വിമാന ഇന്ധനത്തിന്മേലുള്ള മൂല്യ വര്‍ദ്ധിത നികുതിയില്‍ ഇളവ് വരുത്തിയതിന് തമിഴ്‌നാട് മുഖ്യമന്ത്രി സി.ജോസഫ് വിജയ്ക്ക് കേന്ദ്രത്തിന്റെ പ്രശംസ. ക്രൂഡ് ഓയില്‍ വില കുതിച്ചുയരുന്ന സാഹചര്യത്തില്‍ ഇത് വിമാനക്കമ്പനികള്‍ക്ക് ആശ്വാസം നല്‍കുമെന്ന് കേന്ദ്രം ചൂണ്ടിക്കാട്ടുന്നു. ചെന്നൈയില്‍ നികുതി നിരക്ക് 29 ശതമാനത്തില്‍ നിന്ന് 16 ശതമാനമായും സംസ്ഥാനത്തെ മറ്റ് വിമാനത്താവളങ്ങളില്‍ ഒരു ശതമാനമായുമാണ് തമിഴ്‌നാട് കുറച്ചത്. കേന്ദ്ര വ്യോമയാന മന്ത്രി റാം മോഹന്‍ നായിഡുവാണ് വിജയ്‌യെ പ്രശംസിച്ചത്.

'വിമാന ഇന്ധനത്തിന്റെ (എടിഎഫ്) വാറ്റ് (മൂല്യവര്‍ദ്ധിത നികുതി) കുറയ്ക്കാനുള്ള തമിഴ്‌നാട് സര്‍ക്കാരിന്റെ തീരുമാനത്തെ അഭിനന്ദിക്കുന്നു. വ്യോമയാന മേഖലയ്ക്ക് ഇതൊരു സ്വാഗതാര്‍ഹമായ നടപടിയാണ്. ഇക്കാര്യത്തില്‍ മുന്‍കൈ എടുത്തതിന് മുഖ്യമന്ത്രി വിജയ്ക്ക് നന്ദി. വിമാനയാത്ര കൂടുതല്‍ താങ്ങാനാവുന്നതാക്കി മാറ്റുന്നതിന് കേന്ദ്രവും സംസ്ഥാനങ്ങളും ഒന്നിച്ച് പ്രവര്‍ത്തിക്കേണ്ടതുണ്ട്. യാത്രക്കാരായിരിക്കണം എപ്പോഴും നമ്മുടെ പൊതുവായ മുന്‍ഗണന' എന്നാണ് റാം മോഹന്‍ നായിഡു സമൂഹമാദ്ധ്യമത്തില്‍ കുറിച്ചത്.

ആഴ്ചകള്‍ക്ക് മുന്‍പ് പ്രധാനമന്ത്രി നരേന്ദ്ര മോദി തമിഴ്‌നാട്ടില്‍ സന്ദര്‍ശനം നടത്തിയിരുന്നു. ചെന്നൈയില്‍ 4900 കോടി രൂപ ചെലവില്‍ നിര്‍മ്മിച്ച മെട്രോ റെയില്‍ പദ്ധതിയുടെ രണ്ടാം ഘട്ടവും 13,000 കോടിയിലധികം രൂപയുടെ വികസന പദ്ധതികളും ഉദ്ഘാടനം ചെയ്യാനാണ് പ്രധാനമന്ത്രി എത്തിയത്. തമിഴ്‌നാടിന്റെ വികസനത്തിനായി മുഖ്യമന്ത്രി വിജയ്‌ക്കൊപ്പം ചേര്‍ന്നുപ്രവര്‍ത്തിക്കുമെന്ന് പ്രധാനമന്ത്രി അന്ന് പ്രഖ്യാപിക്കുകയും ചെയ്തു.