യുഡിഎഫ് യോഗം തുടങ്ങി, സര്‍ക്കാരിന്റെ പ്രതിശ്ചായ വര്‍ധിപ്പിക്കണമെന്ന് ആവശ്യം, അഴിമതിക്കാരെ സംരക്ഷിക്കുന്നതില്‍ ആര്‍എസ്പിക്കും ജനതാദളിനും അതൃപ്തി
നിയമസഭാ തിരഞ്ഞെടുപ്പിന് ഇനി ഒരു വര്‍ഷം മാത്രം ശേഷിക്കെ സര്‍ക്കാരിന്റെ പ്രതിശ്ചായ വര്‍ധിപ്പിച്ച് ജനസ്വാധീനം ഉറപ്പുവരുത്തുന്ന കാര്യങ്ങള്‍ ചര്‍ച്ച ചെയ്യുന്നതിനായി കൂടിയ യുഡിഎഫ് യോഗം തുടങ്ങി. എല്ലാ ഘടക കക്ഷി നേതാക്കളും യോഗത്തില്‍ പങ്കെടുക്കുന്നുണ്ട്. പി.സി. ജോര്‍ജ് വിഷയത്തിലും സരിതാ നായരുടെ കത്തിലും കുരുങ്ങി സര്‍ക്കാറും മുന്നണിയും വിവാദങ്ങളുടെ നടുക്കടലില്‍ അകപ്പെട്ടിരിക്കെ മുഴുദിന യു.ഡി.എഫ് യോഗം ഇന്ന് ചേരുന്നുന്നത്. കോവളം ഗവ. ഗെസ്റ്റ്ഹൗസിലാണ് യോഗം നടക്കുന്നത്. സര്‍ക്കാര്‍ ഇതുവരെ നടപ്പാക്കിയ പദ്ധതികളെക്കുറിച്ച് വിലയിരുത്താനും അടുത്ത ഒരുവര്‍ഷത്തെ പരിപാടികള്‍ക്ക് രൂപംനല്‍കാനുമാണ് യോഗം പ്രധാനമായും വിളിച്ചുചേര്‍ത്തത്. ഇതിനായി എല്ലാ പാര്‍ട്ടികളുടെയും നിര്‍ദേശങ്ങള്‍ യോഗത്തില്‍ ചര്‍ച്ചചെയ്യും.
നിയമസഭാ തെരഞ്ഞെടുപ്പിന് ഒരുവര്‍ഷം മാത്രം ബാക്കിനില്‍ക്കെ സര്‍ക്കാറിന്റെ മുന്‍ഗണനകളില്‍ മാറ്റംവേണമെന്ന അഭിപ്രായം കോണ്‍ഗ്രസ് ഉള്‍പ്പെടെ ഘടകകക്ഷികളില്‍ ശക്തമാണ്. സര്‍ക്കാര്‍ ഒട്ടേറെ നല്ലകാര്യങ്ങള്‍ ചെയ്‌തെങ്കിലും തുടര്‍ച്ചയായ വിവാദങ്ങള്‍ കാരണം അവയൊന്നും ജനങ്ങളിലേക്കത്തെിക്കാന്‍ കഴിഞ്ഞില്ലെന്ന അഭിപ്രായം മുന്നണിയിലുണ്ട്.സാധാരണക്കാരെ ആകര്‍ഷിക്കുന്ന തരത്തില്‍ സര്‍ക്കാറിന്റെ മുന്‍ഗണനകളില്‍ മാറ്റംവേണമെന്ന ആവശ്യമാണ് പൊതുവെ ഉയര്‍ന്നിട്ടുള്ളത്. അതിനനുസൃതമായി ഇന്നത്തെ യോഗം സര്‍ക്കാറിന്റെ പരിപാടികള്‍ക്ക് രൂപംനല്‍കും. നിയമസഭാ തെരഞ്ഞെടുപ്പ് ഉള്‍പ്പെടെ മുന്നില്‍കണ്ട് സര്‍ക്കാറിന്റെ പ്രവര്‍ത്തനപരിപാടികളില്‍ മാറ്റംവരുത്താന്‍ ശ്രമിക്കുന്നതിനിടെയാണ് പുതിയ വിവാദങ്ങള്‍ വന്നത്. ഇവയെ കുറിച്ചുള്ള ചര്‍ച്ചയും ഉണ്ടാവുമെന്നാണ് കരുതുന്നത്.
ചീഫ് വിപ്പ് സ്ഥാനത്തുനിന്നും മുന്നണിയുടെ ഉന്നതാധികാര സമിതിയില്‍നിന്നും ജോര്‍ജിനെ മാറ്റിയശേഷം ചേരുന്ന ആദ്യ യു.ഡി.എഫ് യോഗമാണ് ഇന്നത്തേത്. ജോര്‍ജിനെ നീക്കിയത് മുന്നണിയെ ദോഷകരമായി ബാധിക്കുന്ന തരത്തിലേക്ക് എത്തിയിട്ടുണ്ട്. കെ.എം. മാണിക്കും മകനുമെതിരെ കടുത്ത ആരോപണങ്ങളുന്നയിച്ച് ജോര്‍ജ് രംഗത്തത്തെിയത് അദ്ദേഹം നടത്താന്‍ പോകുന്ന നീക്കങ്ങളുടെ തുടക്കം മാത്രമാണ്. മുന്നണിയെ ബാധിക്കാത്ത തരത്തില്‍ ഈപ്രശ്‌നം പരിഹരിക്കണമെന്ന ആവശ്യം യോഗത്തില്‍ ഉയര്‍ന്നേക്കും. സരിത കൈവശം സൂക്ഷിച്ചിരുന്ന കത്തിലെ ചിലഭാഗങ്ങള്‍ പുറത്തുവന്നത് സര്‍ക്കാറിനും യു.ഡി.എഫിനും പുതിയ തലവേദനയാണ്. പ്രതിപക്ഷം ഇത് ഏറ്റെടുക്കുമെന്നതില്‍ സംശയമില്ല.
ഇക്കാര്യവും യോഗത്തില്‍ ചര്‍ച്ചയായേക്കും. അരുവിക്കര ഉപതെരഞ്ഞെടുപ്പ്, നെല്‍വയല്‍തണ്ണീര്‍ത്തട നിയമത്തില്‍ വരുത്തേണ്ട ഭേദഗതി ഉള്‍പ്പെടെയുള്ള കാര്യങ്ങളും ചര്‍ച്ചക്കുവരും.പാലക്കാട് ലോക്‌സഭാ സീറ്റിലെ പരാജയം സംബന്ധിച്ച് അന്വേഷിക്കുന്ന മുന്നണി ഉപസമിതിയുടെ യോഗവും ഇന്ന് നടക്കും. സമിതി ചെയര്‍മാനായിരുന്ന ആര്‍. ബാലകൃഷ്ണപിള്ള മുന്നണിവിട്ട സാഹചര്യത്തില്‍ യു.ഡി.എഫ് കണ്‍വീനര്‍ പി.പി. തങ്കച്ചന്റെ നേതൃത്വത്തിലായിരിക്കും യോഗം. എന്നാല്‍ പാലക്കാട്ടെ തോല്‍വി സംബന്ധിച്ച അന്വേഷണ റിപ്പോര്‍ട്ട് വൈകുന്നതില്‍ എം.പി. വീരേന്ദ്രകുമാര്‍ നയിക്കുന്ന ജനതാദള്‍ യുവിന് കടുത്ത അതൃപ്തി ഉണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
