തനിക്കുപറ്റിയത് നാവു പിഴയെന്നു പറഞ്ഞ് തടിയൂരി കണ്‍വീനര്‍. ഭൂപരിഷ്‌കരണ നിയമം ഭേദഗതി ചെയ്യാന്‍ യുഡിഎഫ് യോഗം തീരുമാനിച്ചില്ലെന്ന വിശദീകരണവുമായി കണ്‍വീനര്‍ പിപി തങ്കച്ചന്‍. ഭൂമി പതിച്ച് നല്‍കാന്‍ പഞ്ചായത്ത് രാജ് ആക്ട് ഭേദഗതി ചെയ്യാനാണ് യോഗം തീരുമാനിച്ചതെന്നും തങ്കച്ചന്‍ വ്യക്തമാക്കി.
നേരത്തെ ഘടകകക്ഷികളെ രഹസ്യാന്വേഷണ പൊലീസ് നിരീക്ഷിക്കുന്നുവെന്ന തങ്കച്ചന്റെ പരാമര്‍ശവും വ്യാപക ചര്‍ച്ചകള്‍ക്ക് ഇട നല്‍കി. ആര്‍എസ്പി, ജനതാദള്‍ കക്ഷികളെ നിരീക്ഷിക്കുന്നുണ്ടെന്നായിരുന്നു തങ്കച്ചന്‍ പറഞ്ഞത്. പിന്നീട് മാദ്ധ്യമങ്ങള്‍ വളച്ചൊടിച്ച് വിവാമുണ്ടാക്കിയെന്ന് പറഞ്ഞ് തടിയൂരി. മുന്നണിയുടെ ഭാവിയെ തന്നെ ചോദ്യം ചെയ്ത ഈ പരാമര്‍ശത്തെ മുഖ്യമന്ത്രി ഉള്‍പ്പെടെയുള്ളവര്‍ക്ക് തള്ളിപ്പറയേണ്ടി വന്നു. ഇതിന് തൊട്ട് പിന്നാലെയാണ് യുഡിഎഫ് യോഗത്തിലെ തീരുമാനം തന്നെ മാറ്റി പറഞ്ഞത്. അതു സര്‍ക്കാരിനെതിരെ വ്യാപക സമരങ്ങള്‍ക്ക് സാധ്യതയുള്ള വിഷയം. ഈ സാഹചര്യത്തിലാണ് തെറ്റ് സമ്മതിച്ച് തിരുത്ത് നല്‍കാന്‍ മുഖ്യമന്ത്രി തങ്കച്ചനോട് നിര്‍ദ്ദേശിച്ചത്. ഇത്തരം തെറ്റുകള്‍ ഉണ്ടാകരുതെന്നും നിര്‍ദ്ദേശിച്ചു.
ഇന്നലത്തെ യുഡിഎഫ് യോഗത്തിന് ശേഷമാണ് ഭൂപരിഷ്‌കരണ നിയമം ഭേദഗതി ചെയ്യാന്‍ സര്‍ക്കാരിനോട് യുഡിഎഫ് നിര്‍ദ്ദേശിച്ചതായി തങ്കച്ചന്‍ മാദ്ധ്യമ പ്രവര്‍ത്തകരോട് വിശദീകരിച്ചത്. അത് ബ്രേക്കിങ്ങ് ന്യൂസ് ആയി ചാനലുകള്‍ നല്‍കി. എന്നിട്ടും മന്ത്രിസഭാ യോഗത്തിന് ശേഷം ഇക്കാര്യത്തില്‍ വ്യക്തത വരുത്താന്‍ മുഖ്യമന്ത്രി തയ്യാറായില്ല. ഇതോടെ ഇന്നത്തെ പത്രങ്ങളില്‍ കണ്‍വീനര്‍ പറഞ്ഞത് പ്രധാന വാര്‍ത്തയായി എത്തി. ഇതോടെ കണ്‍വീനറെ മുഖ്യമന്ത്രി അതൃപ്തി അറിയിച്ചു.
 ഇന്നലെ പറഞ്ഞത് തെറ്റായിരുന്നുവെന്നും സമ്മതിച്ചു. മുഖ്യമന്ത്രി ഉമ്മന്‍ ചാണ്ടിയുടെ നിര്‍ദ്ദേശത്തെ തുടര്‍ന്നാണ് തങ്കച്ചന്‍ പറ്റിയ തെറ്റ് ഏറ്റ് പറഞ്ഞത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha