ഗണേഷ് കുമാറിന്റെ ആനപ്പക അങ്ങനെ പുറത്തു വന്നു. തന്നെ രായ്ക്ക് രാമാനം മന്ത്രി പദവിയില്‍ നിന്നും പുകച്ച് പുറത്ത് ചാടിച്ച പിസി ജോര്‍ജിനെതിരെ ഒരു അവസരം വരാന്‍ കാത്തിരിക്കുകയായിരുന്നു ഗണേഷ് കുമാര്‍. പിസി ജോര്‍ജിന്റെ മന്ത്രിപദത്തിന് സമാനമായ ചീഫ് വിപ്പ് സ്ഥാനം നഷ്ടപ്പെട്ടതോടെ പിസിയ്‌ക്കെതിരെ ഗണേഷ് കുമാര്‍ ആഞ്ഞടിച്ചു.
അഴിമതിക്കെതിരെ പറയാന്‍ ജോര്‍ജ്ജിന് അവകാശമില്ലെന്ന് ഗണേശ് കുമാര്‍ പറഞ്ഞു. ജോര്‍ജ് അഴിമതിക്കെതിരെ സംസാരിക്കുന്നത് വേശ്യയുടെ ചാരിത്ര്യ പ്രസംഗം പോലെയാണെന്ന് അദ്ദേഹം പറഞ്ഞു. അഴിമതിക്കെതിരെ പറയാന്‍ ജോര്‍ജിന് അര്‍ഹതയില്ല. തനിക്കെതിരെ ജോര്‍ജ് നീങ്ങിയത് അഴിമതിക്ക് കൂട്ടുനില്‍ക്കാത്തതിനാലാണ്. തന്നെ പുറത്താക്കാന്‍ ശ്രമിച്ച പി.സി ജോര്‍ജിന്റെ ഇപ്പോഴത്തെ അവസ്ഥ എന്താണെന്നും കൊല്ലത്ത് നടന്ന ചടങ്ങില്‍ സംസാരിക്കവെ ഗണേശ് കുമാര്‍ ചോദിച്ചു.
ചീഫ് വിപ്പ് സ്ഥാനത്തു നിന്നും പുറത്താക്കപ്പെട്ട പി സി ജോര്‍ജ്ജ് അഴിമതി വിരുദ്ധ മുന്നണിയുടെ പ്രവര്‍ത്തനവുമായി മുന്നോട്ടു പോകുമെന്ന് അറിയിച്ചിരുന്നു. ഇങ്ങനെ അഴിമതിക്കെതിരായ പരാമര്‍ശങ്ങളെ തള്ളിപ്പറഞ്ഞാണ് ഗണേശ് രംഗത്തെത്തിയത്. അതേസമയം ഗണേശിന് മറുപടി നല്‍കുന്നില്ലെന്ന് പി സി ജോര്‍ജ്ജ് പ്രതികരിച്ചു. തനിക്കെതിരെ ആരോപിക്കുന്നതിന് മുമ്പ് ഗണേശ് ബാലകൃഷ്ണ പിള്ളയോട് ചോദിക്കണം. ഗണേശ് തനിക്ക് സഹോദരനെ പോലെയാണെന്നും ജോര്‍ജ്ജ് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha