എല്ലാവരും വിഷു ആഘോഷിക്കാനുള്ള തിരക്കിലാണിപ്പോള്‍. പ്രധാനമായി പച്ചക്കറി വാങ്ങാനും ആവശ്യസാധനങ്ങള്‍ വാങ്ങുന്നതിന്റെയും നെട്ടോട്ടം. മലയാളികള്‍ ആവേശത്തില്‍ പച്ചക്കറി കടകളില്‍ പോകുമെങ്കിലും വില കേള്‍ക്കുമ്പോള്‍ കണ്ണും തള്ളിയിരിക്കും. ഈ വിഷുവെങ്കിലും ആഘോഷിക്കാമെന്ന് സന്തോഷിച്ചിരിക്കുമ്പോഴായിരിക്കും പച്ചക്കറികളുടെ കുത്തനെയുള്ള വിലക്കയറ്റം.

പച്ചക്കറിക്കും അവശ്യസാധനങ്ങള്‍ക്കും റോക്കറ്റ് വേഗത്തില്‍ വില വര്‍ദ്ധിക്കുന്നു എന്നുള്ളതാണ് യാഥാര്‍ത്ഥ്യം. സര്‍ക്കാര്‍ നിയന്ത്രണത്തിലാണ് പൊതുവിപണിയെങ്കിലും പച്ചക്കറി വില കുറയുന്നതില്‍ യാതൊരു രക്ഷയുമില്ല.കച്ചവടക്കാര്‍ അവര്‍ക്ക് തോന്നിയ വിലയും ഈടാക്കും. വിലക്കയറ്റം നിയന്ത്രിക്കാന്‍ കലക്ടര്‍ അധ്യക്ഷനായ സമിതി നിലവിലുണ്ട്. എന്നിട്ടും യാതൊരു വില കുറവുമില്ല.
വില വര്‍ദ്ധിക്കുന്നത് കണ്ടില്ലെന്ന മട്ടിലാണ് ജില്ലാ ഭരണകൂടം. കച്ചവടക്കാര്‍ വില തോന്നിയ പോലെ ഇടട്ടെയെന്നാണ് ജില്ലാ ഭരണകൂടത്തിന്റെയും പ്രതികരണം. വിഷു ആഘോഷിച്ച് തീരുന്നതോടെ സധാരണക്കാരുടെ പോക്കറ്റ്് കാലിയാകുമെന്നതാണ് യഥാര്‍ത്ഥ അവസ്ഥ.സര്‍ക്കാറിന് കീഴിലുള്ള സപൈ്‌ളകോ അടക്കമുള്ള സ്ഥാപനങ്ങളും ജനങ്ങളെ മുതലെടുക്കുകയാണ് ചെയ്യുന്നത്. പച്ചപ്പയറിനാണ് വിപണിയില്‍ ഏറ്റവും അധികം വില. 40 രൂപയില്‍ താഴെയായിരുന്ന പയറിന് 100 രൂപക്ക് മേല്‍ ഉയര്‍ന്നു.
ഇനിയും പയര്‍ വില കൂടുമെന്നാണ് അധികൃതര്‍ വ്യക്തമാക്കുന്നത്. 30 രൂപയുണ്ടായിരുന്ന ബീന്‍സിന് തിങ്കളാഴ്ച 80 രൂപയായി. 10 രൂപക്ക് ലഭിച്ച വെള്ളരി വില 25ല്‍ എത്തി. കാരറ്റ്, ബീറ്റ്‌റൂട്ട്, വഴുതന, പച്ചമുളക്, വെണ്ട, ഇഞ്ചി, പച്ചക്കായ തുടങ്ങി എല്ലാ ഇനങ്ങള്‍ക്കും വില കുതിച്ചുകയറിക്കൊണ്ടിരിക്കുകയാണ്. ചില സ്വകാര്യ സംരംഭകര്‍ സഹകരണ ബാങ്കുകളുടെ സഹായത്തോടെ പച്ചക്കറിച്ചന്ത തുടരുന്നുണ്ടെങ്കിലും അവിടെയും വിലക്കുറവില്ല.

ന്യായവിലയില്‍ സാധനങ്ങള്‍ നല്‍കേണ്ട സപൈ്‌ളകോ സ്‌റ്റോറുകളിലും ഔട്ട്‌ലെറ്റുകളിലും സ്വകാര്യ വിപണിയേക്കാളും വില. റേഷന്‍ കടകളിലൂടെ വിതരണംചെയ്യുന്ന അരി വെട്ടിക്കുറച്ചു. ഈസ്റ്റര്‍വിഷു പഞ്ചസാര വിതരണം പരിമിതപ്പെടുത്തി. 13 ഇനങ്ങളാണ് മാവേലി സ്‌റ്റോറുകളിലൂടെയും ഔട്ട്‌ലെറ്റുകളിലൂടെയും മുമ്പ് വിതരണംചെയ്തിരുന്നത്.
ഇപ്പോള്‍ അത് രണ്ടും മൂന്നുമൊക്കെയായി കുറച്ചു. അരി, പഞ്ചസാര, മുളക്, മല്ലി, പരിപ്പ്, ചെറുപയര്‍, കടല, പച്ചരി, കടുക്, ജീരകം, ഉലുവ, ഉഴുന്ന്, മമ്പയര്‍ എന്നിവയായിരുന്നു സബ്‌സിഡി സാധനങ്ങള്‍. പിന്നീട് കടുക്, ജീരകം, ഉലുവ എന്നിവ ഒഴിവാക്കി മറ്റുള്ളവ നിലനിര്‍ത്തിയെങ്കിലും ഇവയൊന്നും പൂര്‍ണമായും സ്‌റ്റോക്ക് ഉണ്ടാവാറില്ല. ഉള്ളവതന്നെ നിലവാരത്തില്‍ ഏറെ പുറകിലുമാണ്.

ഗുണനിലവാരമുള്ള പഞ്ചസാര സ്വകാര്യ വിപണിയില്‍ 27 രൂപക്ക് ലഭിക്കുമ്പോള്‍ സ്‌റ്റോറുകള്‍ വഴി സബ്‌സിഡി നിരക്കില്‍ നല്‍കുന്ന പഞ്ചസാരക്ക് 26 രൂപ 50 പൈസയും നോണ്‍ സബ്‌സിഡി പഞ്ചസാരക്ക് 28 രൂപ 50 പൈസയുമാണ് വില. പരിപ്പ് കിലോക്ക് 101 രൂപയാണ് സ്‌റ്റോറില്‍. വിപണിയില്‍ ഇത് 90 രൂപക്ക് ലഭിക്കും. ചെറുപയറിന് സബ്‌സിഡിയില്ലാതെ 94 രൂപയാണ് വില. പുറത്ത് ഇതേവിലക്ക് മികച്ച ചെറുപയര്‍ ലഭിക്കും. ചെറുപയര്‍ പരിപ്പ് 110120 രൂപക്ക് ലഭിക്കുമ്പോള്‍ മാവേലിയില്‍ 124 രൂപ നല്‍കണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha