പി.സി ജോര്‍ജ് പാര്‍ട്ടിയിലെ പ്രതിപക്ഷ നേതാവെന്ന് കെ.എം മാണി. ആരെങ്കിലും എന്തെങ്കിലും പറയുന്നത് കേട്ട് വകുപ്പൊഴിഞ്ഞ് വീട്ടില്‍ പോകാന്‍ താന്‍ ഭീരുവല്ലെന്നും മാണി പറഞ്ഞു. തനിക്കും മകനുമെതിരായ ആരോപണങ്ങളില്‍ യുഡിഎഫിലും ഗൂഢാലോചനയുണ്ടെന്ന് കെ.എം.മാണി പറഞ്ഞു. അതുകൊണ്ടാണ് ഒറ്റതിരിഞ്ഞുള്ള നീക്കമുണ്ടാകുന്നത്. നീക്കത്തിന് പിന്നില്‍ ആരാണെന്ന് അറിയാം. ജോര്‍ജിന്റെ ആരോപണങ്ങള്‍ അടിസ്ഥാനരഹിതവും തേജോവധം ലക്ഷ്യമിട്ടിട്ടുള്ളതുമാണെന്നും മാണി പറഞ്ഞു.

എന്തിനെയും നേരിടാന്‍ തയാറാണ്. എതിര്‍പ്പുകണ്ട് പേടിക്കുന്നവരാണോ നമ്മള്‍. കറയില്ലെങ്കില്‍ നമുക്ക് ആരെ വേണമെങ്കിലും നേരിടാം. ആരെങ്കിലും വിളിച്ചു കൂവിയാല്‍ വകുപ്പുപേക്ഷിച്ചു പോകാന്‍ താന്‍ ഭീരുവല്ല. അന്വേഷണത്തെ താന്‍ തടസ്സപ്പെടുത്തുന്നില്ല. അവര്‍ എത്ര വേണമെങ്കിലും അന്വേഷിക്കട്ടെ. ഇതുവരെ  തെളിവുകളൊന്നും കിട്ടിയില്ലല്ലോയെന്നും മാണി ചോദിച്ചു.മറ്റു മന്ത്രിമാര്‍ക്കെതിരെ നടപടിയെടുക്കാത്തതില്‍ വിവേചനമുണ്ടെന്ന് ജനങ്ങള്‍ക്ക് തോന്നാം.

തന്റെ സ്വത്തു സമ്പാദനം സംബന്ധിച്ചുള്ള ഏത് അന്വേഷണവും സ്വാഗതം ചെയ്യുന്നു.എഫ്‌ഐആര്‍ റദ്ദാക്കണമെന്ന് ആവശ്യപ്പെട്ട് കോടതിയില്‍ പോകില്ല. ഭയമില്ലാത്തതുകൊണ്ടാണ് കോടതിയില്‍ പോകാത്തത്. പി.സി.ജോര്‍ജിന് മറുപടി നല്‍കാന്‍ മാത്രം നിലവാര തകര്‍ച്ചയില്ല. രാവിലെ മുതല്‍ വൈകീട്ട് വരെ ഓരോന്നും പറഞ്ഞു കൊണ്ടു നടക്കുന്നതാണ് പി.സി. ജോര്‍ജിന്റെ സ്വഭാവം.

വായില്‍ തോന്നിയത് കോതയ്ക്കു പാട്ടെന്നതാണ് രീതി. പാര്‍ട്ടിയിലെ പ്രതിപക്ഷ നേതാവാണ് പി.സി.ജോര്‍ജെന്നും മാണി പറഞ്ഞു. ധനകാര്യമന്ത്രിമാരുടെ ഉന്നതാധികാരസമിതി അധ്യക്ഷന്‍ എന്നത് ഭാരിച്ച ഉത്തരവാദിത്വമാണെന്നും മാണി ഡല്‍ഹിയില്‍ പറഞ്ഞു. എല്ലാക്കാര്യങ്ങളിലും മാധ്യമങ്ങളുടെ പിന്തുണ വേണമെന്നും മാണി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha