ആ കത്ത് വീണ്ടും... സരിത എസ് നായരുടെ മൊഴി രേഖപ്പെടുത്താതിരുന്ന മജിസ്ട്രേറ്റിനെതിരെ കുറ്റപത്രം
സരിത എസ് നായരുടെ മൊഴി രേഖപ്പെടുത്താതിരുന്ന മജിസ്ട്രേറ്റിനെതിരെ കുറ്റപത്രം. എറണാകുളം അഡീഷണല് ചീഫ് ജുഡീഷ്യല് മജിസ്ട്രേറ്റ് എന്.വി. രാജുവിനെതിരെയാണ് ഹൈക്കോടതി അഡ്മിനിസ്ട്രേറ്റീവ് കമ്മിറ്റിയുടെ നിര്ദ്ദേശം. എന്തുകൊണ്ടാണ് സരിതയുടെ മൊഴി രേഖപ്പെടുത്താന് തയ്യാറാകാത്തതെന്ന് 15 ദിവസത്തിനകം വ്യക്തമാക്കണമെന്നാണ് എന് വി രാജുവിനോട് അഡ്മിനിസ്ട്രേറ്റിവ് കമ്മിറ്റി ആവശ്യപ്പെട്ടു.
നേരത്തെ സരിതയുടെ മൊഴി രേഖപ്പെടുത്താത്തതില് മജിസ്ട്രേറ്റ് രാജുവിന്റെ ഭാഗത്തു ഗുരുതര വീഴ്ച ഉണ്ടായതായി ഹൈക്കോടതി വിജിലന്സ് രജിസ്ട്രാര് നടത്തിയ അന്വേഷണത്തില് വ്യക്തമായിരുന്നു. നേരത്തെ മജിസ്ട്രേറ്റിനെതിരെ കേസ് എടുത്തെങ്കിലും അന്വേഷണം ഇഴയുകയാണെന്ന ആരോപണം ഉയരുന്നിരുന്നു. മജിസ്ട്രേറ്റിന്റെ വിശദീകരണം പരിശോധിച്ചു നടപടി സ്വീകരിക്കേണ്ട അഡ്മിനിസ്ട്രേറ്റീവ് കമ്മിറ്റിയുടെ പരിഗണനയ്ക്കായി എ.ഡി.ജെ.എമ്മിന്റെ വിശദീകരണം സമര്പ്പിക്കാന് വൈകിയാതാണ് ഈ ആരോപണം ശക്തമാകാന് ഇടയാക്കിയത്.
എ.ഡി.ജെ.എം. കോടതിയില് ഹാജരാക്കവേ സരിത മജിസ്ട്രേറ്റിനു മുമ്പാകെ ചില പ്രമുഖരുടെ പേരുകള് പരാമര്ശിച്ചെന്നും ഇവര് തന്നെ ചൂഷണം ചെയ്തതായി പരാതിപ്പെട്ടെന്നും ആരോപണമുണ്ടായിരുന്നു. ചില പേരുകള് സരിത പറഞ്ഞെങ്കിലും താന് ശ്രദ്ധിച്ചില്ലെന്നായിരുന്നു മജിസ്ട്രേറ്റ് എന്.വി.രാജു വിജിലന്സ് രജിസ്ട്രാര് മുമ്പാകെ ഈ വിഷയത്തില് മൊഴി നല്കിയത്. കേസുമായി ബന്ധപ്പെട്ട ഫയലുകള് പിടിച്ചെടുത്ത ഹൈക്കോടതി വിജിലന്സ് വിഭാഗം കോടതി ജീവനക്കാരുടെ മൊഴിയും രേഖപ്പെടുത്തിയികരുന്നു. താന് ഒന്നും കേട്ടിട്ടില്ലെന്നായിരുന്നു ജീവനക്കാരി മൊഴി നല്കിയത്.
സരിതയുടെ മൊഴി രേഖപ്പെടുത്താതിരുന്ന മജിസ്ട്രേറ്റിന്റെ നടപടിക്കെതിരെ ബിജെപി നേതാവ് കെ സുരേന്ദ്രനും അഡ്വ എ ജയശങ്കറുമാണ് മജിസ്ട്രേറ്റിനെതിരെ അന്വേഷണമാവശ്യപ്പെട്ട് ഹൈക്കോടതിയെ സമീപിച്ചത്. സരിത രഹസ്യമായി പറഞ്ഞ കാര്യങ്ങള് ആദ്യം രേഖപ്പെടുത്താന് മജിസ്ട്രേറ്റ് തയ്യാറാവാതിരുന്നതാണ് വിവാദമായത്. മൊഴി എഴുതി നല്കണമെന്നായിരുന്നു മജസ്ട്രേറ്റിന്റെ ആവശ്യം. ഇക്കാര്യത്തില് അഭിഭാഷകനെ ഒഴിവാക്കിയ കോടതി സരിത നേരിട്ട് എഴുതി നല്കിയാല് മതിയെന്നും വ്യക്തമാക്കി. ഇതോടെ സരിതയുടെ മൊഴി അട്ടിമറിക്കപ്പെട്ടുവെന്നും മജിസട്രേറ്റ് ഇതിന് കൂട്ടുനില്ക്കുകയായിരുന്നു എന്ന ആരോപണവുമായി പ്രതിപക്ഷവും അന്ന് രംഗത്തെത്തിയിരുന്നു.
സരിത രഹസ്യ മൊഴിയില് മന്ത്രമാരടക്കം നിരവധി പ്രമുഖരുടെ പേരുണ്ടെന്ന സരിതയുടെ അഭിഭാഷകന്റെ വെളിപ്പെടുത്തലും ഏറെ വിവാദത്തിന് ഇടയാക്കിയിരുന്നു. 23 പേജുള്ള പരാതി സരിത തനിക്ക് കൈമാറിയെന്നാണ് അഭിഭാഷകന് പറഞ്ഞത്. എന്നാല് പിന്നീട് സരിത കോടതിയില് നല്കിയത് വെറും നാലു പേജുള്ള പരാതിയാണ്. ഈ 23 പേജുള്ള കത്തിലെ പേരുകളാണ് കഴിഞ്ഞദിവസം മാദ്ധ്യമങ്ങളിലൂടെ പുറത്തുവന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
