സ്വര്ണക്കടത്തു കേസിലെ പ്രതികളായ സ്വപ്ന സുരേഷ്, സരിത്, സന്ദീപ് നായര് എന്നിവരുടെ സ്വത്ത് കണ്ടുകെട്ടും.... മൂവരേയും ഏഴ് ദിവസത്തേക്ക് ഇഡിയുടെ കസ്റ്റഡിയില് വിട്ടു
സ്വര്ണക്കടത്ത് കേസില് പ്രതികളായ സ്വപ്ന സുരേഷ്, സരിത്, സന്ദീപ് നായര് എന്നിവരുടെ സ്വത്ത് കണ്ടുകെട്ടും. സ്വത്ത് കണ്ടു കെട്ടുന്നതിന് എന്ഫോഴ്സ്മെന്റ് ഡയറക്ടറേറ്റ് (ഇഡി) റജിസ്ട്രേഷന് വകുപ്പിനു കത്തു നല്കി. സ്വപ്ന സുരേഷിനെയും സന്ദീപ് നായരെയും പി.എസ്.സരിത്തിനെയും ഏഴ് ദിവസത്തേക്ക് ഇഡിയുടെ കസ്റ്റഡിയില് വിട്ടു. എന്ഐഎ കോടതി ജുഡിഷ്യല് കസ്റ്റഡിയില് വിട്ട പ്രതികളെ രാവിലെ എറണാകുളം പ്രിന്സിപ്പല് സെഷന്സ് കോടതിയില് ഹാജരാക്കിയ ശേഷമാണ് ഇഡി കസ്റ്റഡിയില് എടുത്തത്. സ്വര്ണക്കടത്തിന്റെ മറവില് നടന്ന കള്ളപ്പണം വെളുപ്പിക്കലും ഹവാല, ബെനാമി ഇടപാടുകളുമാണ് ഇഡി അന്വേഷിക്കുന്നത്.
നയതന്ത്ര ചാനല് വഴിയുള്ള സ്വര്ണക്കടത്തിനു കഴിഞ്ഞ ഒരു വര്ഷത്തിനിടെ 100 കോടിയോളം രൂപയുടെ കള്ളപ്പണ ഇടപാട് നടന്നതായി പ്രാഥമിക അന്വേഷണത്തില് കണ്ടെത്തിയിരുന്നു. സ്വര്ണക്കടത്ത് കേസില് എന്ഐഎ തിരുവനന്തപുരത്ത് തെളിവെടുപ്പ് തുടരുകയാണ്.
സെക്രട്ടേറിയറ്റിന് സമീപത്തെ ഹെതര് ഫ്ലാറ്റില് പ്രതികളെ എത്തിച്ച് തെളിവെടുപ്പ് നടത്തി. ജലാല്, ഷാഫി, ഷറഫുദ്ദീന്, ഷെഫീഖ് എന്നീ പ്രതികളെയാണ് തെളിവെടുപ്പിനായി എത്തിച്ചത്. ഇതിനിടെ, തിരുവനന്തപുരം സ്വര്ണക്കടത്ത് കേസുമായി ബന്ധപ്പെട്ട് അന്വേഷണം യുഎഇയിലേക്കും വ്യാപിപ്പിക്കുന്നതായി റിപ്പോര്ട്ടുകള് പുറത്തുവന്നു. അതേസമയം, തിരുവനന്തപുരം സ്വര്ണക്കടത്ത് കേസില് തീവ്രവാദ ബന്ധത്തിലുറച്ചു നില്ക്കുകയാണ് എന്ഐഎ. തീവ്രവാദ ബന്ധത്തിന്റെ വിശദാംശങ്ങള് കോടതിയെ അറിയിച്ചു. അന്വേഷണത്തിന്റെ ഇതുവരെയുള്ള വിവരങ്ങള് അടങ്ങിയ കേസ് ഡയറി കോടതിയില് ഹാജരാക്കി. കേസ് ഡയറി ഹാജരാക്കാന് എന്ഐഎ കോടതി നേരത്തെ ആവശ്യപ്പെട്ടിരുന്നു.
"
https://www.facebook.com/Malayalivartha