്രസ്. നേതൃത്വം കൃത്യസമയത്ത് തീരുമാനമെടുക്കണം. എന്നാല്‍, ഇക്കാര്യത്തില്‍ അതുണ്ടായില്ല.
പാര്‍ലമെന്റ് തിരഞ്ഞെടുപ്പ് മുതലാണ് യു.ഡി.എഫിന്റെ ഗ്രാഫ് താഴേക്കുപോയത്. അതിനുള്ള കാരണങ്ങള്‍ കൃത്യമായി വിലയിരുത്തണം. യു.പി.എ. സര്‍ക്കാരിന് വിനയായത് അഴിമതിയാരോപണങ്ങളായിരുന്നു. അഴിമതിക്കെതിരായ മനോഭാവം ജനങ്ങളിലുണ്ട്. പ്രതിപക്ഷം ഇതില്‍പ്പിടിച്ച് ഉയര്‍ത്തെഴുന്നേല്‍ക്കാനാണ് നോക്കുന്നത്.
രാജ്യസഭാസ്ഥാനാര്‍ഥിയെ നിര്‍ണയിച്ച രീതിയെയും സതീശന്‍ വിമര്‍ശിച്ചു. വയലാര്‍ രവിക്ക് സീറ്റ് നല്‍കിയതിന്റെ മെറിറ്റിലേക്ക് പോകുന്നില്ല. എന്നാല്‍, സ്ഥാനാര്‍ഥിയെ നിശ്ചയിക്കാന്‍ പാര്‍ട്ടിയില്‍ തിരഞ്ഞെടുപ്പ് സമിതിയുണ്ട്. അത് കൂടിയായിരുന്നില്ല തീരുമാനമെന്നും അദ്ദേഹം പറഞ്ഞു.
സതീശന്റെ പ്രസംഗം കഴിഞ്ഞപ്പോള്‍ ഹസ്സന്‍ എഴുന്നേറ്റു. ക്രിയാത്മക ചര്‍ച്ച എന്നുകരുതിയാണ് ഒന്നും പറയാഞ്ഞത്. ഇത്രയും പറഞ്ഞപ്പോള്‍ മറുപടി പറയാതിരിക്കാന്‍ കഴിയില്ലെന്ന് പറഞ്ഞായിരുന്നു ഹസ്സന്റെ വിമര്‍ശം. മുന്നണിഭരണമാകുമ്പോള്‍ ഘടകകക്ഷികളെ സംരക്ഷിക്കേണ്ടിവരും. സോളാര്‍പ്രശ്‌നവും മറ്റുമുണ്ടായപ്പോള്‍ മറ്റ് കക്ഷികള്‍ കോണ്‍ഗ്രസ്സിനെ തുണച്ചിട്ടുണ്ട്. ഘടകകക്ഷികള്‍ നടത്തിയതിേനക്കാള്‍ എത്രയോ വലിയ അഴിമതി നടക്കുന്നുണ്ട്. ഘടകകക്ഷികള്‍ അതൊക്കെ പറഞ്ഞാല്‍ എന്താകും സ്ഥിതി.
ഇതിനൊക്കെ തനിക്ക് മറുപടിയുണ്ടെന്ന് സതീശന്‍ തിരിച്ചടിച്ചു. തെറ്റായ സന്ദേശം പുറത്തേക്ക് കൊടുക്കാനാണെങ്കില്‍ ഇങ്ങനെ യോഗം ചേരേണ്ട ആവശ്യമില്ലെന്ന് പി.സി.വിഷ്ണുനാഥ് പറഞ്ഞു. പാര്‍ട്ടിയെയും സര്‍ക്കാരിനെയും ബലപ്പെടുത്താന്‍ തക്ക നിര്‍ദ്ദേശങ്ങള്‍ക്കായല്ലെങ്കില്‍ യോഗം ചേരുന്നതുകൊണ്ട് പ്രയോജനമില്ലെന്നും വിഷ്ണുനാഥ് പറഞ്ഞു.
തുടര്‍ന്ന് കെ.പി.സി.സി. പ്രസിഡന്റ് വി.എം.സുധീരന്‍ ചര്‍ച്ച ഉപസംഹരിച്ചു. ഒമ്പതിന് ചേരുന്ന പാര്‍ട്ടി സര്‍ക്കാര്‍ ഏകോപനസമിതി യോഗത്തില്‍ ഉന്നയിക്കേണ്ട വിഷയങ്ങള്‍ ചര്‍ച്ചയായി. കെ.പി.സി.സി. എക്‌സിക്യൂട്ടീവില്‍ അവതരിപ്പിക്കേണ്ട പ്രമേയങ്ങള്‍ക്കും യോഗം രൂപംനല്‍കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha