യുഡിഎഫ് സര്‍ക്കാരിനെ അട്ടിമറിക്കാന്‍ സഹായിക്കണമെന്നാവശ്യപ്പെട്ട് ഒരു നേതാവ് ആര്‍എസ്പിയെ സമീപിച്ചതായി സംസ്ഥാന സെക്രട്ടറി എ.എ.അസീസ്. യുഡിഎഫ് വിട്ട ഒരു കക്ഷിയാണ് അട്ടിമറി ശ്രമം നടത്തുന്നത്. എന്നാല്‍ ആരാണ് തങ്ങളെ സമീപിച്ചതെന്ന് പുറത്തുപറയില്ലെന്നും അദ്ദേഹം പറഞ്ഞു. ജനതാദളിനെയും ആര്‍എസ്പിയേയും യുഡിഎഫില്‍ നിന്ന് ചാടിച്ച് സര്‍ക്കാരിനെ വീഴ്ത്താനാണ് നീക്കം. ഈ നീക്കം നടക്കാന്‍ പോകുന്നില്ലെന്നും അദ്ദേഹം പറഞ്ഞു. ആര്‍എസ്പി മുന്നണിവിട്ടാല്‍ സര്‍ക്കാര്‍ വീഴുന്ന സാഹചര്യമാണ് നിലവിലുള്ളത്. ഇത് മുതലെടുക്കാനുള്ള ശ്രമമാണ് ഇടതുപക്ഷത്തിന്റെ ഭാഗത്തുനിന്ന് ഉണ്ടാകുന്നതെന്നാണ് അസീസ് പറയുന്നത്.
എന്നാല്‍ ആര്‍എസ്പി ജനറല്‍ സെക്രട്ടറി ടി.ജെ.ചന്ദ്രചൂഡന്റെ പ്രസ്താവനയോടെയാണ് മുന്നണിമാറ്റം വീണ്ടും സജീവമായത്. ഇടതുമുന്നണി വിടുവാന്‍ മൂന്നു ദിവസം ആലോചിച്ച തങ്ങള്‍ക്ക് യുഡിഎഫില്‍ നിന്ന് പുറത്തുപോകാന്‍ മൂന്നു മണിക്കൂര്‍ മതിയെന്നായിരുന്നു ചന്ദ്രചൂഡന്‍ പറഞ്ഞത്. അരുവിക്കര ഉപതെരഞ്ഞെടുപ്പും ഡെപ്യൂട്ടി സ്പീക്കര്‍ സ്ഥാനവുമാണ് മുന്നണിമാറ്റം വീണ്ടും ചര്‍ച്ചയിലേക്ക് കൊണ്ടുവന്നത്.
ഇടതുമുന്നണി വിട്ടുപോയ കക്ഷികള്‍ തിരിച്ചുവരണമെന്ന് സിപിഎം നേതാക്കള്‍ പലരും കഴിഞ്ഞ ദിവസങ്ങളിലായി അഭിപ്രായപ്പെട്ടിരുന്നു. ആര്‍എസ്പി തെറ്റുതിരുത്തി വന്നാല്‍ മുന്നണിയില്‍ എടുക്കുമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞു. കോടിയേരിക്ക് പിന്നാലെ ഇതേ അഭിപ്രായം ജനറല്‍ സെക്രട്ടറിയും പ്രകടിപ്പിച്ചു. വിട്ടുപോയ കക്ഷികളെ ഉള്‍ക്കൊള്ളിച്ച് മുന്നണി വിപുലപ്പെടുത്തണമെന്ന് പ്രകാശ് കാരാട്ടും പറഞ്ഞു. പ്രതിപക്ഷ നേതാവ് വി.എസ് അച്യുതാനന്ദന്‍ ഇക്കാര്യത്തിലുള്ള തന്റെ അനുകൂല നിലപാട് കഴിഞ്ഞ ദിവസങ്ങളില്‍ പലതവണ ആവര്‍ത്തിക്കുകയും ചെയ്തു. ജനതാദളും ആര്‍എസ്പിയും യുഡിഎഫ് വിട്ടുവരുന്നതിനെ സ്വാഗതം ചെയ്യുന്നതായും അദ്ദേഹം പറഞ്ഞിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha