ചീഫ് വിപ്പ് സ്ഥാനത്ത് നിന്ന് പി സി ജോര്‍ജിനെ നീക്കി. മുഖ്യമന്ത്രി ഉമ്മന്‍ ചാണ്ടി മാദ്ധ്യമങ്ങളെ അറിയിക്കുകയായിരുന്നു ഇക്കാര്യം. ഒത്തുതീര്‍പ്പിന് ധനമന്ത്രി കെ എം മാണി തയ്യാറാകാത്ത സാഹചര്യത്തിലാണ് ഇത്. ചീഫ് വിപ്പ് സ്ഥാനത്ത് നിന്ന് പുറത്താകുന്ന ജോര്‍ജിന് യുഡിഎഫ് യോഗത്തിലും പങ്കെടുക്കാന്‍ കഴിയില്ല.
എന്നാല്‍, തന്റെ നിലപാടുകളില്‍ നിന്ന് ഒരിഞ്ചു പോലും പിന്നോട്ടില്ലെന്ന് രാത്രി ഒമ്പതരയോടെ മുഖ്യമന്ത്രിയുമായി നടത്തിയ ചര്‍ച്ചകള്‍ക്കുശേഷം പുറത്തിറങ്ങിയ പി സി ജോര്‍ജ് പറഞ്ഞു. രാജിവക്കില്ലെന്ന് മാദ്ധ്യമങ്ങള്‍ക്കു മുമ്പില്‍ ജോര്‍ജ് ആവര്‍ത്തിച്ചു. വേണമെങ്കില്‍ തന്നെ പുറത്താക്കിക്കോട്ടെ എന്നാണ് ജോര്‍ജ് പറഞ്ഞത്. ഒമ്പതാം തീയതി ജനങ്ങളോട് എല്ലാം തുറന്നു പറയുമെന്ന് പി സി ജോര്‍ജ് പറഞ്ഞു.
സോളാര്‍ കത്ത് പുറത്തുവന്നതോടെയാണ് ആര്‍ക്കും ജോര്‍ജിനെ രക്ഷിക്കാന്‍ കഴിയാത്ത സ്ഥിതി വന്നത്. അഞ്ചേകാലോടെ മുഖ്യമന്ത്രിയെ കാണാന്‍ ജോര്‍ജ് സെക്രട്ടറിയേറ്റിലെത്തിയിരുന്നു. വ്യവവസായ മന്ത്രി പികെ കുഞ്ഞാലിക്കുട്ടിയുടേയും ആഭ്യന്തര മന്ത്രി രമേശ് ചെന്നിത്തലയുടേയും സാന്നിധ്യത്തില്‍ ചര്‍ച്ച നടത്തി തീരുമാനം അറിയിക്കുകയായിരുന്നു. ഏതെങ്കിലും സാഹചര്യത്തില്‍ രാജി നല്‍കിയില്ലെങ്കില്‍ ജോര്‍ജിനെ ചീഫ് വിപ്പ് സ്ഥാനത്ത് നിന്ന് പുറത്താക്കുമെന്ന ഉറപ്പ് മാണിക്ക് മുഖ്യമന്ത്രി നല്‍കി കഴിഞ്ഞു. ഇനിയും സര്‍ക്കാരിനെ പ്രതിസന്ധിയിലാക്കുന്ന ജോര്‍ജിന്റെ നടപടികള്‍ അംഗീകരിക്കാന്‍ കഴിയില്ലെന്ന മാണിയുടെ നിലപാട് ഉമ്മന്‍ ചാണ്ടിയും അംഗീകരിക്കുകയാണ്.
നിലവിലെ രാഷ്ട്രീയ സാഹചര്യത്തില്‍ യുഡിഎഫില്‍ തന്നെ തുടരാനേ ജോര്‍ജിന് കഴിയൂ. ഇടതു പക്ഷത്തേക്ക് ജോര്‍ജിനെ എടുക്കില്ലെന്ന വ്യക്തമായ സൂചകള്‍ മുഖ്യമന്ത്രിക്ക് കിട്ടിക്കഴിഞ്ഞു. ഇതെല്ലാം പരിഗണിച്ചാണ് തീരുമാനം. ജോര്‍ജ് പിണങ്ങിയാലും രാജ്യസഭയിലേക്ക് രണ്ട് പേരെ ജയിപ്പിക്കാന്‍ യുഡിഎഫിന് കഴിയും. ഈ സാഹചര്യത്തില്‍ മാണിയെ പിണക്കുന്നത് ഗുണകരമാകില്ലെന്ന് മുഖ്യമന്ത്രിക്ക് അറിയാം. തന്റെ തീരുമാനം കെപിസിസി അധ്യക്ഷന്‍ സുധീരനേയും ആഭ്യന്തര മന്ത്രി രമേശ് ചെന്നിത്തലയേയും അറിയിച്ചിരുന്നു. അങ്ങനെയാണ് പുറത്താക്കാനുള്ള കൂട്ടായ തീരുമാനം എടുത്തത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha