കൊല്ലം കൊട്ടിയത്ത് ആത്മഹത്യചെയ്ത റംസിയുടെ ഫോണ്‍കോള്‍ പുറത്ത് വന്നിരിക്കുകയാണ്. മരിക്കുന്നതിന് മുന്‍പ് ഹാരിസിനോട് സംസാരിച്ച ശബ്ദരേഖയാണ് ഇപ്പോള്‍ പുറത്തുവന്നിരിക്കുന്നത്. 'ഇക്കൂ, എനിക്ക് ഇല്ലാത്ത എന്താണ് അവള്‍ക്കുള്ളത്. ഞാന്‍ ചോദിക്കുന്നത് ഇക്കൂ എനിക്ക് തരാന്ന് പറഞ്ഞ ജീവിതമാണ്. എനിക്ക് നീറി കഴിയാന്‍ വയ്യ ഇക്കൂ. ഒന്നുകില്‍ ഇക്കൂ എന്നെ കല്യാണം കഴിക്കണം. അല്ലെങ്കില്‍ ഞാന്‍ ഈ ജീവിതവും ജീവനും അങ്ങ് അവസാനിപ്പിക്കും..' മരിക്കുന്നതിന് മുന്‍പും ജീവിക്കാനുള്ള കൊതി കൊണ്ട് റംസി പറഞ്ഞ വാക്കുകള്‍.

ഇതിന് പരിഹാസത്തോടെ ഹാരിസ് കൊടുത്ത മറുപടി, 'ഞാന്‍ വണ്ടിയോടിക്കുകയാണ്. മോശമായ വാക്കുകളും ഉപയോഗിച്ചിട്ടുണ്ട്. 12 മണിവരെ ആത്മഹത്യ ചെയ്യാതിരിക്ക്..' മോഹിപ്പിച്ച് വഞ്ചിച്ചയാളോട് അവസാനവും കരഞ്ഞു കാലു പിടിച്ചപ്പോള്‍ റംസി നേരിട്ടത് പരിഹാസവും തെറിവിളിയും മാത്രമായിരുന്നു. പുറത്തുവന്ന ഫോണ്‍ റെക്കോര്‍ഡ് അതിന് തെളിവാകുന്നു.
കൊല്ലം കൊട്ടിയം സ്വദേശി റംസി (24) ജീവനൊടുക്കിയ കേസില്‍ പള്ളിമുക്ക് സ്വദേശി ഹാരിസാണ് (24) അറസ്റ്റിലാണ്. ഹാരിസുമായി വിവാഹം ഉറപ്പിച്ചിരുന്നെങ്കിലും പിന്നീട്, മറ്റൊരു ബന്ധത്തിന്റെ പേരില്‍ യുവാവ് പിന്‍മാറിയതാണു റംസിയുടെ മരണകാരണമെന്നാണു ബന്ധുക്കളുടെ ആരോപണം. ഒന്നര വര്‍ഷം മുന്‍പ് ഗര്‍ഭിണിയാണ് എന്നറിഞ്ഞപ്പോള്‍ വിവാഹം ചെയ്യണമെന്ന് റംസി ഹാരിസിനോട് ആവശ്യപ്പെട്ടിരുന്നു. സ്വന്തമായി ഒരു വര്‍ക്‌ഷോപ്പ് ആരംഭിച്ചശേഷം മാത്രം അതിനെപ്പറ്റി ചിന്തിക്കാമെന്നും ഇപ്പോള്‍ ഗര്‍ഭച്ഛിദ്രം നടത്തണമെന്നും ഹാരിസ് വാശിപിടിക്കുകയായിരുന്നു.'ആവശ്യമായ സമയത്തെല്ലാം എന്നെ ഉപയോഗിച്ചിട്ട് ഇപ്പോള്‍ വേണ്ടെന്നു പറഞ്ഞാല്‍ ഞാനെന്ത് ചെയ്യാനാണ്? എനിക്കെന്തെങ്കിലും പറ്റി കഴിഞ്ഞാല്‍ എന്റെ മയ്യത്ത് പോലും കാണാന്‍ വരരുത്' റംസി ഹാരിസിനോട് പറയുന്നതും ശബ്ദരേഖയില്‍ വ്യക്തമാണ്.