48 പേര്ക്കെതിരെ കേസ്; എട്ട് യൂത്ത് കോണ്ഗ്രസുകാര്ക്കെതിരെ ജാമ്യമില്ലാ വകുപ്പ്
സാക്ഷിമൊഴി നല്കാന് മന്ത്രി കെ ടി ജലീല് കൊച്ചിയിലെ എന്ഐഎ ആസ്ഥാനത്ത് എത്തിയതിനെ തുടര്ന്ന് കോണ്ഗ്രസ്–-ബിജെപി പ്രതിഷേധം. പൊലീസ് ജീപ്പിന്റെ ചില്ല് തകര്ത്തതുള്പ്പെടെ അക്രമസംഭവങ്ങളില് ബിജെപി–- കോണ്ഗ്രസ് പ്രവര്ത്തകരായ 48 പേര്ക്കെതിരെ പൊലീസ് കേസെടുത്തു.
കെ ടി ജലീല് എന്ഐഎ ആസ്ഥാനത്ത് എത്തിയത് വാര്ത്തയായതിനാല് ഓഫീസും പരിസരവും കനത്ത പൊലീസ് കാവലിലായിരുന്നു. ഡിസിപി ജി പൂങ്കുഴലിയുടെ നേതൃത്വത്തിലായിരുന്നു ക്രമീകരണങ്ങള്. എന്ഐഎ ആസ്ഥാനത്തേക്കുള്ള എല്ലാ വഴികളും പൊലീസ് നിരീക്ഷണത്തിലായിരുന്നു.
എല്ലാവരുടെയും പ്രവേശനം തടഞ്ഞ് ബാരിക്കേഡുകള് സ്ഥാപിച്ചു. ഇതിനിടെ ചെറുസംഘങ്ങളായി പ്രതിഷേധക്കാര് എത്തി എന്ഐഎ ഓഫീസ് പരിസരത്തേക്ക് കടക്കാന് ശ്രമിച്ചെങ്കിലും പൊലീസ് തടഞ്ഞു. പ്രതിഷേധക്കാരെ അറസ്റ്റുചെയ്ത് നീക്കി. ബലപ്രയോഗം നടത്താതെതന്നെ പ്രതിഷേധക്കാരെ നീക്കിയെങ്കിലും അറസ്റ്റുചെയ്ത് ജീപ്പില് ഇരുത്തിയ ഒരാള് കൈമുട്ടുകൊണ്ട് ചില്ല് ഇടിച്ചുതകര്ത്തു.
മൂന്നു കേസുകളിലായാണ് 48 പേര്ക്കെതിരെ സൗത്ത് പൊലീസ് കേസെടുത്തത്. ജീപ്പിന്റെ ചില്ല് തകര്ത്ത പ്രവര്ത്തകനുള്പ്പെടെ എട്ട് യൂത്ത് കോണ്ഗ്രസുകാര്ക്കെതിരെ ജാമ്യമില്ലാ വകുപ്പുപ്രകാരമാണ് കേസ്. കേസെടുത്തതില് 20 പേര്വീതം ബിജെപി, കോണ്ഗ്രസ് പ്രവര്ത്തകരാണ്.
https://www.facebook.com/Malayalivartha
