ക്ഷേത്ര ദര്‍ശനം കഴിഞ്ഞ് കാറില്‍ തിരികെ വരുകയായിരുന്ന ഡോക്ടര്‍ ദമ്പതികളും മകനും ലോറിയിടിച്ചു മരിച്ചു
ആന്ധ്രപ്രദേശിലെ തിരുപ്പതിയില്‍ ക്ഷേത്രദര്‍ശനം കഴിഞ്ഞു കാറില്‍ മടങ്ങുകയായിരുന്ന ഡോക്ടര്‍ ദമ്പതികളും മകനും അപകടത്തില്‍ മരിച്ചു. കാഞ്ഞങ്ങാട് ജില്ലാ ആശുപത്രിയിലെ ഗൈനക്കോളജിസ്റ്റ് ചെമ്മട്ടം വയലിലെ ഡോ. പി.എം. ആശ (40) ഭര്‍ത്താവ് പത്തനംതിട്ട റാന്നി സ്വദേശിയും ഇടുക്കി ഡിഎംഒ ഓഫീസിലെ ആര്‍സിഎച്ച് ഓഫീസറുമായ ഡോ. സന്തോഷ് (48), മൂത്ത മകന്‍ ഹരികൃഷ്ണന്‍ (15) എന്നിവരാണു മരിച്ചത്. ഇളയ മകന്‍ അശ്വിനെ പരിക്കുകളോടെ ചിറ്റൂരിലെ ആശുപത്രിയില്‍ പ്രവേശിപ്പിച്ചു.
ആന്ധ്രപ്രദേശിലെ പൂത്തല്‍പേട്ട് പോലീസ് സ്റ്റേഷന്‍ പരിധിയില്‍ ചിറ്റൂരില്‍നിന്നു പത്തു കിലോമീറ്റര്‍ അകലെ ഇന്നലെ പുലര്‍ച്ചെ നാലരയോടെയാണ് അപകടം. ഡോ. സന്തോഷും കുടുംബവും സഞ്ചരിച്ചിരുന്ന കാര്‍ ചരക്കുലോറിയുമായി കൂട്ടിയിടിക്കുകയായിരുന്നു. മൃതദേഹങ്ങള്‍ ചിറ്റൂര്‍ ഗവ.ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ ഏറ്റുവാങ്ങി ഇന്നലെ രാത്രിയില്‍ നാട്ടിലെത്തിച്ചു.
സന്തോഷിന്റെ റാന്നിയിലെ വീട്ടില്‍നിന്നു ശനിയാഴ്ച രാത്രിയാണു സംഘം തിരുപ്പതിയിലേക്കു തീര്‍ഥാടനത്തിനു പുറപ്പെട്ടത്. കാഞ്ഞങ്ങാട് ക്രൈസ്റ്റ് സിഎംഐ പബ്ലിക് സ്‌കൂളിലെ പത്താംക്ലാസ് വിദ്യാര്‍ഥിയാണു മരിച്ച ഹരികൃഷ്ണന്‍. അശ്വിന്‍ ഇതേ സ്‌കൂളിലെ അഞ്ചാംക്ലാസ് വിദ്യാര്‍ഥിയാണ്. കാസര്‍ഗോഡ് ജില്ലയിലെ കമ്പല്ലൂര്‍ കോട്ടയില്‍ കുടുംബത്തിലെ വിജയന്‍ നമ്പ്യാര്‍-രാജശ്വരി ദമ്പതികളുടെ മകളാണ് ഡോ. ആശ. സഹോദരന്‍: ധനേഷ് (ബംഗളൂര്‍ ടാറ്റാ കണ്‍സള്‍ട്ടന്‍സി).
പത്തു വര്‍ഷത്തിലേറെയായി കാഞ്ഞങ്ങാട് ചെമ്മട്ടംവയലിലെ ജില്ലാ ആശുപത്രിയില്‍ ഗൈനക്കോളജിസ്റ്റാണ് ഡോ.ആശ. കാസര്‍ഗോഡ് ജില്ലയിലെ പാണത്തൂര്‍ പ്രാഥമികാരോഗ്യ കേന്ദ്രത്തിലെ മെഡിക്കല്‍ ഓഫീസറായിരുന്നു ഡോ. സന്തോഷ്. രണ്ടു വര്‍ഷം മുമ്പാണ് ഇടുക്കിയില്‍ ആര്‍സിഎച്ച് ഓഫീസറായി സ്ഥലം മാറി പോയത്. ആരോഗ്യവകുപ്പ് ഇടുക്കി മെറ്റേണല്‍ ആന്‍ഡ് ചൈല്‍ഡ് ഹെല്‍ത്തിന്റെ ചുമതലയും ഡോ.സന്തോഷിനായിരുന്നു. റാന്നി കൊറ്റനാട് മുക്കുഴി മാങ്കല്‍ തടത്തില്‍ റിട്ടയേഡ് അധ്യാപകന്‍ പരേതനായ ത്രിവിക്രമന്‍ നായരുടെയും റിട്ടയേഡ് എഇഒ സുകുമാരിയമ്മയുടെയും മകനാണ്.
ഡോ. ആശയുടെ മാതാപിതാക്കള്‍ അടക്കമുള്ള ബന്ധുക്കള്‍ തിരുപ്പതിയിലുണ്ടായിരുന്നു. മകളെയും കുടുംബത്തെയും കാണാതായപ്പോള്‍ അന്വേഷിച്ചിറങ്ങിയ ഇവരാണ് അപകടത്തില്‍പ്പെട്ടവരെ തിരിച്ചറിഞ്ഞത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
