വയലിനിസ്റ്റ് ബാലഭാസ്‌കറിന്റെ അപകട മരണവുമായി ബന്ധപ്പെട്ട് സ്റ്റീഫന്‍ ദേവസിയുടെ മൊഴി സിബിഐ രേഖപ്പെടുത്തി. തിരുവനന്തപുരത്തെ സിബിഐ ഓഫീസില്‍ ഹാജരായാണ് ബാലഭാസ്‌കറിന്റെ അടുത്ത സുഹൃത്തും സംഗീത സംവിധായകനുമായ സ്റ്റീഫന്‍ ദേവസി മൊഴി നല്‍കിയത്.

മൊഴിയെടുപ്പ് മൂന്നര മണിക്കൂര്‍ നീണ്ടു. അപകടത്തിന് ശേഷം ചികിത്സയിലായിരുന്ന ബാലഭാസ്‌കറിനെ ആശുപത്രിയിലെത്തി കണ്ടതിലും സംസാരിച്ചതിലും അടക്കം ദുരൂഹതയെന്ന് കുടുംബം ആരോപിച്ചിരുന്നു. സ്റ്റീഫന്‍ ദേവസിയുടെ സാമ്ബത്തിക ഇടപാടുകളെ കുറിച്ചും യാത്രകളെ കുറിച്ചും അന്വേഷണം വേണമെന്നും ആവശ്യം ഉയര്‍ന്ന പശ്ചാത്തലത്തിലാണ് സിബിഐ മൊഴി രേഖപ്പെടുത്തിയത്.
കഴിഞ്ഞ ദിവസം ബാലഭാസ്‌കറിന്റെ സുഹൃത്തുക്കളടക്കം നാല് പേര്‍ തിരുവനന്തപുരം ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ നുണ പരിശോധനക്ക് സമ്മതം അറിയിച്ചിരുന്നു. ബാലഭാസ്‌കറിന്റെ സുഹൃത്തുക്കളും ട്രൂപ്പംഗങ്ങളുമായ പ്രകാശന്‍ തമ്ബി, വിഷ്ണു സോമസുന്ദരം, അപകട സമയം ബാലഭാസ്‌കറിന് ഒപ്പമുണ്ടായിരുന്ന അര്‍ജുന്‍, കലാഭവന്‍ സോബി എന്നിവരാണ് കേസില്‍ നുണപരിശോധനക്ക് സമ്മതമാണെന്ന് ചീഫ് ജ്യുഡീഷ്യല്‍ മജിസ്‌ട്രേറ്റ് കോടതിയെ അറിയിച്ചത്. നാല് പേരെയും നുണപരിശോധനയ്ക്ക് വിധേയമാക്കണമെന്ന് ആവശ്യപ്പെട്ട് സിബിഐ നേരത്തെ കോടതിയില്‍ അപേക്ഷ നല്‍കിയിരുന്നു.