കണ്ണൂരിലെ പാനൂരില്‍ സിപിഎം പ്രവര്‍ത്തകനായ വിനോദ് കൊല്ലപ്പെട്ടതിനെ തുടര്‍ന്ന് പിണറായി ഫെയ്‌സ് ബുക്കിലൂടെ പ്രതികരിച്ചു. കൊലപാതക പരമ്പരയിലൂടെ സിപിഎമ്മിനെ ഇല്ലാതാക്കാം എന്ന വ്യാമോഹം ആര്‍എസ്എസിനു വേണ്ടെന്നു സിപിഎം നേതാവ് പിണറായി വിജയന്‍ പറഞ്ഞു. പാനൂരില്‍ സിപിഎം പ്രവര്‍ത്തകന്‍ ബോംബേറില്‍ കൊലപ്പെട്ടതില്‍ അനുശോചനമറിയിച്ചുള്ള ഫെയ്‌സ്ബുക്ക് പോസ്റ്റിലാണ് പിണറായിയുടെ ഇത്തരത്തിലൊരു പ്രതികരണം.

സിപിഎം പ്രവര്‍ത്തകര്‍ കൊല്ലപ്പെടുമ്പോള്‍ മൗനം അവലംബിക്കുന്നവര്‍ ആര്‍എസ്എസിന്റെ ആയുധങ്ങള്‍ അവര്‍ക്കുനേരെയും നീളുമെന്നു തിരിച്ചറിയണമെന്നും പിണറായി ഫെയ്‌സ്ബുക്കിലൂടെ പ്രതികരിച്ചു. വിനോദിന്റെ കൊലപാതകത്തെ തുടര്‍ന്ന് നാടാകെ പ്രതിഷേധം ഉയരേണ്ടതുണ്ടെന്നും അദ്ദേഹം വ്യക്തമാക്കി.

പിണറായിയുടെ ഫെയ്‌സ്ബുക്ക് പോസ്റ്റ് ഇങ്ങനെ:

കണ്ണൂര്‍ ജില്ലയിലെ വടക്കേ പൊയിലൂരില്‍ സിപിഐഎം പ്രവര്‍ത്തകന്‍ വിനോദനെ ആര്‍എസ്എസ് കൊലപ്പെടുത്തിയതില്‍ നാടാകെ പ്രതിഷേധം ഉയരേണ്ടതുണ്ട്. കൊലപാതക പരമ്പരയിലൂടെ സിപിഐഎമ്മിനെ ഇല്ലാതാക്കിക്കളയാം എന്ന വ്യാമോഹമാണ് ആര്‍എസ്എസിന്. ആര്‍എസ്എസില്‍ നിന്ന് സിപിഐഎമ്മിലെത്തിയ സഖാവാണ് വിനോദന്‍. സിപിഐഎം പ്രവര്‍ത്തകരെ തുടര്‍ച്ചയായി കൊല്ലുമ്പോള്‍ മൗനം അവലംബിക്കുന്നവര്‍, ആര്‍എസ്എസിന്റെ ആയുധങ്ങള്‍ അവര്‍ക്ക് നേരെയും വരും എന്ന് തിരിച്ചറിയണം. സഖാവ് വിനോദന്റെ വിയോഗത്തില്‍ അനുശോചിക്കുന്നതിനോപ്പം, ആര്‍എസ്എസ് നരമേധ രാഷ്ട്രീയത്തിനെതിരെ ശബ്ദമുയര്‍ത്താന്‍ എല്ലാ വിഭാഗം ജനങ്ങളും രംഗത്തുവരണം എന്ന് അഭ്യര്‍ത്ഥിക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha