ഉമ്മന്‍ചാണ്ടി സര്‍ക്കാരിനെ അട്ടിമറിക്കാന്‍ സിപിഎം, പി.സി ജോര്‍ജിനെ ഉപയോഗിച്ചതായി സംസ്ഥാന ഇന്റലിജന്‍സ്. ഇക്കാര്യം മനസില്‍ വച്ചാണ് ഇടതു പക്ഷം സര്‍ക്കാരിനെ അട്ടിമറിക്കാന്‍ ശ്രമിച്ചതായി യുഡിഎഫ് കണ്‍വീനര്‍ പി. പി തങ്കച്ചന്‍ വെളിപ്പെടുത്തിയത്.
മുന്നണിയിലെ ഘടകകക്ഷികളെ കൈയ്യിലെടുക്കാനാണ് സിപിഎം ശ്രമിച്ചതെന്ന് തങ്കച്ചന്‍ പറഞ്ഞത് രമേശ് ചെന്നിത്തല നല്‍കിയ വിവരങ്ങളുടെ അടിസ്ഥാനത്തിലാണ് ദൂതന്‍മാരെ ഉപയോഗിച്ചാണ് സിപിഎം കരുനീക്കങ്ങള്‍ നടത്തിയതെന്നും തങ്കച്ചന്‍ പറഞ്ഞിരുന്നു. ദൂതന്‍മാര്‍ എന്നുദ്ദേശിച്ചത് പി.സി ജോര്‍ജിനെയാണ്.
ഇടതുമുന്നണി വിട്ടവരെ മാത്രമല്ല യുഡിഎഫിന്റെ ഭാഗമായി നില്‍ക്കുന്നവരെയും സിപിഎം സമീപിച്ചതായി തങ്കച്ചന്‍ ആരോപിച്ചു. ജനതാദളും ആര്‍എസ്പിയുമായി സിപിഎം നടത്തി വരുന്ന ചര്‍ച്ചകള്‍ക്ക് പുറമെയാണ് വര്‍ഷങ്ങളായി യുഡിഎഫിനൊപ്പം നില്‍ക്കുന്ന കക്ഷികളെ സിപിഎം കൂട്ടു പിടിക്കാന്‍ ഒരുങ്ങുന്നത്. കേരള കോണ്‍ഗ്രസ് മാണി വിഭാഗത്തെ കൂടാതെ ലീഗിനെയും സിപിഎം നോട്ടമിട്ടു. പി.സി. ജോര്‍ജാണ് ഇരുപാര്‍ട്ടികളും തമ്മില്‍ സംസാരിച്ചത്.
കേരള കോണ്‍ഗ്രസ് മാണിയെ തങ്ങള്‍ക്കൊപ്പം എത്തിക്കാന്‍ സിപിഎം നടത്തിയ ശ്രമങ്ങള്‍ വിജയിക്കാത്തതിനെ തുടര്‍ന്നാണ് ജോര്‍ജ് മാണിക്കെതിരെ തിരിഞ്ഞതും ചീഫ് വിപ്പ് സ്ഥാനം കളഞ്ഞുകുളിച്ചതും. ജോര്‍ജിനെ ഇടതു മുന്നണിയിലെടുക്കാമെന്ന് കോടിയേരി ബാലകൃഷ്ണന്‍ ഉറപ്പു കൊടുത്തിട്ടുണ്ടെന്നാണ് അറിയുന്നത്. പക്ഷേ ചില എം എല്‍ എ മാരെ ഒപ്പം കൂട്ടണം. ഇല്ലെങ്കില്‍ ലയനം സാധ്യമല്ല.
പി.സി ജോര്‍ജിന്റെ നീക്കങ്ങള്‍ ഇന്റലിജന്‍സ് നിരീക്ഷണത്തിലാണ്. ജോര്‍ജിന്റെ ശ്രമങ്ങള്‍ സര്‍ക്കാരിനെ അട്ടിമറിക്കാനാണെന്ന് ആഭ്യന്തര വകുപ്പും സംശയിക്കുന്നു. ഇക്കാര്യം മുന്നില്‍ കണ്ടാണ് പിസിയെ യുഡിഎഫില്‍ നിന്നും ഒഴിവാക്കേണ്ടതില്ലെന്ന് ഉമ്മന്‍ചാണ്ടിയും രമേശ് ചെന്നിത്തലയും തീരുമാനിച്ചത്. ജോര്‍ജ് യുഡിഎഫ് വിട്ടാല്‍ കൂടുതല്‍ അപകടകാരിയാകുമെന്നും ഉമ്മന്‍ചാണ്ടി കരുതുന്നു.
ജോര്‍ജ് ദൂതിന്റെ എല്ലാ വിശദാംശങ്ങളും യുഡിഎഫ് നേതാക്കള്‍ക്ക് ലഭിച്ചിട്ടുണ്ടെന്നാണ് വിവരം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha