കുടപ്പനയിലെ ഫാം ഉടമ പി.പി.മത്തായി വനപാലകരുടെ കസ്റ്റഡിയില്‍ മരണപ്പെട്ട സംഭവത്തില്‍ പോലീസ് അന്വേഷണം പുതിയ തലത്തിലേക്ക്. മത്തായിയുടെ ജഡം കണ്ടെത്തിയ കുടപ്പനയിലെ വീട്ടിലെ കിണറ്റില്‍ ബുധനാഴ്ച പോലീസ് ഡമ്മി പരീക്ഷണം നടത്തി.മരണം സംബന്ധിച്ച് ഇനിയും ദുരൂഹതകള്‍ നിലനില്‍ക്കുന്നതിനിടെയാണ് കൂടുതല്‍ ശാസ്ത്രീയ അന്വേഷണ നടപടികള്‍. അബദ്ധത്തില്‍ വീണതാണോ ചാടിയതാണോ എന്നതില്‍ കൂടുതല്‍ വ്യക്തതയാണ് പോലീസ് തേടുന്നത്.ജില്ലാ പോലീസ് ചീഫ് കെ.ജി.സൈമണിന്റെ നേതൃത്വത്തിലായിരുന്നു നടപടികള്‍. ബുധനാഴ്ച കുടപ്പനയിലെ വീടും പരിസരവും സീല്‍ചെയ്ത് പൊതുജനങ്ങളെയും മാധ്യമങ്ങളെയും പ്രവേശിപ്പിക്കാതെയായിരുന്നു ഡമ്മിപരീക്ഷണം.

രാവിലെ 11.30ഓടെ ആരംഭിച്ച നടപടികള്‍ രണ്ടു മണിക്കൂറിലേറെ നീണ്ടു. ഫൊറന്‍സിക് വിദഗ്ധരും പങ്കെടുത്തു. രണ്ട് ഡമ്മികള്‍ ഉപയോഗിച്ചു. സംഭവം ദിവസം കിണറ്റില്‍ ഉണ്ടായിരുന്ന അളവില്‍ ജലം ക്രമീകരിച്ചായിരുന്നു നടപടികള്‍. ഡമ്മി ഉപയോഗിച്ച് വിവിധ തലങ്ങളില്‍ പോലീസ് പരീക്ഷണം നടത്തി. മരിച്ച മത്തായിയുടെ തൂക്കവും അളവുകളുമുള്ള ഡമ്മിയാണ് ഉപയോഗിച്ചത്.

മത്തായി കിണറ്റില്‍ ചാടിയതാണെന്ന നിലപാടിലാണ് വനം വകുപ്പ് തുടക്കംമുതല്‍. അതേസമയം ഇയാളെ വനപാലകര്‍ അപായപ്പെടുത്തിയതാണെന്ന ആരോപണത്തില്‍ കുടുംബം ഉറച്ച് നില്‍ക്കുകയാണ്. നപാലകരെ അറസ്റ്റ് ചെയ്യുന്നതുള്‍പ്പെടെയുള്ള നടപടികള്‍ ഉടനുണ്ടാകുമെന്ന് സൂചനയുണ്ട്. വനം വകുപ്പിന് ഗുരുതരവീഴ്ചസംഭവിച്ചതായാണ് പോലീസിന്റെ നിഗമനം.\