പ്രണയാഭ്യര്‍ത്ഥന നിരസിച്ച യുവതിയെയും രക്ഷിക്കാനെത്തിയ പരിസരവാസികളെയും കാറിടിച്ച് കൊല്ലാന്‍ ശ്രമിക്കുകയുംപരിക്കേല്‍പ്പിക്കുകയും ചെയ്ത സംഭവത്തിലെ പ്രതി പോലീസ് അറസ്റ്റിലായി. ചിറയ്ക്കല്‍ ഗായത്രി റോഡിന് സമീപം താമസിക്കുന്ന പുതുപറമ്പില്‍ ഷിബിനാണ് പളനിയില്‍ നിന്ന് പോലീസിന്റെ പിടിയിലായത്. ഷിബിന്റെ പിതാവ് സുരേന്ദ്രനും പിടിയിലായിട്ടുണ്ട്. ഷിബിന്‍ ഉപയോഗിച്ച മാരുതി സ്വിഫ്റ്റ് കാര്‍ ഇയാളുടെ പാലയ്ക്കലുള്ള ബന്ധുവീടിന് സമീപത്തു നിന്ന് സംഭവദിവസം തന്നെ പൊലീസ് കണ്ടെടുത്തിരുന്നു.
കുന്നത്തങ്ങാടി തച്ചംപിള്ളി കരിപ്പാറ വീട്ടില്‍ പരേതനായ സുനില്‍കുമാറിന്റെ മകള്‍ അലിഗ്രയെയാണ് (21) ചൊവ്വാഴ്ച രാവിലെ 9.30 ഓടെ റോഡരികിലെ മതിലിനോട് ചേര്‍ത്ത് കാറിടിച്ച് കൊല്ലാന്‍ ശ്രമിച്ചത്. അലിഗ്രയെ രക്ഷിക്കാന്‍ ശ്രമിക്കുന്നതിനിടെ നാല് സ്ത്രീകളടക്കം ആറു പേര്‍ക്കും പരിക്കേറ്റിരുന്നു.
അലിഗ്രയും ഷിബിനും ഡിഗ്രിക്ക് പഠിക്കുമ്പോള്‍ തൃശൂര്‍ നഗരത്തിലെ ഒരേ ട്യൂട്ടോറിയല്‍ കോളേജിലായിരുന്നു. ആ സമയത്ത് പ്രണയാഭ്യര്‍ത്ഥന നടത്തിയപ്പോള്‍ അലിഗ്ര നിരസിക്കുകയായിരുന്നു. തുടര്‍ന്നുള്ള പകയാണ് ആക്രമണത്തിന് പിന്നിലെന്ന് പൊലീസ് പറഞ്ഞു. വെളുത്തൂര്‍ നമ്പോര്‍ക്കാവ് ക്ഷേത്രത്തിലും തുടര്‍ന്ന് മനക്കൊടി സുബ്രഹ്മണ്യക്ഷേത്രത്തിലും ദര്‍ശനം കഴിഞ്ഞ് അലിഗ്ര മടങ്ങുമ്പോള്‍ കാറില്‍ പിന്നാലെയെത്തിയ ഷിബിന്‍ കത്തി ഉയര്‍ത്തിക്കാട്ടി ആദ്യം കൊല്ലുമെന്ന് ഭീഷണിപ്പെടുത്തി. രക്ഷപ്പെടാന്‍ ശ്രമിക്കുന്നതിനിടെ മതിലിനോട് ചേര്‍ത്ത് ഇടിച്ച് വീഴ്ത്തി. ശബ്ദം കേട്ട് ഓടിയെത്തിയ പരിസരവാസികള്‍ യുവതിയെ എഴുന്നേല്‍പ്പിക്കുന്നതിനിടെ വീണ്ടും കാര്‍ ഓടിച്ചുവന്ന് അവരെയും ഇടിച്ച് തെറിപ്പിക്കുകയായിരുന്നു. കൂടുതല്‍ ആളുകള്‍ എത്തുന്നതു കണ്ട് മതിലില്‍ കാര്‍ ഇടിച്ച് പരിഭ്രാന്തി പരത്തി ഷിബിന്‍ കടന്നുകളയുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha