കോവളത്തെ മൂത്തൂറ്റിന്റെ സ്വകാര്യപണമിടപാട് സ്ഥാപനങ്ങളില്‍ നിന്ന് 50 ലക്ഷം രൂപയുടെ സ്വര്‍ണവും, 1.60 ലക്ഷം രൂപയും കവര്‍ന്നത് ജാര്‍ഖണ്ഡിലെ തിരുട്ടു ഗ്രാമമായ സാഹിബ്ഗഞ്ചില്‍ നിന്നുള്ള സംഘം. അക്രം എന്നയാളുടെ നേതൃത്വത്തിലുള്ള കവര്‍ച്ചാ സംഘത്തിലെ അഞ്ചു പേരെയും പോലീസ് കണ്ടെത്തി. പക്ഷേ രാജ്യത്തുടനീളം വമ്പന്‍ മോഷണം നടത്തുന്നവരുടെ ആസ്ഥാനമായ സാഹിബ്ഗഞ്ചില്‍ കയറി കൊള്ള സംഘത്തെ പിടികൂടാന്‍ പോലീസിന് കഴിയില്ല. മാവോയിസ്റ്റുകളുടെ സ്വാധീന കേന്ദ്രമായ അവിടെ സിറ്റി പോലീസിന് ഒരു ഓപ്പറേഷന്‍ നടത്താനുമാവില്ല. തമ്പാനൂര്‍ സിഐയുടെ നേതൃത്വത്തിലുള്ള ആറംഗ പോലീസ് സംഘം സാഹിബ്ഹഞ്ച് ജില്ലാ പോലീസ് സൂപ്രണ്ടിന്റെ നിര്‍ദ്ദേശപ്രകാരം അവിടത്തെ പോലീസ് ക്ലബ്ബില്‍ തങ്ങുകയാണ്.
കൊള്ളസംഘത്തെ അവരുടെ സങ്കേതത്തിന് പുറത്തെത്തിച്ച് മിന്നല്‍ ഓപ്പറേഷന്‍ നടത്തുകയാണ് ഇനിയുള്ള പോംവഴി. സിറ്റി പോലീസ് കമ്മീഷണര്‍ എച്ച് വെങ്കടേശ്, സാഹിബ്ഗഞ്ച്, എസ്.പി സുനില്‍ഭാസ്‌കര്‍, ഡി.ഐ.ജിമാരായ ഉപേന്ദ്രപ്രസാദ്, ശംഭൂതാക്കൂര്‍ എന്നിവരോട് ഓപ്പറേഷനുള്ള സഹായം തേടിയിട്ടുണ്ട്. ഇന്ന് വൈകിട്ടോടെ പ്രതികളെ പിടികൂടാനാവുമെന്നാണ് പോലീസിന്റെ പ്രതീക്ഷ.
മൂത്തൂറ്റ് ഫിനാന്‍സ് കവര്‍ച്ച ചെയ്യുന്നതിന് മുമ്പ് കോവളത്തെ സെന്‍ട്രല്‍ ബാങ്ക്, ഫെഡറല്‍ ബാങ്ക് എടിഎം എന്നിവ കവര്‍ച്ച നടത്താനും സംഘം ശ്രമിച്ചിരുന്നു. തിരുവനന്തപുരത്തു നിന്ന് മധുരയിലേയ്ക്ക് പോയ ദേശീയ പാതയിലെ ടോള്‍ ബൂത്തുകളില്‍ നിന്ന് പോലീസിന് കാര്യമായ വിവരങ്ങളൊന്നും കിട്ടിയില്ലെങ്കിലും എടിഎമ്മിലെ സിസിടിവി ക്യാമറാ ദൃശ്യങ്ങളില്‍ നിന്ന് പ്രതികളുടെ ചിത്രം വ്യക്തമായി. ഇത് ദേശീയ ക്രൈം നെറ്റ് വര്‍ക്കിലിട്ടപ്പോഴാണ് ജാര്‍ഖണ്ഡ് പോലീസ് കൊള്ള സംഘത്തെ തിരിച്ചറിഞ്ഞത്.
രാജ്യത്തുടനീളം വന്‍കൊള്ള നടത്തിയിട്ടുള്ള സാഹിബ്ഗഞ്ചിലെ കള്ളന്മാര്‍ക്ക് അവിടെ കാര്യമായ സംരക്ഷണമാണുള്ളത്. കോവളത്തു നിന്ന് കവര്‍ച്ച മുതലുമായി പോയ അഞ്ചു പേരില്‍ മൂന്നു പേരും അവരുടെ ഫോണുകള്‍ ഓണാക്കി ഉപയോഗിച്ചു. മൊബൈല്‍ ടവര്‍ കേന്ദ്രീകരിച്ചുള്ള അന്വേഷണത്തില്‍ കൊള്ളസംഘം സാഹിബ്ഗഞ്ച് ജില്ലയിലൂടെ പലയിടത്തേക്കും സഞ്ചരിക്കുന്നതായി വ്യക്തമായി. സാഹിബ്ഗഞ്ച് പോലീസ്, രഹസ്യാന്വേഷണ വിഭാഗത്തിന്റെ ചാരന്മാര്‍ ഇവരുടെ സങ്കേതം വരെ കണ്ടെത്തിയെങ്കിലും പോലീസിന്റെ നിയന്ത്രണത്തിലുളള സ്ഥലത്തേക്ക് ഇവര്‍ എത്തുന്നതുവരെ കാത്തിരിക്കാനാണ് ജാര്‍ഖണ്ഡ് പോലീസിന്റെ തീരുമാനം.
ജൂവലറികളും ബാങ്കുകളും കൊള്ളയടിക്കുന്നതിന് പ്രത്യേക പരിശീലനം നേടിയവരാണ് ജാര്‍ഖണ്ഡിലെ സാഹിബ്ഗഞ്ച് ഗ്രാമത്തിലുളളവര്‍. ഇവര്‍ക്ക് മാസശമ്പളമാണ്. ഗ്രാമം മുഴുവന്‍ മോഷണം തൊഴിലായി സ്വീകരിച്ചിരിക്കുന്നു. ഗംഗയിലെ ദ്വീപുകളാണ് താവളം. ബംഗ്ലാദേശ് അതിര്‍ത്തിയിലേക്ക് അധിക ദൂരമല്ലാത്തതിനാല്‍ അവിടെ കുറ്റകൃത്യങ്ങളില്‍ പിടിക്കപ്പെടാതിരിക്കാന്‍ ഇവടേക്ക് വരുന്നവരും കുറവല്ല. നേരത്തെ തമിഴ്‌നാട്ടിലെ തിരുപ്പൂരിലും കര്‍ണാടകയിലെ മാണ്ഡ്യയിലും പത്തനംതിട്ടയിലെ മല്ലപ്പള്ളിയിലും ഇവിടെ നിന്നുള്ള സംഘം കൊള്ള നടത്തിയിരുന്നു. കവര്‍ച്ച നടത്തി കിട്ടുന്ന സാധനങ്ങള്‍ സംഘത്തിന്റെ മുതലാളിമാര്‍ക്ക് എത്തിക്കുകയാണ് അംഗങ്ങളുടെ ജോലി. മിക്കവര്‍ക്കും കനത്ത മാസ ശമ്പളമാണ് ലഭിക്കുന്നത്. മറ്റു സംസ്ഥാനങ്ങളില്‍ നിന്ന് തൊഴില്‍ തേടി എത്തുന്നവരെന്ന വ്യാജേനയാണ് കേരളത്തില്‍ കവര്‍ച്ചക്കാര്‍ ലക്ഷ്യം നേടുന്നത്. തിരുപ്പൂര്‍ ജൂവലറിയില്‍ നിന്ന് 38 കിലോഗ്രാം സ്വര്‍ണമാണ് നഷ്ടപ്പെട്ടത്. കര്‍ണാടകയിലെ മാണ്ഡ്യയില്‍ ശ്രീനിധി ജൂവലറിയില്‍ ജൂണ്‍ ആറിന് 20 കിലോ ഗ്രാം ആഭരണങ്ങളാണ് മോഷ്ടിച്ചത്. മല്ലപ്പള്ളിയില്‍ രണ്ടര കിലോഗ്രാം സ്വര്‍ണമടക്കം ഒരു കോടിയോളം രൂപയുടെ വന്‍കവര്‍ച്ചയാണ് നടത്തിയത്. ചെന്നൈ സെന്‍ട്രല്‍ ബാങ്കില്‍ നിന്ന് 1.60കോടിയാണ് കവര്‍ന്നത്.
കൊള്ള സംഘം വലയത്തിലുണ്ടെങ്കിലും പിടികൂടുന്നതില്‍ അവിടത്തെ പോലീസിന്റെ സഹായം വേണമെന്ന് സിറ്റി പോലീസ് വ്യക്തമാക്കി. പ്രതികളെ താവളത്തിന് പുറത്തെത്തിച്ച് സായുധ ഓപ്പറേഷനിലൂടെ കീഴ്‌പ്പെടുത്തി കേരളത്തിലേക്ക് കൊണ്ടു വരികയാണ് ലക്ഷ്യം.
പ്രതികളെ കൊണ്ടു വരാന്‍ ടെമ്പോട്രാവലറുമായാണ് തമ്പാനൂര്‍ സിഐയും സംഘവും പോയിട്ടുള്ളതെങ്കിലും റോഡ് മാര്‍ഗം പ്രതികളെ എത്തിക്കാനും പ്രയാസമാവും. മാവോയിസ്റ്റ് സ്വാധീനമുള്ള മേഖലയാണിതെന്നതാണ് കാരണം. പ്രതികളെ കൊണ്ടു വരാന്‍ മറ്റ് മാര്‍ഗ്ഗങ്ങളും പരിഗണനയിലുണ്ടെന്ന് സിറ്റി പോലീസ് അധികൃതര്‍ വ്യക്തമാക്കി. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha